Wat kom leen mede kampeerders by jou

Al moet ek dit self sê, ek en Colin is redelik georganiseerd en het omtrent 100% van die tyd alles wat mens benodig as jy kamp.  Sommige goedjies gebruik jy omtrent nooit, maar dit is daar vir ingeval.

Dit het al dikwels gebeur dat bure, ewe verleë, sal kom vra of ons nie dit of dat het om vir hulle te leen nie.   Ons vind dit soms baie snaaks dat mense, iets wat hulle nodig gaan hê, nie saamgebring het nie.  Miskien omdat dit meestal klein goedjies is.    Moenie my verkeerd verstaan nie, ons is maar te bly om te help, gee nie in die minste om nie.

So, het mense al dikwels by ons kom leen:

Kurktrekker vir hul wynbottel.  (Al baie keer)
Botteloopmaker vir hul bier (wat nie 'n afdraaidoppie het nie)
Blikoopmaker vir hul blikkieskos
Rasper om kaas te rasper vir die braaibroodjies
'n Pleister vir hul kind se bloeiende knie
Hoofpynpille 
'n Bietjie Sunlight Liquid
Die Besem!   (Al baie keer)
Skoppie en borsel
'n Rooster.  (Baie mense het nog nie geleer dat meeste kampe nie roosters voorsien nie)   
Vuurhoutjies

Ons het ook al vir mense uitgehelp met iets wat hulle dan vervang het na hul by 'n winkel kon uitkom.  Selfs eendag 'n boks tissues vir die kinders se snotneusies.  Ses biere, 'n bottel brandewyn, hout, Blitz.

Ek dink die ou wat die meeste verlig is dat jy kan help, is daai man wat met die toe bottel wyn in sy hand staan.  Een ou wou ons sommer een aand 'n bottel wyn gee vir die leen van die kurktrekker.

VOORTREKKER:Gaan my vestand te bowe as iemand 'n Tent pen hammer by my kom leenl -   dis so goed soos jy staan langs my in die badkamer en vra of jy my tandeborsel kan leen -  ok nou nie heeltemaal dieslfde nie, maar amper daar.... 

SEGEKOK:

Het self ook al baie mense gehelp met die nodige wat agter gebly het of vergete is...

Op Swadini het ek ewe braaf my penne en hammer uitgehaal ...  daai grond was so hard dat ek niks kon regkry nie.  Buurman het toe vir my sy boor gebring (sonder dat ek vra) dankbaar!!    (Dink hy kon nie meer die gekap hanteer nie)
Nou ry ek my eie boor saam  net vir ingeval....

DUSTY: Het self al mense gehelp.  Meestal 'n hamer en 'n graaf. Dit is so maklik om iets te vergeet.
Het self al 'n keer gereedskap geleen om een van my vorige voertuie se sleepstang af te haal wat op die perseel gebuig het.

HARRY DU RANDT:

Besem is wat al die meeste by ons geleen is.
Dan pynpille
"Jumper" kabels, ook n keer of twee.

Die ergste vir my is, die ouers vra nie self nie, stuur altyd die kinders, "my Ma vra of ........."
Kry seker skaam ?

ANDRE SMIT:

Badplaas o Badplaas,

As jy daar gaan kamp vir 'n week of twee, GAAN jy êrens natreen. Op Badplaas reen dit egter nie net nie -- dit sous.

Met die kinners nog op skool het ons 7 Desembers agtermekaar daar gekamp vir meestal 3 weke.

Sommer na die eerste kamp en lesse geleer lyk dit met die opslaanslag soos 'n mynbou inoefening by die Smitjies soos die afleivore gegrawe word.

Dan hier by die 3de, 4de, tiende dag maak die sluise oop en dan sien jy hoe die "Lenies" rondhol vir grawe, hamers, ekstra penne en dan leen jy maar soos wat jy kan.

Tussen 'n paar van ons het ons al 'n hele tent se pale vir 'n makker bymekaargemaak wat sy hooftent se sak pale in Lichtenburg vergeet het. Nie 'n trekkie wat jy gou terugjaag om pale te gaan haal nie.