Ons 4-maande toer

... die Snomaster in die Hilux laai. Vir alle praktiese doeleindes is die Ou Lady se inhoud alles gelaai - klere en die hele "works". Nog eintlik net ons "toiletries". Die bande is vanoggend gepomp en die Hilux is opgevul met diesel. Die GPS en tru-kamera se monitor is op hul onderskeie plekke op die voorruit vasgemaak. Ten einde dit vinniger en makliker vir Saterdagoggend se vertrek te maak, is slegs die een agterste "steady" uitgedraai.

Môre word die galjoen, wat Saterdagaand saam met die Tzaneeners in Hartenbos gebraai word, gevlek en klaar gesout. En dan sit ons maar die vertrektyd en afwag.

Die Hilux lyk agterin soos 'n bakkie wat op pad is iewers in Afrika in. Gelaai tot bykans teen die dak.

Ek waardeer julle veilige reis- en lekker kuier wense. Ek hoop om môre teen hierdie tyd klaar gehaak te wees ten einde min of meer 08:00 weg te trek. Hierdie dag sal seker maar stadig verbygaan, maar ek is dankbaar dat bykans alle pakwerk is afgehandel.

Die beplanning is om môre by Ou Meul in Riviersonderend ontbyt te eet en 'n lekker vars brood te koop om saam met môre-aand se galjoenbraai te nuttig. Vis en brood (veral met appelkooskonfyt) loop mos hand aan hand - veral as dit nog vroulief se tuisgemaakte appelkooskonfyt is.

Gewoonlik is ons volgende stop by Heidelberg se Wimpy vir koffie. Maar met die oumens-regterboud wat my so opkeil, mag daar dalk meer stoppe tussenin wees om net die bene te rek. Ons het mos baie tyd tot ons beskikking - dus waarom die haas. Môre se skof is net meer as 340km.

Ai, vannag sleg geslaap met 'n nuwe stukkie ipekonders - 'n borspyn wat my alte bewus maak dat die ou lyf nie meer die van 'n jongman is nie. Dalk té beter dat ek nou hierdie lang trip onderneem. Jy weet nie wat voorlê t.o.v. gesondheid nie.

... die afskopdag vir ons lang vakansie aan. Die wekker-radio het ons 05:30 wakker gemaak, maar nog nie heeltemal daarin geslaag nie. Gevolglik sit ek eers met 'n lekker groot beker koffie en  lees bietjie Netwerk24 totdat al die stywe gewrigte ook wakker is voordat ek my huisstort vir die laaste keer in 4 maande gebruik. Dan gou die paar koue goedjies in die Coleman pak, die enkele "steady" wat die wa stabiel hou opdraai en dan die N2 wat voorlê Hartenbos toe. Ek sal poog om sover moontlik my forummaters op hoogte te hou.

... om 'n lekker stil N2 te hê - seker maar omdat dit Saterdag is. Ons was té vroeg in Riviersonderend om al honger te wees. Ek het toe net 'n lekker vars "seed loaf" by Ou Meul bakkery gekoop vir vanaand se galjoenbraai. Toe maar deurgedruk tot Heidelberg waar ons gou 'n Wimpy brekfis geniet.

... was 12:30 hier in Hartenbos. Ons is opgeslaan en ingerig. Maar my mens - dit is 'n miernes van bedrywigheid hier met die skoolvakansie. Môre en oormôre vertrek die meerderheid en dan sal dit hopelik 'n bietjie stiller raak. 'n Klomp aangename jongmense regoor my maak tans musiek vir al hulle bure - gelukkig nie slegte musiek nie, maar nogtans.

Hieronder vertrek ons vanoggend by die huis.

Ons staanplek.

Ons uitsig voor ons stoeptent.

Koelerig hier sedert die son gesak het.