Die Smalle se Desember 2022 toer

Wat kos 'n staanplek nou daar, dalk moet ek maar volgende jaar daar langs jou insleep.

Besprekings vir Desember maak 1 Desember die vorige jaar om 08:00 oop en werk op ‘n wie kom eerste basis per e-pos. Dis duur in Desember ook, as ek reg onthou het dit my R1090/aand gekos die jaar. Julle afgetredenes kan mos lekker buite seisoen kom, dan is dit baie goedkoper. 

Ek wonder wat kos dit om ‘n huis te huur die tyd van die jaar met so uitsig van die braaiplek af. 

Dis maar hoe dit werk in SA. Ons werkendes wat bou aan die nasie en toekomstige welvaart skeppers grootmaak word gestraf. Hulle weet ons kan nie die R300/aand buite seisoen tariewe benut nie. Onthou egter ook hoe leeg die (reeds baie klein) oord was toe julle hier was in April. Die oorde moet hulle inkomste maak tydens die besige seisoen. Almal se geliefde Hartenbos hier anderkant is maar net so duur binne seisoen.

Ons het oornag 15mm reën gehad maar alles het droog gebly binne die wa en tent. Kara was vroeg wakker en wou gaan fiets ry, so ons het. Toe ons terugkom wou Chris gaan, en ons het. Toe eet ek muesli en sê vir Salomien ons moet gaan stap. Die arme vrou werk steeds omtrent heeltyd wat die krag aan is. Gister was daar ‘n Eskom fout, en was die krag die hele dag af tot omtrent 15:00. Dit was ook meestal bewolk, en die tweede battery in die kar waarvan die Engel vrieskas loop het nie genoeg gelaai nie.
 

Gelukkig het ek deur Vrydagaand toe dit so gereën het daaraan gedink, en ‘n blink plan gekry. Die Kavango het ‘n Brad Harrison prop op die A-raam, vir as jy sy batterye van die sleepvoertuig af wil laai. Toe die krag gistermiddag aankom, het ek die BH prop op die WRND laaier se invoer geskuif van sonkrag na primêre battery. Aangesien die Kanvango se laaier die batterye teen 14,2A laai, “sien” die WRND laaier dit asof die kar se battery van die alternator af laai, en laai dit die tweede battery ook. So kon ek die Kavango se batterye en die tweede battery in die kar vol gelaai kry voor daar weer beurtkrag was. 
 

Terug na vandag; ek en Salomien het deur die ou deel van die buurt Wes van die karavaanpark gestap. Chris het saam gery met sy fiets. Kara het agtergebly saam met ‘n baie oulike 11-jarige meisie van Nelspruit wat te pragtig met die kleintjies speel. Later is ek met ons twee kinders en ‘n maatjie wat Chris gemaak het strand toe. Hulle het hulself omtrent vol sand gespeel voor middagete. Soveel so dat Kara ‘n gat in haar swembroek geskuur het op die sand. Die sloot wat die stormwater op die strand oopgespoel het met sy steil wande is ‘n heerlike speelplek. 
 

Ons het dus daarna gou Grootbrak toe gery om te kyk of die Pep daar nog oop is. Dit was gelukkig, en sy het ‘n nuwe swembroek gekry. Ons het ook ‘n paar goedjies by die PnP langsaan gekoop. Grootbrak lyk na ‘n interessante dorpie, maar by daardie deel is daar baie bedelaars en dronkies. Vir die wat nog nie daar was nie, die Grashopper fabriek is terloops ook daar. 
 

Terug by die oord het ons middagete gemaak en daarna bietjie ontspan voor ons 16:00 weer met die kinders strand toe is, en lekker gespeel het. Ek gaan binnekort die vuur aansteek om ‘n jalapeño worsie te braai vir my en Salomien. 
 

Die oord is intussen vol. Die mense wat vandag eers ingekom het, het dit doelbewus gedoen om die reën te vermy. Die gesin reg agter ons se kinders het vanmiddag saam gespeel op die strand, en sê hulle is 03:00 vanoggend weg uit die Kaap uit. Hulle het ‘n CY registrasienommer. 

Nogal vêr van Nelspruit af Dwarswegstrand toe vir 'n seevakansie. Ek wonder waarom daardie mense nie eerder Mosambiek- oorde besoek nie. 

Toe ons die 11-jarige van Nelspruit wat so oulik met die kleintjies speel se ouers komplimenteer op hulle oulike spruit, sê hulle sy wil elke jaar hierheen kom juis daarvoor.
 

Dwarswegstrand is ons tipe oord ook. Ek en Salomien gesels weer gisteraand daaroor. Dis nie ‘n partytjieplek nie. Hier is twee groter groepe wat lekker kuier, maar dis saam eet en gesels - nie musiek speel en lawaai nie. Die enigste lawaai is die see.
 

Ek sal later weer ‘n opname doen van registrasienommers, maar ek weet hier is vier CW, ‘n klompie CY en CF, en ten minste een NC, MP en GP elk. Ek hoop nou net ons is volgende jaar weer een van die CW registrasienommers, hetsy dit die Everest of Prado is. Ek het vir die tweede blok aansoek gedoen van 27 Desember en twee dae aangelas tot 8 Januarie, aangesien dit dieselfde hoeveelheid verlofdae gaan kos as die eerste blok, en ek die indruk gekry het dat die weer beter is dan as in die eerste blok. 

As ek lees hoe jou vrou steeds sit en werk, kan die 2de blok haar dalk beter pas. Sy moet dan net nie 'n klomp werk voor Kersfees inneem nie.

Dit was ook ‘n oorweging.  

Vanoggend was dit bewolk en koel en later het dit gereën na ek en Kara gaan fiets ry het. Toe speel ons kaart en ander speletjies in die tent. Toe die krag afgaan 12:00 en Salomien nie meer kon werk nie is ons George toe om ‘n pakkie vir my suster te stuur en ‘n paar meestal onnodige aankope te doen.
 

Ons was 15:00 weer terug, en toe het ek kampwerkies gedoen en met ‘n buurman gesels terwyl Salomien weer gewerk het en die kinders gespeel het. Dit was koelerig en ons was nie op die strand vandag nie. 
 

Ek het ‘n lekker vuur gemaak en ons het groente (hoender sosaties) gebraai en lekker gesels. Dit was nie so onderstebo as op die foto nie.

 

Alhoewel hier ‘n baie netjiese opwasplek is, het ek gister besluit om by ons braaiplek op te was. Dit was een van die min kere wat ek dit geniet het om skottelgoed te was. 
 

Weer gereën deur die nag maar vanoggend het die son aanvanklik geskyn. Ek en Kara het gaan fiets ry, en toe ons later strand toe wou gaan was daar weer motreën vir ‘n wyle. Ek en die kinders is egter strand toe, het lekker krieket gespeel en toe in die see tot 12:00. Toe terug kamp toe, geëet en verder in die oord vertoef. Ek en Salomien het gaan stap, en die kinders gespeel. Later vanmiddag het dit koel geraak, soveel so dat ek ‘n sweetpakbroek en baadjie aan het. In Desember. Dit het weer gemotreën laat vanmiddag en ek moes met ‘n sambreel braai. Maar mooi bly mooi.