Strydoms se SANPARKE toer

... klink vir my na 'n beter opsie.

Verskoon my puristiese neiging. Die Engelse naam was nog altyd "Mountain Zebra National Park", maar die Afrikaans was (en ek glo is steeds) "Bergkwagga Nasionale Park". Maar dit maak nie saak nie, ek weet van watter park jy praat. Amper soos ouens wat praat van "Laer-Sabie" (Engels: "Lower Sabie") terwyl die Afrikaanse naam inderwaarheid "Onder-Sabie" is. Aag, dalk sommer net 'n klomp nuttelose inligting (of noem dit 'twak').

Maar om terug te kom na jou beplanning - dit klink bakgat. Aan watter tyd van die jaar dink jy?

... is ek so 'n bietjie soos 'n uil op 'n kluit wat verdere vakansie-beplanning aanbetref. Ek sal graag só 'n toertjie wil beplan - sommer net omdat vakansie-beplanning so lekker is. Maar ek laat dit maar eers daar.

Oor 5 weke gaan ons saam met vriende Prins Albert toe om o.a. vir hulle Die Hel, oftewel Gamkaskloof, te gaan wys. Andersins is dit maar Jan Tuisbly tot Februarie wanneer ons vir 16 aande by Ebb & Flow gaan kamp. Hierdie spruit nog voort uit ons gekanselleerde Kgalagadi-trippie, van afgelope April, wat in die hek geduik het. Dan lê daar nog ons beplande tentkampding gedurende Mei in die wildtuin voor.

En daar is nog 'n sterk moontlikheid dat my ver kinders ook end-Maart tot vroeg-Junie Suid-Afrika toe kom. En hulle het 'n begeerte om Namibië te besoek. Dus plaas ek enige verdere beplanning op ys.

Maar jy moet jou beplanning geniet Wessel. Ek geniet só-iets moerske baie.

Stem saam met Chris B, opsie drie klink na 'n beter, meer omvattende  "toer".

Mokala is 'n wonderlike park, veral vir julle ouens met boswaens. Terwyl jy nou aan de toer is, moenie waardevolle plekke mis nie.

Ons was menige keer in Mokala. Ek het dié park gewoonlik as oornagplek gebruik toe ek nog gereeld by GWK se saad-afdeling by Modderrivier gaan werk het. Ons het meestal by Mosu Lodge gebly, maar ook enkele kere by Lilydale. Ek het gewoonlik werk en plesier gekombineer deur Ralie saam te neem en vir twee aande oorgebly. Enige spaartydjie tot my beskikking is gebruik om in dié wonderlike park rond te ry.

Die oorspronklike kampterrein was Haak-&-Steek, wat maar baie basies was. Later is die nuwe kampeerterrein, Motswedi, geopen. Alhoewel slegs kampeerders in dié kamp toegelaat is, het ek tóg eenkeer die goedkeuring van die destydse parkhoof, Deon Joubert, gekry om darem daar te gaan inloer.

Jy is reg Wessel - elke kampeerplek het sy eie badkamer en kombuis (met 'n groterige gas-ys/vrieskas). Voor die kamp is 'n kleinerige dam wat dien as suiping vir die wild. Die enigste "heining" is 'n lae geëlektrifiseerde draad (omtrent kniehoogte) om die buffels en renosters uit te hou. Die twee lodges, Mosu en Lilydale, het soortgelyke elektriese drade rondom.

Ek het een aand by Mosu staan en braai met die buffels skaars 30 meter van my af, met slegs daardie lae draad as versperring tussen ons. Dit was maar 'n ongemaklike gevoel met 'n paar van hulle wat my aangestaar het.

Enige persoon wat oor 'n wa beskik wat geskik is vir gruispaaie, MOET hierdie wonderlike park op hulle te-doen lysie hê. En 'n minimum van 2 nagte se oorbly hoort deel van die reisbeplanning te wees - verkieslik langer.

Ek sit tans hier op my foon en tik, maar sal later 'n foto of twee plaas (wat op my rekenaar is). Ek sit eers en rugby kyk.

