Ons 4-maande toer

Ek is 'n dag agter met terugvoering, maar nietemin. Soos Wessel hierbo genoem het, gaan ons vakansie voort. My kardioloog-afspraak het relatief goed afgeloop. Die sonar het aangetoon dat die hart op die oog af nog goed voorkom. Die rede vir die ongemaklike gevoel op die bors word toegeskryf aan inflammasie van die hartvlies waarvoor ek medikasie ontvang. Daar is egter 'n redelike mate van kommer oor die atriale fibrilasie (AF) wat ek ervaar. Ek is op 'n "sterker" bloedverdunner geplaas wat ek eers 'n maand moet gebruik voordat verdere besluite geneem sal word. Die kardioloog in Mosselbaai se kamers poog om vir my 'n afspraak met 'n kardioloog in Nelspruit te reël wanneer ek in Krokodilbrug is. Ek is maar net gemaan om dit rustig te vat en nie die wekker te ooreis nie.

Die weer het ons toegelaat om Maandagmiddag rustig en droog te kon oppak. Ek het oorweeg om misbruik te maak van die dokter se aanbeveling en eerder op 'n stoel te gaan sit en kyk hoe Ralie die oppakkery hanteer. Maar dit sou nie werk nie. Dit sou waarskynlik die einde van die vakansie beteken.

Ons is gisteroggend net na 09:00 weg op Hartenbos en het met die Robinsonpas tot Oudtshoorn gery. Watter 'n pragtige natuurskone roete. Na 'n paar inkopies by PnP in Oudtshoorn is ons vort tot De Rust waar ons weer by Ray's Coffee Shop 'n heerlike "brunch" geniet het. Ons het hierdie lekker vriendelike eetplek Oktober "ontdek" toe ons op pad was na die mini-herfsblaresaamtrek in Karoo Nas Park.

Meiringspoort bly vir my keer op keer 'n belewenis. Joe - ek geniet daardie pad.

Ons was om en by 14:00 by die park se hek. Ek kan nie onthou dat ek die park al ooit so mooi groen en welig gesien het nie. Prentjiemooi!!!

Neef het by geleentheid genoem van die brand in die kampeerarea wat my en Wessel se gunsteling staanplek 'n bietjie ontbloot gelaat het. Ons staan nou op No 11 - aan die voorkant van die ablusies. Soos die temperature tans is (sonskyn, maar maksimum 20°C) soek jy eerder 'n bietjie son. Hier is tans heelwat kampeerders, maar ek vermoed dat die park vol sal wees oor die Paasnaweek.

Vandag lê daar eers 'n paar sleurwerkies voor, bv. klerewas alvorens ons heeltemal kan ontspan en 'n bietjie die park gaan verken. Ek verneem leeus ('n mannetjie en 3 wyfies) het eergister 'n eland knap langs die pad, op die middel-plato, platgetrek en gister steeds by die karkas vertoef. Ek hoop ook vir 'n mooi "sighting" of twee terwyl ons hier is.

... ek kon julle die klanke laat hoor. Ons sit hier buite. As ek 'n Karoo-skaapboer was, sou ek seker die horries wou kry, my geweer gryp en in die rigting van die jakkals se getjank wou ry. Maar as 'n dorpsjapie wat hier in die Karoo kamp, is dit té mooi om so, met 'n koue Skotse drankie in die hand, na die boere-kwaadmakers te luister.

... maar jule ouens kyk fyn. Mammie dring aan op die stoeptent se sykante en die "skirting" - of soos Wessel verwys na die onderrok. Ons slaan nooit die voltent op nie - gevolglik is die stoeptent se sykante en "skirting" eintlik "peanuts" om op te slaan.

Dit is maar koelerig in die Karoo - nie dat ek dit nie waardeer nie. Alhoewel my beter-helfte 'n bietjie warmer weer sou verkies. Haar ou "live saver"tjie is darem in die karavaan - 'n waaier-verwarmer.

Ons het gou gister van die sleurtakies afgehandel - 'n paar stukkies klere gewas en 'n paar noodsaaklikhede in Beaufort-Wes gaan koop. Tussen die kamp en die hek het ons heelwat wild gesien in die pragtige groen veld - koedoes, bergkwaggas, rooihartbeeste en volstruise.

Die Hilux se banddruk is afgebring na 1.8 Bar vir die gruispaaie wat van vandag af aan die beurt sal kom. Ek's nuuskierig om die res van die veld te sien.

Vanaand bederf ons onsself 'n bietjie deur in die park se restaurant te gaan eet - iets wat ons jare gelede laas gedoen het. Ek hoop hulle het nog hul "Karoo Rack of Lamb" op die spyskaart - dit was destyds 'n wenner.