Ons 4-maande toer

... ja, my seun kán vuurmaak - minstens 3 sakkies op 'n aand. Hy koop rooikrans by lorrie-vragte aan in die Kaap. En ja, ons sal saans lekker om die vuur kuier. Ek moes ook verlede week vir hom gaan bakstene koop het by Built It in Letsitele vir 'n vuurput op die grond.

Nee - hulle durf maar die N12 aan waar dit wegdraai van N1 af in 'n oostelike rigting en later by Witbank by die N4 aansluit. Dit is die pad wat ek ook gewoonlik ry, maar vanjaar was ons eers vir 10 aande by Klein-Kariba en het daarom eers teruggery tot Pretoria en daarvandaan die N4 geneem.

Waarvoor staan die "G"? Grapgat? 

... nee, hy moet dit self hier by my staanplek kom afhaal. Ek het genoeg gespook om dit af te laai en te pak.

Daardie 30 sakkies hout is net vir sy 9 aande hier by Eiland Spa. Hy brand so 3 sakkies per aand.

Sy staanplek is net meer as 200 meter van myne af. Dus sal daar saans groot saamgekuier word. Hy bring o.a. twee galjoene saam en 'n skaapafval. Met beide vang jy my in 'n wip.

... jy's reg met jou aanname. Hulle gaan eers wildtuin toe (juis nou op pad tussen Aldam en Malelane-kamp). Hulle sluit eers op 9 Julie hier by ons aan.

Alhoewel hier nog heelwat staanplekke oop is, is hier heeltemal 'n ander "vibe" by Eiland Spa sedert gister. Kinderstemme is oral te hoor.

Na 'n koeler en bewolkte dag gister, is dit vandag weer 'n tipiese Laeveld-wintersdag - sonskyn en lekker gematigde temperatuur. Die voorspelling vir vandag is 24°.

Ek staan eergister in die karavaan, besig om my hande te was. Ek let toe deur die gaas van die opwipdak 'n glansspreeu wat ongewone gedrag toon. Toe sal ek sien dit is 'n onderonsie tussen die spreeu en 'n slang teen die stam van 'n knoppiesdoring. Toe ek nadergaan om die slang te identifiseer, vlieg die spreeu weg. Ek kon sien dit is 'n gespikkelde bosslang - 'n totaal onskadelike slang, maar wat soms deur mense aangesien word vir 'n boomslang. Ek was verstom om te sien hoedat dié kalant blitsvinnig vertikaal teen die knoppiesdoring se kaal stam uitseil.

... gister bure gekry. Hulle kamp met 'n EXLV Ng'ombo dubbelwiel boskaravaan. Die stoeptent slaan só groot op dat hy die hele breedte van sy staanplek daarvoor benodig. Hulle stoeptent is tot letterlik op my grens. Gelukkig is dit 'n baie aangename paartjie met hul 9-jarige dogtertjie. En die mammie is nogal goed op die oog - ek kla dus nie veel nie.

... kos ook meer as R2m - 'n nuwe LR Defender. Ek het vroeër vir Ralie gesê dat hulle kombinasie meer as R3m kos. Dan skud hierdie pensioearis maar net sy kop.

Die hoop hout is ook syne.

Ek het lanklaas hier gekommunikeer. Maar die een dag is soos die ander - lekker rustig in die somersweer wat ons dag na dag ervaar.

Hier heers tans 'n fantastiese vakansie-atmosfeer by Eiland Spa. Kinders is volop en hul geniet hulself op velerlei maniere. Dit laat ons verlang na die dae toe ons kinders nog jonk was en ons vir vier agtereenvolgende jare gedurende die mid-90's uit die Boland (toe nog woonagtig in Grabouw) vir die volle wintervakansie hier kom kuier het.

Daardie jare het ek al gesê ek wil ook eendag hier kom lankkamp. Sedert 2015 is ons gelukkig om dit elke ongelyke jaartal vir 2-3 maande te kan doen. Die gelyke jare poog ons om by die ver kinders te gaan kuier. Hopelik kan ons 2026 in Roemenië gaan kuier.

Ek het die afgelope 2 weke 'n bietjie drama gehad met 'n debietkaart wat op 31 Julie verval. Ek is maar self skuldig aan die ongerief wat ek gehad het, omdat ek nie aandag aan die vervaldatum gegee het nie. My bank het my in kennis gestel dat my nuwe kaart gereed is om afgehaal te word by Kleinmond-tak. Maar ek voorsien om eers op 7 Augustus tuis te wees - en ek het die kaart nodig vir brandstof- en ander uitgawes vir die reis huistoe.

Dit kos my toe 'n telefoon-oproep na my bank se inbelsentrum. Jy kan mos nie meer direk met 'n tak skakel nie. Verlede Maandag, nadat ek lank moes aanhou om na musiek en advertensies te luister, kom ek uiteindelik by 'n persoon uit wat onderneem om behulpsaam te wees sodat 'n nuwe kaart vir my by Tzaneen-tak afgelewer word. En ek word goed op hoogte gehou per SMS hoe die proses verloop. Maar toe ek uiteindelik die boodskap kry dat my kaart afgelewer is, is dit by Kleinmond-tak afgelewer. Ek het toe maar die afgelope Maandag weer die moed bymekaar geskraap om die frustrerende oproep na die inbelsentrum te maak. Hierdie keer was ek suksesvol en kon ek my nuwe kaart eergister in Tzaneen gaan afhaal. Maar toe ons daar kom, staan daar tientalle mense buite die tak se deur in 'n ry. Na 'n lang proses, wat my geduld tot die uiterste beproef het, is ek uiteindelik daar weg met my nuwe kaart.

Maar die ongerief wat ek sedert verlede Maandag ervaar het was ook 'n frustrasie. My ou kaart, wat nog geldig was tot end-Julie, is toe gekanselleer. Gelukkig was die Hilux vol diesel en het ek darem 'n klompie kontant by my gehad vir dag-tot-dag benodigdhede.

Die les wat ek hieruit geleer het is om op te let na kaarte se vervaldatum wanneer ek vir lang tydperke van die huis af is.

... te slim vir hierdie ouballie. Kan dit ook met 'n debietkaart gedoen word?