Ons 4-maande toer

Ja - dit lyk waarskynlik nie soos gewone "kamp" wat ons hier by Eiland Spa doen nie, maar ...

Eiland is maar 'n stowwerige plek. Jy kamp op kaal grond. Daarom poog jy maar om jou ou plekkie so gemaklik as moontlik in te rig.

Ons gebruik net die stoeptent (met sykante) en 'n gazebo. Die een helfte van die stoeptent word met 'n 95% silwer/grys skadunet (doelgemaak) toegemaak.

Onder die grys grondnet word daar eers plastiek "dropsheet" gelê om te verhoed dat stof en sand deurkom. Die oranje "vloerbedekking" onder die die gazebo is 100% skadunet (amper soos 'n digte grondseil) wat ook geen stof of sand deurlaat nie.

In sekere opsigte moet jy maar hare op jou tande hê om hierdie omstandighede vir 2 maande te verduur. My buurman, woonagtig in Malelane en dus nie 'n permanente karavaanbewoner nie, staan hier vir 6 maande (1 Apr tot 30 Sep). Ek weet nie wat sy rede is nie, maar die oorgrote meerderheid lankstaners is hier om hul permanente woonplekke se winterkoue te ontsnap (ons presiese doel ook). Eiland se slagspreuk is nie verniet "waar dit altyd somer is" nie.

Gevolglik rig jy jouself so gerieflik moontlik in - dit is ons huis vir 2 maande. Die skadunet-omheining (of soos ons daarna verwys - jou "lapa") is om 'n mate van privaatheid in jou "erfie" te verskaf. Sommige mense, veral die werkers, vat kortpaaie en het geen idee van kamp-etiket om nie 'n ander ou se staanplek sy gewone loopplek te maak nie. En veral tydens die komende vakansietyd, wanneer hier hordes kinders op fietse is en hulle deur jou kampplek ry, bied dit darem ietswat van 'n obstruksie.

Ons is nou redelik ge-"settle". Nou begin ons die gewone Eiland-dinge doen soos twakpraat met jou omliggende bure, stap rond, lees, hark blare ens. Van blarehark gepraat - Eiland is mos amper in 'n mopanie-"woud" geleë. Hier's so hier en daar ander bome ook o.a. hardekool, huilboerboon, towerghwarrie en knoppiesdorings. Ek is gewoond aan bykans daagliks mopanieblare bymekaar hark en in die groot seilsakke plaas wat oral in die oord uitgeplaas word. My erf van vanjaar het seker nog die meeste mopanies versus enige vorige staanplekke. Maar die mopanies is vanjaar grasgroen en jy sien bykans nie 'n enkele mopanieblaar op die grond lê nie. Ek glo dit is te danke aan laat somer-reëns. Maar o wee, op die staanplekke weerskante van my is elk 'n groot knoppiesdoring. En kan hulle nou vir jou blare afgooi. Eergisteraand het daar net voor slaaptyd 'n ligte windjie gewaai. Toe die blaartjies val het dit geklink soos reën op die karavaan se dak. Gisteroggend was ons vloer omtrent besaai met knoppiesdoringblare.

Ek het dus vanoggend gepoog om soveel moontlik van die blaartjies bymekaar te hark. Maar met my gewone blarehark ('n standaard item op die inpaklys vir Eiland-vakansies) maak bykans nie hond haaraf met die klein blaartjies nie. Ek sien die manne gebruik sulke klein herlaaibare blareblasers vir dié doel. Die buurman het gesien hoe ek sukkel en toe sy blaser aangebied. Dit is ook nou op my inkopielys wanneer ons volgende week Tzaneen toe gaan.

Dit is somermaande se ding - nie hierdie tyd van die jaar nie.

En wat die bladers aanbetref verpes ek ook eintlik die goed want sommige ouballies misbruik die goed. Ons vee die grondnette met 'n gewone besem. Die blaser is vir die magdom blare wat die res van jou staanplek vol lê en môre weer op jou grondnette lê.

Ons spuit maar almal eers liggies nat voordat ons hetsy hark of blaas om nie stof te maak nie.

Sommer net 'n paar foto's wat op verskillende plekke hier in die kampeerterrein geneem is. Op sommiges kan mens sien dat baie mense kom nie kamp in die ware sin van die woord nie - hulle kom tydelike huis opsit. Die karavaan is maar net die slaapkamer. Hier word selfs tuin gemaak.

... dit is nie elkeen se cup-of-tea nie, maar hier is 'n onbeskryflike gevoel van samehorigheid tussen die klomp "inwoners". Al ken jy dalk nie 'n enkele ander persoon hier in die oord nie - almal groet mekaar asof hul ou kennisse is. Met ons stappery deur die kamp gister, het ons 'n paar ou kennisse van jare gelede raakgeloop. Alhoewel ons 4 jaar gelede laas hier was, voel dit amper (spreekwoordelik) of mekaar gister nog gesien het.