Wessel, nee, ek was nie daar met 'n padwa nie, die grondpad van so amper 25Km is te rof vir my.

Ons het sooheentoe gery vir 'n dag besoek toe ons by Ritchie, suid van Kimberley, oor gestaan het, daar is pragtige natuurskoon,  en ons het ook sommer gou 'n renoster raak gesien.

Was al daar vir n paar dae met Jurgie, en die park regtig geniet. Die pad was skurf, en ek glo sal maar gereeld van toestand wissel. Niks wat n bakkie en n Kavango nie met gemak sal hanteer nie. Ons gaan dalk oor twee weke vir n aand oorbly. Op pad terug van die Noord Kaap kuier. Jy kan dit maar op die lys sit Wessel, sal nie spyt wees nie.

......dan sou ek dit gedoen het.  My lus vir Mokala hang ver uit, maar met my ou teerpad-waentjie sal dit moet oorstaan tot die toegangspad geteer is  -  en ek weet dit gaan nie in my kampeerleeftyd gebeur nie.

Wessel, my toerkeuse sal ook jou nr. 3 keuse wees, behalwe ek sou nooit so naby aan Addo omdraai en nie ook daar gaan kamp nie.  (Ek weet ChrisB hou nie van die plek nie, maar ek verskil beslis.  Jy sal nooit weet as jy dit nie self beproef nie.) Ek het dit ook iewers genoem dat die olifante in die park geen bedreiging inhou vir karavaan-sleepers nie omdat die hoofkamp by die ingangshek is.  Jy ry dus nie deur die park met jou karavaan/boswa nie.

Ek beskik nie oor die korrekte afstand nie, maar dit is seker minstens 10 km gruispad vanaf Bergkwaggapark se afdraai totdat jy by 'n kort gedeelte teerpad 'n entjie vanaf die ruskamp aansluit. Ek het enkele jare gelede dié pad met die "ou lady" gesleep (nog met die 13" wiele) - en toe het die stuk gruispad amper soos 'n teerpad gery.

Maar vanjaar, toe ons in 'n chalet gebly het, was dié pad maar in 'n vrotterige toestand. En die dag toe ons die park verlaat, het ons in gietende reën gery. Dit was een groot modderspulletjie. Ek was so dankbaar dat ek die "ou lady" nie daaraan blootgestel het nie.

Die meer as 20 km vanaf die N12 na Mokala se hoofhek kan ook van tyd tot tyd maar rof wees - dit is 'n publieke pad. Vanaf die hek tot by Mosu Lodge, waar jy inboek vir Motswedi, is dit net meer as 6 km redelik aanvaarbare gruispad. Die paaie in die park is oor die algemeen "okay", maar kan ook maar haglik wees na reën. Maar soos ek in 'n vorige inset genoem het, sal ek nie hierdie park "skip" as ek 'n boswa sleep nie. Dieselfde geld vir Bergkwagga.

Moet jy mens nou so jaloers maak met jou beplanning? Jy is amper so erg soos Hennie wat elke naweek by my spog hoe lekker hy met doringhout vuur maak terwyl ek met nat wattel spook. Kyk bv die foto wat hy gister vir my stuur:

Jy is amper so erg soos Hennie wat elke naweek by my spog hoe lekker hy met doringhout vuur maak

Is dit ons Hennie Botha van dié forum wat so ongevoelig (lees: 'ongeskik') optree?

Is dit ons Hennie Botha van dié forum wat so ongevoelig (lees: 'ongeskik') optree?

Dit is net hy ja. Ek het vir hom gesê hy moet dit maar geniet voor hy Kaap toe trek.  

Wessel, ek verwar beslis nie die twee wildtuine nie.  Bergkwagga se grensheining is reg langs die teerpad waar jy indraai soos deur ChrisB hierbo uitgewys.  Vandaar is dit ongeveer 10km se grondpad (wat soms baie sleg kan wees) tot voor jy by die ruskamp se hek en die kampeerterrein uitkom.