Die Smalle se Krugerwildtuin toer Junie 2024

Ford Phalaborwa bel my so 20 min gelede om te laat weet die timing chain cover is nie afgelewer nie en kom nou eers môre. Nou verstaan ek waarom hulle nog nie begin werk het nie. As die Ranger op ‘n hyser is en gestrip is staan daardie hyser stil tot hulle die Ranger weer aanmekaar sit en dit kan af ry. Nou is ons goed geskroef. 

Ek het deur Afristay bespreek, en hulle kansellasiebeleid is dat hulle 25% van die totaal hou op sulke kort kennisgewing. Die gastehuis eienaar was heeltemal bereid om alles terug te gee. 
 

Ons het ‘n paar goed uit die Ranger gaan haal omdat ons moet oornag. Die voorkant van die enjin is al ver uitmekaar gehaal maar die onderdeel wat kort is nog soek. 
 

Om een of ander rede kan ek nie meer foto’s laai hier nie. 

As ek die teenspoed so luister, gaan die ou man 2 keer dink voordat hy sy waentjie 2000km vêr sleep met sy 10jaar oue ryding. 

Ek moes met die 16 jarige gesleep het. Selfs met die aansienlik hoër brandstofverbruik sou dit nie naastenby so duur uitgewerk het nie.  

Ons moes volgens beplanning gisteraand in Potch by Salomien se ouers oorgeslaap het. Toe ek net na sononder hier vir skoonpa verduidelik wat aangaan met die Ranger en hy sê hoe jammer hy vir ons voel, sê ek vir hom ten minste is ons vier saam, gesond, en veilig. Ons was nie in ‘n ongeluk nie, en dis ‘n tydelike terugslag. Gelukkig gee ons Calvynse opvoeding vir ons die perspektief.

Wat ver reis met ouer voertuie brtref glo ek nie die insident gaan my ontmoedig nie. Die afgeleë aard van die wildtuin en omstreke bied uitdagings, maar ons het hulp uit baie oorde ontvang. Tyd is net nie aan ons kant nie. Die Ranger het nou amper 110 000 km op, wat nog min is. Die laer wat gefaal het is nie ‘n algemene probleem van die voertuie nie. Dis ‘n geseelde eenheid, so dit is nou maar eenvoudig ‘n meganiese komponent wat om een of ander rede gebreek het.
 

Ek het die werktuigkundige by Ford gevra, en hy het nog net een keer voorheen een vervang op ‘n T6 Ranger, wat in ‘n ongeluk was. Die olielek wat ontstaan het agv die waaierband stukke wat agter die cam pulley saamgekoek het is wel redelik algemeen. Alhoewel Phalaborwa taamlik afgeleë is en nie ‘n reuse dorp is nie, is hier vrek baie bakkies agv die myn bedrywighede. 

Ek het baie jammer vir myself gevoel op verskeie geleenthede die afgelope nege dae. Mens sien lank uit na so ‘n vakansie, en bestee ‘n klein fortuin daaraan. Die bedrag het ook met rasse skrede toegeneem oor die laaste week. Verder is die Krugerwildtuin my happy place hier op die planeet, waar ek waarlik kan afskakel en herlaai. Vanwee omstandighede by my werk het ek dit vanjaar nodiger as in ‘n lang tyd gehad, en vanwee omstandighede tydens ons besoek was die afskakel en herlaai nie wat dit moes wees nie. Om my daaroor te verknies gaan my egter net verdere hartseer in die sak bring. 
 

Dit het gister voorgekom asof Ford nie veel empatie met ons het nie. Hulle koerier het die een onderdeel agtergelaat, en toe ek vir hulle vra of hulle dit nie elders kan kry nie sê hulle die naaste een is in Burgersfort maar hulle mag dit nie gaan haal nie, hulle moet Ford se koerier gebruik. Nadat ons gevra het om met die eienaar te praat het die dame ons eers met die diensbestuurder laat praat, en sy het toe ‘n drywer gestuur om die onderdeel wat van Polokwane af moes kom te gaan soek. Vanoggend het hulle bevestig dat die drywer laat gisteraand terug gekom het met die onderdeel. Hulle gaan dit vandag insit en die Ranger weer aanmekaarsit, maar kan nie bevestig hoe laat hulle gaan klaar wees nie omdat hulle ander werk ook het. Gister het hulle eers nadat die dienste wat vir die dag bespreek was afgehandel was begin werk aan die Ranger. Ek hoop maar hulle begin vroeër vandag omdat die bakkie in een van hulle vier diensvakke staan. 
 

Ek het ernstig oorweeg om vir vanaand en môreaand plek te probeer kry in die wildtuin, omdat ek reeds ‘n ekstra dag se verlof sal moet vat en dan bly net Vrydag oor by die werk. Maar dit sal nog onkostes beteken en as daar dan weer iets fout gaan kom ons dalk nie Sondag tuis nie.