November saampraat

Nadat ons gisteraand tot laat buite op ons stoepie gesit het met 'n glasie of twee wyn - die fantastiese windstil, amper warm aand geniet het - is ons weer die eerste keer sedert ons Sondag hier aangekom het, vandag minder aangenaam. Steeds lekker, maar 'n lawwe suidoostewind wat waai.

Gisteraand se lamskenkelpotjie, met patat, geelwortel, kool en sampioene was uit die boeke uit lekker - al moet ek dit self sê. Vandag se middagete sal uit die oorskiet op 'n sny of twee brood bestaan.

Vanaand val daar "sirloin steak" (is dit lendeskywe in Afrikaans?) op die Smokey Joe. Ek het dit gekoop by Joey's waar ek my boerewors koop. Dít wat ek by die huis gebraai het was smaaklik en murgsag. 

Môre-oggend is dit oppak en inpak vir die pad Bontebokpark toe. Ons hoef eers 10:00 hier uit te wees en kan eers 14:00 by ons nuwe bestemming inboek. Ek beplan om eers gou in George by Van Rensburg Slaghuis te gaan boerewors koop. Neef het ons daaraan bekendgestel toe ons verlede Oktober in die Karoo Nas Park saamgebraai het (met Len en en Jan ook saam). Mens kon proe dat hulle boerewors het beslis ook vleis by.

... tydens ons proe-sessie van genoemde twee boereworse in Karoo Nas Park, was die meerderheid "deelnemers" baie diplomaties oor watter een van die twee worse die lekkerste was. Die redelik algemene konsensus was dat elkeen van die twee worse hul eie meriete het en dat daar nie werklik 'n keuse t.o.v. van enigeen gemaak kan word nie. Omdat ek beslis in die minderheid was, of liewer nie my uitspraak wil maak nie omdat ek dan die enigste een sou wees wat my ten gunste van 'n spesifieke wors sou uitspreek, het ek besluit om stil te bly. Maar Joey's s'n was vir my lekkerder as Van Rensburg s'n - alhoewel laasgenoemde ook lekker was. Ek dink in beide worse is daar geen twyfel dat goeie gehalte vleis in die regte verhoudings gebruik word nie. Die speserye is wat uiteindelik die verskil maak. En smaak verskil logies in daardie opsig.

My verwysing hierbo na die feit dat jy kon proe dat Van Rensburg se wors ook vleis by het, is nie met die bedoeling dat jy kon agterkom hulle het beter of meer vleis in as Joey's nie. My pa het altyd spottenderwys vir 'n slagter, as hy die eerste keer by 'n spesifieke slaghuis wors koop, gevra of sy wors ook vleis in het. Ek het dit ook al meermale gedoen - en ek kan verskeie staaltjies vertel oor uiteenlopende antwoorde wat ek gekry het.

My vewysing dat mens kon proe dat Van Rensburg se wors beslis vleis by het, was maar net omdat ek weet dit is goeie gehalte wors. En my enigste rede hoekom ek môre beplan om daar 'n stukkie wors te gaan koop, is omdat ek een pakkie (vakuumverpakte bevrore) Joey's te min saamgebring het. Gevolglik sal ek (wat my aanbetref) tevrede moet wees met tweede-beste (maar steeds lekker).

Die eienaar van die slaghuis in Prins Albert is Das Olivier - 'n skool-klasmaat van Ralie. Hy kan maar boerewors maak. Die laaste wat ons vir Das en sy vrou (Francis) gesien het was hier by die einste Ebb & Flow.

Ek sal môre bietjie uitkyk vir dít wat jy aanbeveel. Ek het reeds Van Rensburg se ligging op my GPS geberg.

Ek beplan om môre-aand 'n lamstjoppie in Bontebokpark te braai, maar afhangende van al die lekker dinge wat Van Rensburgs môre bied, verander my spyskaart dalk baie vinnig.

... vir vanaand. Van Rensburg Foods in George was 'n belewenis. Ek het nog nooit soveel verskillende tipes wors en vleissnitte bymekaar gesien nie. En watter netjiese plek. Ek het hulle boerewors (die een waarmee hulle "brag" - aldus die kassier) en Tomahawk vark vir vanaand gekoop. Ek wil kyk of ek kan staatmaak op Neef se aanbeveling.

Eerstens - jy's reg Neef, daardie Tomahawk vark is 'n absolute wenner. Ek reken dit is môre-aand weer op die spyskaart. Maar ek volstaan by my oordeel dat Joey's se boerewors (vir my) lekkerder is as Van Rensburg's s'n. Maar smaak verskil mos maar.