Dit is ons 5de keer dat ons hier kom lank kamp - 2 - 3 maande. Ons het sedert 2015 elke ongelyke jaar hiernatoe gekom tot 2021. Die tussenin-jare het ons gewoonlik vir die ver kinders gaan kuier. Maar in 2023 het ons ook vir die ver kinders gaan kuier, met die gevolg dat ons een jaar oorgeslaan het. Noudat ons weer hier is, wens ek dit is ons nog 'n keer (of meer) beskore om in hierdie fantastiese oord te kom oorwinter.

Vandag is sommer weer net 'n lekker rustige dag. YR voorspel vir ons sonskyn, geen wind en 26°C. Wie weet, dalk gaan maak die ou tog later 'n dip in die warm water.

Gisteraand was daar 'n Kleinmond Superspar chicken espetada saam met Lebombo Slaghuis, Komatipoort, se boerewors op die spyskaart. Vanaand is dit my laaste skaaptjops wat ek saamgebring het. Dit beteken dat daar volgende week (dalk Dinsdag) beslis vleis aangevul moet word wanneer ons Tzaneen (68 km van hier) toe gaan.

Dit is nog 'n pragdag hier tussen die mopaniebome by Eiland Spa. Ek wens ek kon nou 'n klankgreep hier plaas van die mooi voëlgeluide wat ons vermaak - tans hoofsaaklik glansspreeus. Maar om vanoggend nog in die bed te kon lê en luister na 'n neushoringvoël wat klink soos 'n ou kar wat sukkel om te "start" en uiteindelik aan die gang kom - watter voorreg.

Ek het vanoggend iets gedoen wat ek jare laas gedoen het - 'n kerkdiens bygewoon in die grootsaal. En die klomp gryskoppe het die saal volgepak - ek was verstom. Die diens is gelei deur Dr Isak Burger, voormalige hoof van die AGS. Ek moet erken dat dit vir my lekker was om 'n slag in die kerk te kom. Ek en Ralie het mos vir etlike jare 'n interdenominale sangbediening gehad en dit was lekker om die liedere wat gesing was (almal bekendes) uit volle bors weer saam te sing.

Ons sal die res van hierdie warm dag net rustig wees. Môre lê hef-aan voor om die Hilux te was en veral binne-in van die wildtuin-stof ontslae te raak. Ek beplan om Dinsdag Tzaneen toe te ry en wil darem nie langer met die vuil voertuig ry nie. Ek sal eers na die was die voertuig-oortreksel oortrek. Ongelukkig het die glansspeeus geen respek vir jou voertuig nie.

Vanaand is weer vis-aand - maar die bevrore vis is ongelukkig kapoet. Gevolglik bak die ouballie weer viskoekies wat saam met kapok-aartappels en ertjies geniet word.

Ek het die afleiding gemaak dat hy ook tans met vakansie by Eiland Spa is, want hy het verwys na verlede Sondag se diens en sy dogter wat die week na volgende week by hulle aansluit. Ek weet egter nie of hy kamp nie.

Nee Wessel - daardie seisoen in ons lewens is verby. Ek weet nie of Ralie nog weet hoe om haar klawerbord aan te skakel nie. En buitendien het my seun omtrent al my klanktoerusting al na sy huis toe karwei. Maar ons dink met groot verlange en nostalgie terug na daardie sowat 15 jaar.

Ons kry warm hier by Eiland. YR voorspel 31° vir vandag. Maar môre val die temperatuur tot 22° en vir die res van die week wys dit lae tot mid 20's.

Gevolglik het ek reeds vroegoggend die Hilux gewas en die binneruim so goed moontlik ontstof van die wildtuinstof. Ek kan nie met só 'n vuil voertuig môre die dorp aandurf nie. Die Hilux staan nou in sy "garage" - toegetrek met 'n voertuig-oortreksel.

Vandag sal die "aircon" weer sy bydrae moet lewer om die temperature meer gebruikers-vriendelik te maak.

Hier is vanaand (soos elke Maandagaand buite die skoolvakansie) 'n bring en braai waar pap en sous verskaf word. Maar dit begin reeds om 17:00 - wat heeltemal te vroeg is vir aandete vir ons en ek hou ook nie van stywepap nie. Maar jy vang my in 'n wip met krummelpap. Buitendien is ons ook nie "tropdiere" nie. Daarom word daar vanaand weer mac&cheese gemaak.

As daar nou ooit vir my 'n sleurwerk was, of is, is dit om kar te was. Tuis is dit my tuiningenieur se werk. Maar as jy vir 'n maand op die wildtuin se gruispaaie gery het, en jou voertuig staan onder bome waar die voëls geen maniere ken nie, is jy maar verplig om soms jou luiheid te laat staan en self die takie uit te voer. By my huis sny ek eerder gras as om voertuie te was. 'n Vriend van my is weer die teenoorgestelde. Hy weier om sy hand aan 'n grassnyer te slaan, maar sal sy en sy vrou se karre tweekeer per week was.

Ek is ook nie lief vir 'n oortreksel oor my voertuig nie. Maar hier by Eiland sukkel jy om 'n staanplek, wat nie deels onder 'n boom (lees: speeus se holle) is nie, te kry. Ek het vanoggend gesukkel om hulle mis afgewas te kry. Ek wonder of hulle dalk boomgom eet.