Len en die Kruger Wildtuin in Mei 2024

... ek kan sien jou lus vir die wildtuin "hang uit". Soos reeds op ander gesprekslyne gestel, het ons maar besluit ons sal ons tande, vir kampeervakansies in die wildtuin, trek. Ons sal baie waarskynlik nog in vaste akkommodasie tuisgaan - uiteraard vir korter tydperke. In sodanige gevalle sal ons dalk eerder vlieg.

My Tzaneen-maters is gister hier weg - altans eers vanoggend vanaf Kaapstad gevlieg, want hulle het in Hotel Verde op die lughawe oornag a.g.v. hulle vroeë vertrektyd vanoggend. (Jy kan nie meer waag om die N2 tussen Somerset-Wes en die lughawe in die donker te ry nie). Hulle het op Struisbaai kom kuier en hul eerste en laaste aande hier by ons deurgebring. Ons het hulle op die lughawe gaan haal en gister weer weggeneem. Hulle het die afgelope 10 dae met Ralie se Honda gery.

Hulle het aangebied dat ons in die toekoms tot in Hoedspruit vlieg waar hulle ons sal kom afhaal. Dan kan ons met ons vriendin se VW T-Cross wildtuin toe gaan. Ek dink dit is 'n aanbod wat ek nie deur my vingers gaan laat glip nie. Dit is net 'n geval van "wanneer".

Jy moet lekker beplan en droom van Mei 2024.

.... die genoemde vriende van ons, alhoewel hulle kampeerders is, bly ook by geleentheid in vaste akkommodasie oor. Hulle het die afgelope week genoem hoedat die vaste akkommodasie agteruit gegaan het. Hoe jammer!

Middag Len

By ons is dit "middag" as kwik bo 25C styg.

Sommer paar idees vir julle oorweging.

1] Vergeet van Joos Becker, laat Willem en ander vir jou veel beter en veiliger plekke aanbeveel. Dit gaan moontlik verder wees na jou vriende, maar dalk 'n beter opsie.

2] Soek jy net staanplek vir jou wa terwyl julle by vriende aanhuis gaan oorbly/slaap. Dalk het iemand in PTA omgewing vir jou wa staanplek.

3] Ek gaan die jaar die helfte van die N1 vermy. Ek gaan van die huis af ry tot by Aldam [~380km] Dan skuif ek aan tot by Riverside Ritchie [350km]. Vandaar tot by KarooNP.  Ten minste sny ek 'n groot deel van enkelbaan N1 uit. Ek gaan van Aldam af, eers yot by Bloemfontein, dan met N8 na Kimberley, en dan verder met N12. Uiteraard sal ek verslag doen oor die roete. 

Gaan jy onderlangs probeer plek kry in Kruger???

Ek en Ralie was tydens die vorige verkiesing in Punda Maria. Ons kon nasionaal gaan stem in Punda se kampong. Ons kon natuurlik nie provinsiaal stem nie.

... met jou gedagtes leef jy in die toekoms in en met jou foto's in die verlede in. 

Dit bly maar lekker om lekker herinneringe op te roep (veral as jy foto's daarvan het) en in jou kop (en hart) uit te sien na iets. Ek kom agter dat jou verlange wildtuin toe is erg.

Len - 'n Mens kan natuurlik nie 'n fout maak met Karoo Nas Park as oornagplek nie. Tops!!!

Jou brekfis-plek by Touwsrivier was vir baie jare ons gereelde stilhouplek wanneer ons vir my skoonmense in die Karoo ('n plaas naby Prins Albertweg) gaan kuier nie. Ek ken nie hulle brekfis nie, maar ek glo jou dat hulle 'n lekker brekfis bedien as dit al vir etlike jare'n voorkeur-brekfisstop vir die Loaders is. Ons het weer vasgehaak by Veldskoen padstal in die Hexvallei wat ons tradisionele eerste stop is - net ver genoeg om 'n ouballie se vol blaas te ledig.

Ons het slegs by twee geleenthede by Reynekepark oorgestaan - beide kere wanneer ons suidwaarts gery het. Persoonlik kon ek nog nie opgewonde raak oor dié park nie, maar dit is oraait. Die eerste keer was hulle só vol dat ons ons sogenaamde privaat-badkamer met 'n vreemde gesin moes deel. Na etlike jare het ons weer daar oorgestaan. Maar ons is die nag wakker gehou deur die voerfabriek (oorkant die N8) se stofafsuigings-siklone - sodanig dat ons die karavaan se dak laat sak het om die irriterende klank te demp. Maar ek verstaan dat dié probleem opgelos is.

Ons normale oorslaapplek na Karoo Nas Park is Aventura Gariep by een van hulle sogenaamde "luukse staanplekke" - met privaat badkamer. En vandaar tot Aldam. Laasgenoemde is niks om oor huistoe te skryf nie, maar vroeër jare het ons gewoonlik by Kroonpark oorgestaan. Hier wil jy egter nie meer oorslaap nie. Die laaste keer wat ons daar gestaan het was een grootskaalse gemors.

Ek sien uit na die res van jou beplanning en is nuuskierig om te verneem wat julle uiteindelik in Pretoria gaan doen t.o.v. julle karavaan.

....by die bekende plekke vir oorslaap langs die N1. Met Gariep kan mens nie verkeerd gaan nie. Onthou die nuwe plek, ook by die damwal----Waschbank. Volgens Johan Lapksag se foto's en resensie, is dit 'n baie netjiese plek.

Wel die jaar gaan ons heelwat nuwe plekke besoek soos, Riverside, Jongensfontein, Rondeberg, Kroon Lodge en Oranjerus. Almal na goeie aanbevelings van staatmaker forumlede.

Klagtes oor Kroonpark op internet is steeds volop, ek sal maar vermy.

Ons het laasjaar met die afry, en terug daar oorgeslaap. Ablusieblok was skoon en in werkende toestand. Boonop het ek veilig gevoel, al was ons stoksielalleen in die woonwapark. 

Len, jou meelewe met jou vertellinge van die wildtuin is aansteeklik, dus, vertel gerus van jou beplanning, ek sien uit na die leesstof.

... maar jy droom lekker Len. Ek sien al daardie plekke wat jy noem in my geestesoog - almal plekke wat ek ook goed ken en soms oor droom (in my dagdrome).

Ek het gister tot my skok agtergekom dat om Hoedspruit toe te vlieg my 'n spreekwoordelike arm en 'n been gaan kos. 'n Retoerkaartjie (per persoon) vanaf Kaapstad gaan my R10 000+ kos - m.a.w. meer as R20 000 vir die twee van ons. Daar vlieg my hoop om van my vriend in Tzaneen se aanbod (om sy een voertuig te gebruik) by die deur uit. Dit blyk dat ons wildtuin-tande is dus getrek, want met die wa sal ons nie weer gaan nie.