Ons 4-maande toer

Ons is veilig deur Sodom en Gomorra. Plek-plek baie druk verkeer gehad, maar ons doen gou 'n Spur-burger by die Petroport noord van Pretoria. Ry vandag baie makliker - nog geen reën gehad nie, maar dié wêreld is swaar bewolk.

Ons was 14:00 by ontvangs na 'n relatief gemaklike rit vanaf Weltevrede. Vanoggend se vertrek met die ingangsroete het makliker verloop as gister se aankoms met die swaar reën neerslae. Net nadat ons gisteraand gaan inkruip het, het die reën sommer weer hard afgekom. Maar vanoggend was daar so hier en daar 'n teken van blou lug. Die 1.8 km grondpad ingang het my nietemin 15 minute geneem tot by die teerpad. Ek is my maar "heilig" met my Ou Lady van 32 jaar oud.

Ons het tot Klein-Kariba nie 'n enkele druppel reën gekry nie. Die oord is nog relatief leeg, maar ek glo dat die mense môre sal instroom - met die addisionele week skoolvakansie wat môre begin.

Ons het 'n lekker staanplek (vooraf ge-allokeer) met 'n sterk stroom water wat oorkant die pad by ons verbyvloei. Ek glo die geluid van lopende water sal my lekker laat slaap. So van sterk-vloeiende water gepraat - die Vaalrivier was 'n gesig om te aanskou by Weltevrede, wat op die oewer van dié rivier geleë is.

Vanaand is die twee oumense sommer lui vir kosmaak. Ek weet nie watter jare gelede ons laas jaffels gemaak het nie. Nietemin - kerrie-maalvleis jaffels is vanaand op die spyskaart.

En Slowstrike - ek weet nie hoe lank gelede jy die gewone pad vanaf die N1 na Bela-Bela gery het nie. Maar die padwerke is klaar en die pad ry soos 'n droom.

Ek reken dat ons beleef nog 'n kort stilte voor die storm. Die Gautengers is op ons vir die week se "skoolvakansie" wat vandag begin. Die karavane kom een na die ander in. Ons moes gou inry dorp toe vir 'n paar inkopies. By die oord se ingangshek is allerhande gazebos opgeslaan vir die verwelkoming.

Die ontvangspersoneel is van die vriendelikste en behulpsaamste wat 'n mens seker kan kry. Ek moes vorms laat uitdruk om in te vul vir my kardioloog-besoek op 14 Mei in Nelspruit. Die e-pos, wat ek vanaf die dokter ontvang het, is gou ge-"forward" na 'n dame by ontvangs - wat op haar beurt die aanhangsels vir my uitgedruk het. Ek moet dit nog invul en hulle sal dit vir my "scan" om aan te stuur vir die kardioloog se kamers. Ek het reeds die goedkeuring by Discovery gekry vir die prosedures wat in Nelspruit MediClinic uitgevoer sal word.

Omrede ek reeds 06:30 op 14 Mei by die hospitaal moet aanmeld, sal ons al die vorige middag uit Krokodilbrug vertrek en slaapplek in Nelspruit kry. Ek sal maar veiligheidshalwe vir 2 nagte akkommodasie bespreek - vir ingeval hulle eers laatmiddag met my klaarkry, of as ek selfs 'n nag in die hospitaal moet bly. Ek voel net jammer vir my arme vrou wat met die ou kranklike man opgeskeep sit. Sy wil nie eens in Kleinmond met die Hilux bestuur nie - wat nog te sê in 'n vreemde Nelspruit. Dalk is Uber maar haar voorland.

Aag, hoe jammer kry ek nou myself.

Ons hoop maar dat alles voorspoedig sal verloop. Ek weet self nie wat die toetse al's behels nie, maar o.a. gaan daar ook 'n angiogram gedoen word. Die vorige angiogram (net meer as 3 jaar gelede) het alles normaal gewys. Ironies was dit uitermatig stadige hartklop (aritmie is die term - as ek reg onthou) wat aanleiding gegee het tot die angiogram. Nou is dit uitermatig vinnige hartklop (en onreëlmatig ) wat aanleiding gee tot my huidige situasie. Lyk my hierdie toestand is maar geneties, want my broer en een suster het dit ook.

... en uitsig vanaf ons "voorstoep" by Klein-Kariba. Té pragtig die njalas wat kort-kort hier om ons "huis" rondloop en wei.

Dit is die hoofpad inderdaad. En die 2 stene was mammie se aanvanklike "ankers" vir haar wasgoedlyntjie wat nou onder 'n no. 7 pen ingehaak is vir stabiliteit. Nee ek kan darem nog my arm ver genoeg rek, maar ek gebruik eerder my stoel se sytafeltjie.

Vanaand besoedel die 2 Bouchers weer die bosveld-lug wanneer 'n Hentiesbaai-kabeljou op die kole val. Ons sal weer môre-aand in die liga van die res van die kampeerders "speel" wanneer ons beplan om 'n skaaptjoppie of twee, saam met boerewors, te braai. Let wel - skaaptjops, nie lamstjops. My slagter op Kleinmond voorsien my van die aller-lekkerste goed ryp-gemaakte 2-tand skaap. Nou reeds 'n Ille de France en Dormer by hom gekoop. Die huidige is Dohne Merino. Almal lekker, maar die Ille de France was nog die wenner - net jammer dit is so skaars.

... as jy 'n Ille de France 2-tand skaap koop nie. Myne het 36 kg geweeg. Dan moet jy genoeg vriesruimte hê. Maar o donkie, lekkerder vleis kan jy beswaarlik kry. 

... 'n ou foutjie het ingesluip - herhaling van 'n vorige plasing.

... dankie vir die regstelling van die Isle de France naam. Watter puik skaapras wat kwaliteit vleis aanbetref!!