Plek van die visvreters ...

... (ontleen aan die titel van 'n destydse TV-reeks: "Plek van die vleisvreters"). Toe ek 'n kind was, is daar (seker maar neerhalend) verwys na mense van vissersdorpe as visvoete. Maar hierdie Bolander se liefde vir vis kan hom ook amper as 'n visvoet laat kwalifiseer. Ek het weliswaar nie by die see gegroot nie (ek woon wel nou by die see), maar in my komvandaan (Tulbagh) was daar al die jare 'n viswinkel wat behoort het aan die bekende Eigelaar-familie van Velddrif/Laaiplek.

Die oom wat daardie winkel bestuur het (Oom du Toit) het my pa soos klokslag gebel as daar hetsy vars snoek of harders ingekom het - wat redelik gereeld was. Met die gevolg dat vars vis nogal redelik gereeld op ons spyskaart was. Verder was my pa 'n ywerige strand- en rotshengelaar wat geen geleentheid laat verbyglip het om te gaan lyn natmaak nie. Daarom was ander vis soos galjoen, steenbras en kabeljou ook dikwels deel van ons spyse.

Ekself was ook vir etlike jare 'n hengelaar en het dit seker oorgedra na my seun - wat heeltemal hengelbef.. is. Deesdae hengel ek amper glad nie meer nie, behalwe as my arm gedraai word om saam te gaan Hentiesbaai toe. Maar danksy my seun se manie oor hengel is ek amper nooit sonder lekker vis nie.

My beter helfte is 'n gebore en getoë Karoonooi wat op 'n Karoo-skaapplaas grootgeword het. Haar enigste kennis van vis is die gebakte vis en tjips wat haar pa soms tydens hul somervakansies by Mosselbaai vir hulle gekoop het. Maar deesdae eet sy eerder vis as lamsvleis.

Ons eet gemiddeld omtrent elke vierde aand vis. Ralie se voorkeur is snoek, maar dit is deesdae amper 'n rariteit. Snoek het skaars en gevolglik duur geword. En ek koop nie 'n bevrore snoek nie omdat jy nie vooraf weet of dit dalk 'n pap snoek is nie (wat my aanbetref 'n oneetbare ding). En die snoeke wat sommige supermarkte in boksies verkoop lyk net soos snoek, maar smaak treurig - tensy jy smoorsnoek daarvan probeer maak.

Ek is in 'n bevoorregde posisie dat ek nog minstens vir die volgende 14 weke eenkeer 'n week galjoen kan braai (my persoonlike voorkeur), maar dit is bietjie moeilik as ek nie by my huis is nie. Want galjoen moet eers bewerk word (skubbe krap, vlek en binnegoed uithaal) voordat dit gereed is, want galjoen word heel gevries. En by 'n vakansieplek het jy nie altyd die geriewe om dit te doen nie. Daarom neem ek vir die komende 17-dag toer kabeljou-filette saam om te braai - darem maar self 'n koningsmaal.

Jammer dat ek julle verveel met my liefde vir gesonde vis.