Goedkoop kamptoilet vir mans

Ek slaap miskien een uit elke 200 nagte deur sonder dat ek moet opstaan om water af te slaan, en wanneer mens kampeer is jy mos maar geneig om ietsie te vat terwyl jy braai en so.
Tensy jy 'n karavaan met 'n en suite het (ek het net 'n Venter Bush Baby met 'n tent op sy dak) moet jy dan in die middel van die nag opstaan (en afklim in my geval) en ooprits (nie net jou gulp nie) om jouself te verlig. As jy boonop 'n entjie van die naaste ablusie is moet jy nog heen en weer stap ook. Teen daardie tyd is ek (en dalk een of meer van my mede tentbewoners) wawyd wakker en sukkel om weer aan die slaap te raak.

Ek het verlede jaar vir my die goedkoop kampkrip op die foto hier onder gemaak. Ek maak voor slaaptyd die tregter met 'n kabelbinder vas langs my bed aan die raam van my sleepwa, en dan rol ek net op my sy en laat waai wanneer die natuur roep. Die bottel staan buite my tent onder die sleepwa buite ander se sig agter 'n wiel, en ek maak dit in die oggend leeg en spoel alles uit met water. Werk soos 'n bom.