Nadat ons hier arriveer het in 'n lawwe suidooste-wind, het dit vanaand heeltemal tot bedaring gekom - inderwaarheid 'n fantastiese aand. Ons het die wonderlikste chalet met die mees uitstekende uitsig. Ongelukkig is die data-sein baie swak om foto's te laai. Ek sal foto's laai sodra ek by die huis kom.

Vanoggend het ons wakker geword in bewolkte winderige omstandighede hier in die Bontebokpark. Maar ek is al vroegoggend wakker gemaak deut 'n lawwe vlermuis wat op een of ander manier in ons chalet gekom het. Ek het besef iets is fout toe ek 'n windvlagie oor my wang voel, soos die kalant geluidloos soos 'n uil rondgevlieg het. Opstaan en die deur oopmaak was gelukkig vinnig die oplossing om ta buitentoe te laat vlieg.

Maar ek dink die dak wemel van vlermuise. Toe ons nog gisteraand buite gesit het met ons sondonnertjie, wagtend vir die Smokey Joe se donkiekuttels om gereed te kom vir die aand se offering op die kole, het ons al opgelet hoedat die vlermuise (nogal 'n klein soort) by die dak uitvlieg. Ons kon ook die bedrywigheid laasnag op die plafon hoor.

Maar afgesien van die vlermuise in die dak is die chalets van die netjieste wat jy in enige Nasionale Park kan kry.

Ek kon uiteindelik, met baie geduld (waaroor ek nie juis beskik nie) daarin slaag om foto's te laai.

Ek het chalet no.7 vooraf bespreek. Ons was net na ons Covid-vrylating ook vir een aand in die betrokke chalet. Dit is ongetwyfel die een met die beste uitsig oor die Breederivier, wat tans maar effentjies vloei.

Ons het laatmiddag 'n draai gaan ry. Die veld is baie droog. MAAR die paaie is plek-plek, eintlik die grootste gedeelte, in 'n baie swak toestand - van só 'n aard dat ons besluit het om vandag net hier in die ruskamp rond te hang. 'n Groot gedeelte van die pad tussen Ontvangs en die ruskamp is ook in só 'n swak toestand dat ek nie enigsins sal oorweeg om met my 1993 Caravette 6B hier te kom kamp nie. Hier is 'n paar kampeerders, maar nie een konvensionele padkaravaan nie. Ek het gou by die kampeerders se ablusie gaan inloer - NETJIES!!

Tydens ons wildsrit het ons enkele rooihartbeeste en bontbokke gesien - ook hierdie moeder met haar jongeling.

Die volgende is wat ek gisteraand gebraai het. Ek het nog 'n "sarsie" beskikbaar vir vanaand, maar die "government' het aangedui dat sy eerder vanaand 'n slaggie 'groente' wil hê vir aandete. Daarom het ek maar besluit om haar tegemoet te kom en sal daar vanaand eerder hoender gebraai word.

Maar só het gisteraand se spyskaart-items gelyk voordat die kleur en tekstuur op die Smokey Joe verander is. Soos reeds genoem, is die Tomahawk vark 'n wenner. Maar ek ken lekkerder wors as Van Rensburg Foods s'n.

Die huidige 2.8 het ook net gewone materiaal-bekleedsel. Spaar jou dus daardie moeite.

My seun het in sy vorige 2.8 dubbelkajuite altyd vooraf die materiaal-bekleedsel met leerbekleedsel laat vervang. Maar met sy nuwe GR het hy besluit om die materiaal-bekleedsel te behou. Hy swaai sy voertuie gewoonlik na 3 jaar en is bevrees dat die GR nie sy oorspronklike outentiekheid sal behou as hy dit wil verkooo nie.

Jy's reg Wessel - die Tomahawk vark is 'n soortgelyke snit soos die primarib van 'n bees. Hulle saag dit lekker dik, met 'n langerige stuk van die rib aan. Ek weet nie hoe lank dit verouder word nie, maar dit is murgsagte vleis.

Gepraat van primarib beesvleis. Jare gelede, ek praat van 30+ jaar, was primarib een van jou goedkoper beesvleissnitte. Toe het niemand nog gepraat van ribeye nie. Op Grabouw, waar ek toe gewoon het, was ene Riaan Roux. Hy't toe vir my gesê dat hy koop slegs primarib-bees vir braaidoeleindes. Volgens hom - die smaaklikste vleis aan 'n beeskarkas. Hy het ook gesê dat hy wonder hoe lank dit sal neem voor baie mense ook tot daardie besef kom.

En toe gebeur dit. Die groot vleisgedeelte word uit die primarib gesny en as ribeye verkoop - ten duurste. Só duur dat 'n gewone mense, wat primarib gekoop het, dit nie meer kan bekostig nie.

Ek sal nie weer deur George ry sonder om Tomahawk by Van Rensburgs te gaan koop nie. Een, saam met boerewors, was oorgenoeg vir my en Ralie.