Die Smalle se Krugerwildtuin toer Junie 2024

Vanoggend toe ek aansluit is daar ‘n trjierie-tjierie geluid van voor af. Toe ek kyk is daar olie gespat oral rondom die waaierband. Ek gaan die olievlak na en dis nog reg so toe ry ons Phalaborwa toe. Ford se werktuigkundige weet dadelik wat fout is voor hy nog kyk. De flenters waaierband klim agter die crank pulley in as die waaierband breek, buig die timing chain cover en beskadig die pulley se seel.
 

Hulle moet die onderdele bestel, sal dit eers Maandag kry en dit vat ses ure om die werk te doen. Dit kos saam met 5l olie wat ek gekoop het om intussen die enjin aan die gang te hou amper R11k. En hulle is Maandag reeds vol bespreek so sal dalk nie kan klaarmaak nie. Dit gaan twee baie lang dae op die pad tot gevolg hê om terug in Worcester te kom en nog kostes vir verblyf. Ek huil sommer. 

Die Kavango was nie saam Phalaborwa toe nie. Die werktuigkundige by Ford sê solank ek die olievlak reg hou behoort daar niks fout te gaan teen die snelhede wat ons in die wildtuin ry nie, solank ons nie baie ver ry nie. Pierre Nolte stem saam. Die waaierband kan wel breek omdat die olie dit beskadig. Ek het ‘n spaar een saam gebring en ons ry nie ver nie. Ek het ook 5l olie by Ford gekoop en saamgebring. Ons is nog een aand by Tsendze en ry dan Letaba toe vir die laaste aand. Maandag vroeg gaan ons Phalaborwa toe en sal maar sien hoe loop dinge van daar af. Ek probeer positief bly en dit wat ek kan geniet van die wildtuin te geniet. 

Die Kruger wildtuin deel van ons besoek is verby. Ons het toe maar met die Ranger deurgedruk. Dit het aanhou olie mors, maar was nie weklik baie nie so ek het net twee keer ietsie bygevoeg om die peilstok so by driekwart te hou. In totaal het ons net minder as 500km gery sedert die olie lek begin het nadat ek die waaier pulley en waaierband vervang het. 
 

Ek hoor wat julle sê van ‘n klein karretjie huur, maar met ‘n onbeplande (en onbegroote - hoe spel mens dit?) uitgawe wat waarskynlik meer gaan wees as my dieselrekening vir die toer kan ek nie enige verdere uitgawes bekostig nie. 
 

Tsendze bly lekker, en al was die son skaars die eerste twee dae het die Kavango se batterye gehou. Ek het die vrieskas kompartement van die Snomaster ook op 2 grade gestel (soos die yskas deel) en die vleis wat nog gevries was in die kamp se gas vrieskas gesit. Verder het ons die wa se ligte en waterpomp gebruik maar geen probleem ervaar nie. Een ding op die toer het goed uitgewerk. 
 

28 is ‘n puik staanplek, en ons nuwe gunsteling. Genoeg son vir panele en genoeg skadu vir die wa. Redelik uitmekaar van naburige staanplekke, en teen die heining. 
 

Ek vertel later meer met finale gedagtes oor die toer as ons een dag veilig tuis is. Nou sit ons by Lantana lodge in Phalaborwa se parkeerterrein met die Kavango en wag. Ons wou by Safari park wag, maar hulle wou dit nie toelaat nie. Toe ek die dame by Ford vra of daar ‘n kans is dat hulle vandag met die Ranger sal klaarkry sê at hulle sal definitief daarmee begin. Ek is nie vol moed nie.

Ons en die Kavango is nou by Villa Luso. Dis ook maar kontrakteurs verblyf, maar darem netjieser as Lantana lodge, en ons het ‘n kamer hier waar ons by Lantana in die parkering gesit het en ‘n paar mans reeds teen 10:00 begin drink het buite.
 

Toe ons verby Ford gery het oppad hierheen, het hulle steeds nie begin met die Ranger nie. Hulle het Vrydag gesê ons moet vroeg vandag daar wees sodat hulle solank die Ranger kan strip en dan die onderdele insit wat 11:00 hier sou wees. Hulle het Vrydag gesê dis 6 ure se werk, so dit gaan nie vandag klaar wees as hulle nog nie eers begin het nie.

Dis niks lekker om so oorgelaat te wees nie, maar dit is nou hoe dit is. Ek moes Donderdag weer begin werk het, maar as die Ranger eers môre reg is (wie weet hoe laat?) gaan ons vir seker nie Woensdag tuis wees nie. Ek ry nie buite daglig ure nie, en ook nie vinniger as 100 nie. Ek het reeds ons verblyf môreaand in Victoria-Wes gekanselleer en die helfte van die deposito verloor.