Wildehont se nuwe ou Ranger

Soos die artikel uit Australië hier onder verduidelik kan die verkoeler kraak en jou die enjin kos. Dit is dus nie uniek aan SA nie. Sover ek verstaan kan dit die outo se ratkas ook laat groet. Ek herinner my dat dit met heelparty van die vroeë modelle (soos myne) gebeur het. Die feit dat dit nog nie met myne gebeur het nie beteken presies net dit het NOG nie gebeur nie - nie dat dit nooit sal gebeur nie.

Wat verbeterde werkverrigting betref kon ek nie meer bewys kry as dat eienaars gevoel het die throttle response was beter na die tyd nie. Dis egter nie waarom ek dit laat doen nie. Ek wil nie ‘n enjin of rstkas vervang nie.

Die EGR en sy verkoeler is omseil en die cat is uit. Die sagteware is aangepas sodat bg nie moeilikheid maak met die bakkie se brein nie, en die bakkie is gediens. Amper 10l sintetiese olie en al die filters.
 

R8000 later voel dit of die Ranger se keel lekker skoongemaak is, en dit trek definitief beter. Toe ek saam met Pierre Nolte vir ‘n toets rit gaan het hy die BFG AT bande laat skreeu op wegtrek. Nou gaan ek lekker sleep! Ek hoop die brandstofverbruik neem ook effens af. 

Ek verlaat my op Pierre Nolte se ervaring. Rangers is baie meer gewild as Hilux hier, so hy werk al lank aan baie Rangers en ken die bakkies goed. Hy het self ‘n 3.2 gehad en het nou ‘n nuwe 2l. 

Hy werk al amper tien jaar aan my rygoed, en ek weet hy is eerlik. Hy wys my bv gister wat vra Ford vir ‘n stel GUD filters en wat betaal hy. Lg is wat hy op my faktuur skryf. Vir die omseil van die EGR en uithaal van die cat is sy wins R600, want hy betaal R1200 vir die program wat hy op die Ranger laai. Die werk aan die EGR en cat doen ‘n ander ou en ek betaal hom direk. 

Ek aanvaar darem nie goedsmoeds wat hy aanbeveel nie. Ek het eers baie opgelees op die 4x4community forum en op Aussie en VSA Ranger forums en almal is dit eens dat die EGR op die Ranger nie net duur skade kan veroorsaak nie, maar ongesond is vir die enjin itv opbou van roet en minder effektiewe werkverrigting. Dit het my R5000 gekos om dit te laat omseil, en dis baie goedkoper as ‘n nuwe ratkas of enjin. Die ekstra poeier is ‘n bonus, en dalk verbeter brandstofverbruik maar ek twyfel.

Toe hulle laas in Worcester was en die kappie wou seel het Salomien die Ranger geleen om te gaan foto’s neem in Hermanus. Hierdie week was die Ranger van Dinsdagaand tot gister uit diens, so die kappie is nog nie geseel nie. 

Wessel, ek dink die risiko dat die EGR se verkoeler kan kraak en lei tot ‘n oorverhitte enjin of ratkas is weens ‘n ontwerpfout op die T6 Ranger (my model se reeks). Ek glo nie Toyota het dieselfde risiko nie.
 

Onthou die EGR is ‘n ou konsep, en dit word vereis om aan emissie standaarde te voldoen. Dit beïnvloed ongelukkig werkverrigting negatief, want die lug wat in die enjin ingaan bevat ‘n sekere hoeveelheid vuil uitlaat gas. Pierre het gister vir my gesê daar is ‘n Hilux by hom waarvan die inlaat aangepak is met roet vanwee die EGR. Hy het ook gesê my Ranger sal reeds na 100000km ook aangepak wees. 

R5000/R21,28 ‘n liter diesel (wat ek vanoggend betaal het) = 235 liter diesel. Dus minder as 2000 km teen my verbruik. Is dit werklik so duur? Nee. Ek het net nie begroot daarvoor nie. 

Ek was gister by die installeerder. Jong outjie sê vir my dit gaan net so 10 minute vat oom. Ek was egter amper ‘n uur daar. Hy het herhaaldelik met ‘n tuinslang teen die kantvensters gespuit elke keer na hy met silicon aan die binnekant geseel het. Toe hy klaar is sê hy jammer dit het so lank gevat oom, ek moes alles af trek en oordoen. Lyk my die fabriek was laks. Hulle moes dit getoets het vir waterdigtheid. Die knaap wat dit Desember geïnstalleer het (‘n ander een as gister) moes ook. Na werk het ek agter in geklim en Salomien lank laat reën maak met die tuinslang. Dit lyk darem asof dit nou nie meer lek nie. 
 

Hier stuif nou wat die plaaslike mense stoffies noem buite neer. So die kappie is net betyds geseel. 

Dit het vroeg vanoggend sommer lekker gereën hier in Worcester. Ek glo nie die boere sal te opgewonde wees nie, hulle is nog besig om te oes en wil nie nou reën hê op die druiwe nie. 
 

Dit was egter ‘n deeglike toets vir die waterdigtheid van die Ranger se kappie wat dit met vlieënde vaandels geslaag het. Dit was kurkdroog in die bak vanoggend. 

Januarie oppad terug van Dwarswegstrand af het ons amper die hele ent tussen Albertinia en Swellendam in die reën gery. Toe ons tuiskom was dit kurkdroog agter in die kappie. Die kappie het twee Mueller vents ingebou in die dak om dit onder positiewe druk te hou, en dis waarskynlik hoekom dit nie toe gelek het nie. 
 

Die vensters is in gesinkte rame ingebou in die twee kant deure van die kappie. Sodoende is dit mooi flush met die deur en die res van die kappie. As dit egter nie ordentlik geseel is om die vensters nie, loop die water in by die rante van die rame, en dan in die raam van die kant deur in, wat ‘n lip rondom het aan die binnekant. Van daar af loop dit na die laagste punt in die bak toe. Omdat die Ranger se agterent gelig is, loop dit teen die voorste hoeke van die binnekant van die bak af en gaan lê in die hoeke. Of altans dit het. Hier is ‘n foto of twee van die venster om te illustreer. 
 

Die 3.2 is baie dors tot dit op spoed kom. Met die outomatiese ratkas en ekstra gewig van die ekstras moet dit te wagte wees, maar dis nie ‘n dorpskar nie. In die week na die laaste volmaak 23 Feb het ek net hier in Worcester gepoer-poer skool toe, werk toe en terug, en die gemiddelde verbruik volgens die rekenaartjie het geklim tot 15l/100km. Gister is ons Op-die-berg toe vir die kinders se krieket. Dit sluit Mitchell’s pas en Gydo pas in. Toe ek by die huis stop het die gemiddelde verbruik sedert die laaste volmaak gesak na 12,3l/100km. 
 

Dit klink dalk of ek kla, dis nie die geval nie. Mens moet jou eintlik afvee aan brandstofverbruik of ‘n meer ekonomiese ryding koop. Maar ‘n dubbelkajuit bakkie is handig. Ek moet myself net sover kry om die Prado te verkoop, maar ek kan nog nie. En met die dat die Ranger so dors is raak dit nie makliker nie. Op die langpad, selfs met sleep is die Ranger egter baie meer ekonomies.