Maart 2025 saamgesels

Hoop julle gaan 'n baie lekker naweek hê Wildehont. Volgens die weervoorspelling lyk dit asof die grootste uitdaging gaan wees om uit Worcester uit te kom. Mooi ry.

Alhoewel ons baie uitgesien het na die naweek oorweeg ons nou om dit af te stel. Dit reën al sonder ophou vir meer as 13 uur by ons. Moon River bushcamp sê dit reën ongelukkig daar ook, en nog reën word vandag en môre voorspel. Hulle sê hulle sal verstaan as ons wil kanselleer. Dis nou sleg, maar dit gaan onnodige onkostes wees om daarheen te ry en kampering te betaal as ons meeste van die tyd onder ‘n gazebo moet sit. Ons het nie regtig reën klere nie en Salomien se keel is van gister af seer. 

... pofadders teen die Kaapse kus wanneer jy kamp. Dié serpente kom baie algemeen in die fynbos voor en is lief daarvoor om in die aand rond te "loop". My seun het vanoggend vir my die volgende gestuur.

Ek het onlangs ook 'n jong pofadder teen ons braai in Montagu karavaanpark gekry (ek het van my ervaring vertel).

Gebruik maar jou flits as jy saans in donker areas rondbeweeg. Ek dink dat by 'n plek soos Dwarswegstrand, met die baie inheemse plantegroei, kan dié kêrels ook voorkom.

Ons het in Karoo Nas Park al by 4 geleenthede pofadders in die kampeerterrein gekry en ook tydens ons Kers/Nuwejaars-vakansie 'n lastige Kaapse kobratjie gehad wat gereeld kom gesig wys het.

Ons gaan nou uit Worcester vertrek. Die son wil amper deurkom maar daar word nog ligte reën voorspel. Dis net water en ek weet nie wanneer ons weer by Moon River Bushcamp gaan uitkom nie so ons druk maar deur. Geniet julle naweek. 

Lekker kamp en veilig ry.

Ek het vanoggend van Armond Nel (veldwagter in Karoo Nas Park) verneem dat die Stoltzhoekrivier in die park sterk afgekom het en die drade weggespoel het. Hy sê die nood is groot om so vinnig moontlik herstelwerk te doen alvorens hulle weer leeus buite die park moet gaan soek.

Ek glo dat die veld sal mooi reageer na die reën en dat ons kan uitsien na 'n mooi groen Karoo wanneer ons vanaf 15 Apr daar kuier vir 7 aande.

Hierdie het niks met die reëntyd te doen waaroor Wessel wonder nie (ongelukkig). Dit was toe ek die naam Nieuwoudville sien dat ek gedink het aan iets wat ek lank gelede raakgelees het oor die Bagdad Café - 25km buite Van Rhynsdorp, rigting Nieuwoudtville. Dit lyk na 'n padstal met heerlike etes waar ek hoop om ook eendag te stop. Wat my lekker laat lag het is 'n skryfbord buite die plek. Ek het 'n foto hiervan, maar dit is nie my eie nie, so sal ek dit liefs nie plaas nie. Dit lees:

Redes hoekom Bagdad toe mag wees:

• Dis Maandag
• Dis bo 40C
• Die ANC
• Ekonomie is in sy m--r
• Babalas
• Gatvol vir ou tannies
• Pad te stil
• Krieket
• Kliniese depressie
• Nie die moeite werd nie
• Genoeg gemaak gister
• Sooibrand
• Luiheid

Kies 'n rede waarom die padstal toe is wanneer jy op 'n dag daar verbyry.

Het Wessel nie hoeka 'n Namakwaland toer in beplanning nie?

Hoop ons baas lees nie hier nie want dan is ek geban. By een van die woordjies het ek darem 'n poging aangewend (ter versagting van die vonnis)

Miskien nog bietjie vroeg vir 'n Maandagoggend, maar vertel asb. hoe die naweek daar verloop het. Ek hoop die weer het opgeklaar en dat julle iets van die kamp kon geniet Wildehont.

Miskien nog bietjie vroeg vir 'n Maandagoggend, maar vertel asb. hoe die naweek daar verloop het. Ek hoop die weer het opgeklaar en dat julle iets van die kamp kon geniet Wildehont.

Maar ek sit al sedert 09:00 in vergaderings. Ons het ‘n lieflike naweek gehad in ‘n prentjiemooi omgewing. Ek wil graag meer vertel en foto’s wys, maar na die vergadering waarin ek tans sit klaar is het ek ‘n halfuur vir werk en dan ‘n wortelkanaal afspraak by my tandarts. Vertellinge gaan dus moet wag. Hier is een foto as ‘n lusmaker. 
 

Dit lyk asof hier 'n lekker vertelling met mooi foto's gaan kom. Miskien regverdig Moon River Bush Camp sy eie draad vir wanneer iemand eendag wil "teruglees"?

Het so rukkie terug laat weet dat ons 7 tot 14 April in die Karoo N Park sal wees. Sien regtig uit daarna, die veld sal mooi wees na die baie reen. Hopelik het die vêr gedeeltes wat ons so geniet, nie te erg verspoel nie.

Armond gaan vir ons skaapkop gaarmaak, ek vat paar leeuballe saam vir hors de wors.

Dan, weer as dit kan, gaan ons saam hom buite om ry, en die " wilde" gedeelte besoek. Die is ernstige 4x4 paaie. Darem nou nie kar deur jou gat trek nie, net skuins, skeef en skurf.

Tans besig met Donderdag se shopping lysie op te maak. Lekker.

... dan gaan ons mekaar met 'n dag mis. Jy vertrek 14 Apr en ons arriveer daar op 15 Apr.

Hoe kry jy dit reg om die "kortetjie" so lank geheim te hou? Dit is oor 2 weke van nou! 

Skaapkop. Ek vermoed die ander forumlede wat tevore saamgekamp het in die Karoo gee nie om om hierdie geleentheid mis te loop nie..... Die "hors de wors" onthou ek darem van 'n vorige geleentheid en klink heel gewild te wees.

Twee weke is min, Neef Herman. Onthou dat, behalwe die stofsuig en pakkery wat voorlê die blommetjies op daardie oulike 60's karavaan nog kort. Op die "shopping lysie" miskien ook 'n afspraak by 'n graphic designer inwerk?