Len se stilte is nou finaal

Stadig maar seker is Annatjie besig om te herstel.  Vandag is die 85ste dag wat sy aaneen in die hospitaal is, waarvan 40 dae in ICU.  Sy is 10 dae gelede uit Panorama Hospitaal per ambulaans oorgeplaas na Cape View Rehabilitasie Hospitaal in N1-Stad, Goodwood om te leer om weer te loop en selfstandig te funksioneer.  Die eerste 10 dae in die rehabilitasie-hospitaal is agter die rug en min of meer nog twee weke is nodig waarna sy huis toe sal kan gaan.

Sy het net na Kersfees 'n aar-omleiding operasie in haar linkerbeen ondergaan om bloedvloei na haar voet wat geblokkeer was, te herstel. Komplikasies het ingetree en twee verdere operasies was nodig om die omleiding reg te stel. Haar niere het toe ingegee as gevolg van 'n hart-defek wat nie genoeg bloed na die niere gepomp het nie.  Sy het vir twee weke nier-dialiese ontvang waarna die niere weer redelik normaal begin funksioneer het.  Dit alles het weer tot gevolg gehad dat vog in haar liggaam opgebou het en haar longe kon dit nie hanteer nie. Suurstof onder druk is toe deur haar neus ingeforseer om suurstof te verskaf en die vog af, weg van die longe af te dryf. Na drie weke het haar longe weer genoeg suurstof verskaf en suurstof-toediening is gestaak. Haar blaas het ophou funksioneer en kon nie van die groot hoeveelheid vog ontslae raak nie.  Sy het toe 'n permanente kateter deur haar buikwand gekry wat haar blaas ledig hou As gevolg van die langdurige hospitalisasie veral in ICU, het sy ICU-sindroom opgedoen en was vir 'n lang tydperk heeltemal deurmekaar. Sy is toe oorgeplaas na 'n gewone saal waar die verwardheid stelselmatig verdwyn het. Haar laaste probleem was 'n skielike, geweldige swelling van haar regterknie. 'n Ortopeed se hulp is ingeroep en hy het vermoed daar is vog wat opgebou het in die knie wat geweldige pyn veroorsaak het.  Die ortopeed wou die vog dreineer, maar in plaas van vog te dreineer toe dreineer suiwer bloed uit haar knie. Die oorsaak hiervan was te sterk bloedverdunner wat toegepas is omdat daar vir bloedklonte gevrees is. Bloedverdunning medikasie is onmiddellik gestaak vir 10 dae waarna weer met 'n ligter dosis bloed verdunner begin sal word. Haar mediese span het bestaan uit 3 vaskulêre chirurge, 2 longspesialiste, 'n nierspesialis, 'n kardioloog, 'n uroloog en 'n ortopeed. Nie een van hierdie spesialiste het 'n verklaring vir die skielike herstel van die longe (sonder 'n behoefte aan suurstof-toediening), die niere en al die ander mediese probleme nie.

Voorwaar 'n wonderwerk !  Baie dankie aan al ons kampmaters se belangstelling, gebede en boodskappe.

.............dat ek (en ook Annatjie wat vir die tweede keer in een maand weer in die hospitaal se ICU lê), moet groet.  Die skrif is eintlik lankal aan die muur dat ons ons leefstyl sal moet aanpas en daardie oomblik het nou aangebreek.

Ons huis is in die mark en ons het reeds 'n aanbod gemaak op 'n huis in 'n aftree-oord in Durbanville (nie ver van ons huidige huis nie) met 'n privaat siekeboegkamer in die oord vir Annatjie se versorging.  Alles is gereed om die Exclusive (met alle inhoud daarin) te verkoop en waarna my ou geliefde Pathfinder ook verkoop gaan word.  Omstandighede noop nou daadwerklike, praktiese op trede en dit is waarmee ons nou besig is.

Vir oulaas, baie dankie vir die hegte vriendskappe wat oor jare gesmee is en al die baie boodsappe en ondersteuning met Annatjie se siekte.

Wees gegroet !