Dwarswegstrand bly maar lekker

Hier is net oor Desember lewensredders, maar ons kinders speel nog net in die vlak water en op die strand. Gister was ‘n prentjiemooi dag, aanvanklik bedompig maar later het ‘n aangename briesie begin waai. Hier is die uitsig van ons stoep af op nr 29. Ons sien die keer gereeld dolfyne.

So van 15:00 af het die wolke opgesteek, maar dit was steeds aangenaam op die strand. Daar het heelwat bloublasies en ‘n jellievis uitgespoel en ek het lekker fotos geneem terwyl die kinders heerlik speel.

Die omie en tannie op 23 is gister vroeg weg. Kort daarna stop die gholfkarretjie, sny die gras en rante om die plaveisel en vee dit mooi skoon. Toe is dit netjies vir die volgende intrekkers, ‘n jong gesin wat gisteroggend 02:00 gery het uit Kimberley.

Die afgterede paar in die Mobilodge op nr 30 langs ons (sigbaar in die aftergrond op die foto) toer al van 2019 af met die kombinasie (hulle sleep met ‘n Mahindra Karoo 4x4 auto).  Hulle het al 110 000km afgelê en staan al van middel Januarie af hier. Hy sê die Mobilodge sleep stabiel, en hy kry so tussen 7,2 en 7,8km per liter as hy sleep. Die 2.2 enjin trek bietjie swaar teen opdraendes maar plat paaie loop dit lekker. Hy sê afgesien van ‘n voorste hub wat onder waarborg geseize het, het hy nog nie probleme gehad nie. 
 

Hulle slaapkamer kyk wel Wes, maar dit kan moontlik vir privaatheid wees wat hulle die skadunette opgesit het?

Daar was deur die nag van 22 Maart donderweer, en die wind het opgesteek maar die storm is oor die see verby sonder reën. Gisteroggend het dit liggies gereën, maar dit was op die ou end ‘n lekker dag. Hier en daar ‘n paar druppels, maar oorwegend droog. Ons het fiets gery, speletjies gespeel, op die strand gestap en gespeel en moes toe SPAR toe, want ons het nie betyds ys gekoop voor die oord se winkeltjie 12:00 toegemaak het nie. 
 

Dit was so om en by 14:00, en was ‘n gelukkige ongeluk. Toe ons by die spoor oorgang naby die strandmeer kom, staan daar ‘n stoomtrein. Ons draai om en gaan parkeer en klim uit langs die trein. Skaars 15min later vertrek die trein Hartenbos toe, en kan die kinders dit ervaar, en sien hoe plat die trein ‘n R2 muntstuk wat op die spoor geplaas is trap. 
 

Ons het toe ons terug is gaan krieket speel op die strand, en is so 18:00 terug staanplek toe. Ons blou gazebo is op die foto hier onder wat van die strand af geneem is.

Die weervoorspelling het gewys dit gaan 0,2mm reën 17:00 en later die aand nog 1mm. Dit het eers skuins na 18:00 begin reën, en ek het met ‘n sambreel gestaan en braai. Die donderweer het opgesteek, en toe het dit al hoe harder gereën tot net na ons 22:00 gaan lê het om te lees voor ons gaan slaap het. Volgens die reënmeter naby ontvangs het dit bietjie meer as 10 keer die voorspelde volume gereën - 13mm. 
 

Die geseelde kappie van die Ranger het die toets deurstaan, en afgesien van die water wat langs die grondseil gemigreer het onder ons afdak in (die voorste paneel van die voltent is nie op nie) was ons kampie darem droog. Ons bure wat nou oppak om hulle ou CI Sprite terug Brackenfell toe te sleep met hulle Nissan Quasqai was lyk my nie so gelukkig nie.

Dis nooit lekker om nat op te pak nie, maar ek glo hulle het ‘n lekker langnaweek gehad. 
 

Ons sien verskriklik baie dolfyne, en hulle vermaak ons omtrent regdeur die dae. Hier is skermskote wat ek uit selfoon video’s geneem het. 
 

Ek gebruik Windy op my foon, maar soos ek hierbo vertel het is hulle voorspelling van reën nie altyd so akkuraat nie. Op YouTube is daar ordentlike weervoorspellings. Ek moes eerder daarna gekyk het. 

So rit met die trein moet ‘n ervaring wees. Die lokomotief en waens is pragtig gerestoureer. Maar vir ons gesin van vier kos dit ‘n hele paar Mandela’s. Ons wil graag die kinders Diaz Waterpark toe vat, en dis reeds R150 pp as mens net die middag van 14:00 af gaan. Dan moet ek ook nog voor 18 April die uitstaande balans van ons Krugerwildtuin bespreking in Junie betaal. Dis amper R5000. Om die trein van naby te sien was ‘n heerlike ervaring en darem gratis. 

Ek verbeel my daai Mobi met Karoo bakkie was ook op dieselfde staanplek.

Dis moontlik, hulle sê hulle was al voorheen hier. 
 

Dis interessant, die soort kampeer toerusting verskil nogal taamlik van Desember. Hier is uit die aard van die saak meer afgetredenes as gesinne, en baie minder boswaens. Afgesien van ons Kavango en die Mobilodge is daar net twee Bushlapa waens en ‘n ander maak wat ek nie ken nie. Dan is hier drie motor homes en drie staanplekke waarop mense met net tente kampeer. Hier is ook drie staan plekke waar mense met sleepwaens met daktente staan. Die res is padkaravane wat wissel van baie oud CI Sprite tot natnuwe Okto dubbel as waens. 

Dit was ‘n perfekte dag. Warm, maar nie ongemaklik nie. Ek en die kinders het heerlik gespeel op ‘n sandbank terwyl Salomien bietjie moes werk op haar skootrekenaar. Toe is ons so 12:40 Mosselbaai toe. Ons moes eers gou by Langeberg Mall stop vir ‘n paar aankope (ek het bv ons fietse se slot op die Ranger se ARB buffer gesit eergister en dit daar vergeet toe ons later SPAR toe ry, so dis weg) en is toe Diaz Waterpark toe. Was dit nou pret! Ons (veral ek en die kinders) het baie lekker gespeel. Ek dink ons gaan almal vroeg omdop vanaand. Oppad terug het ons bietjie verkeer gehad in Mosselbaai (die dorp trek my glad nie na die paar keer wat ons al daar was nie), en ons is bly om weer tuis te wees.

Terwyl ek en die kinders op ‘n sandbank speel sien ek en Kara gelyk die gelukkie raak en ek tel dit net betyds op voor die volgende brandertjie. Dis blykbaar baie skaars om so pansy “dop” op te tel. Dis eintlik die geraamte van ‘n diertjie in die urchin familie.