One Drive Memories

... dat ek gedurende onlangse jare só baie rondgeloop het op 13 Mei. In 2006 was ek op hierdie datum vir die eerste keer by Pafuri piekniekplek. Na my mening is dit die mooiste piekniekplek in die Krugerwildtuin.

Op pad Pafuri toe was ek ook vir die eerste keer by Klopperfontein - op 'n prentjiemooi dag.

'n Jaar later was ek bevoorreg om in Grootkolk in Kgalagadi aan te kom. Dit is sonder twyfel my hart se punt van al die kampe in Kgalagadi.

Net daardie lae muurtjie was jou skans teen ongediertes aan die anderkant. Die braaiplek was in die muur ingebou.

En saans is dit stiknag-donker - en jy weet nie wat lê anderkant die muurtjie vir jou en loer nie.

Die kombuis is ook buite op die stoepie.

In 2011 was ons bevoorreg om by ons ver kinders in Roemenie te gaam kuier. Op 13 Mei was ons by 'n ski-oord (sonder sneeu want dit was vroeg-somer) in die pragtige omgewing van Lupenne.

In 2012 kamp ons met ons tent en gazebo in Shingwedzi. Watter wonderlike belewenis toe twee groepe leeus ons van verskillende rigtings vir 'n lang tyd wakker gehou het met hulle gebrul.

In 2013 kamp ons op ons destydse gunsteling staanplek in Karoo Nas Park - die eerste een aan regterkant as jy die kampeerterrein anti-kloksgewys inry. Ons is so spyt dat die staanplek na ons mening verkeerd geplavei is - sodanig dat ons glad nie meer daar staan nie.

En ons sien hierdie outjie agter ons karavaan - 'n Karoo verkleurmannetjie (en nog nooit weer gesien nie).

In 2021 kamp ons in Shingwedzi.

Danksy One Drive word ek weer herinner aan 'n klompie foto's wat op hierdie datum geneem is.

2007: Toe ons in Grootkolk (Kgalagadi) was, maak ons gereed om na Unie-End, die mees noordelike punt aan die Suid-Afrikaanse kant te ry. Terwyl ek ons mandjie met eet- en drinkgoed pak, roep Ralie my. Sowat 150 - 200 meter vanaf ons tenthuis was 'n watergat (sekerlik nou nog) langs 'n kameeldoringboom. Drie leeuwyfies en 'n opgeskote welpie is toe by die watergat.

Ek verstaan dat daar deesdae 'n hoë draadheining om elk van die vier tenthuise is, want die leeus het te "hans" begin raak. Die gedagtes wat ek die vorige aand gehad het toe ek in die donker moes instaar terwyl ek braai by die ingeboude braaiplek in die lae muurtjie was dus nie ongehoord nie. Toe ons die oggend van ons vertrek oppak, vra my buurman my of die leeus ons ook so gepla het in die nag. Hy wys my toe waar hulle agter sy tenthuis kerjakker het en sê hulle is wakker gehou met hul skuurdery teen die tenthuispale. Ons het egter van niks geweet nie.

Nietemin - ons het Unie-End toe gery - en o.a. 'n albino bleeksingvalk op daardie dag gesien by die mees noordelike piekniekplek. Terwyl ons daar was, kom die bekende wildlewe-fotograaf, Hannes Lochner, daar aan om juis die besondere voël (wat toe weer verdwyn het) te kom afneem. Hy't gehoor van dié voël wat in daardie omgewing "hou".

Op hierdie datum, in 2008, het ek en Ralie vir die eerste en enigste keer The Pointer, die bekende spits Karookop wat bokant die Karoo Nas Park se kampeerterrein uittroon, gaan klim. Dit was voor die dae dat daar leeus in die park losgelaat is. Deesdae kan jy dit nie meer doen nie. Maar die uitsigte van daar bo-af is pragtig.

Op hierdie datum (2011) het ons ook pragtige natuurtonele in Roemenië beleef toe ons op pad terug was na my kinders se huis in Calarasi. Hierdie pragtige land is nie 'n bekende toerisme-bestemming vir Suid-Afrikaners nie, maar ons wat reeds verskeie kere daar was om ons kinders te besoek, het oor die jare al groot dele van dié land verken. En ek moedig Suid-Afrikaners aan om Roemenië te besoek - dit is 'n pragtige (en vir Suid-Afrikaners 'n bekostigbare) toerisme-bestemming.

In 2016 was ons ook op hierdie datum in Shingwedzi. Toe het die Kanniedooddam in die Shingwedzirivier nog bestaan - watter wonderlike plek was dit nie. Die dam het intussen wel doodgegaan, ten spyte van die naam, toe die wal beskadig is tydens 'n groot vloed (was dit 2020?) en daar besluit is om dit nie te herstel nie. Op 14 Mei 2016 het ons hierdie ou grote in die dam afgeneem waar hy besig was om homself gate uit te geniet.

Synde dat my ver kinders vanoggend weer wildtuin toe gevlieg het saam met Amerikaanse vriende - en vir 4 aande in Berg-&-Dal sal bly, het ek weer 'n bietjie tyd vir myself. Gevolglik kan ek my mede-forumiete verder verveel met my spesifieke datum-herinneringe soos wat One Drive dit daagliks vir my laat kry.

28 Mei 2019

Len het in sy verslag melding gemaak (en 'n foto geplaas) van N'wamanzi uitkykpunt naby Olifants. Ek het reeds genoem dat dit een van ons gunsteling uitkykpunte in die wildtuin is. Daar is verskeie waarvoor ons lief is soos Bobbejaankrans, Tshanga en Red Rocks. Nietemin, hier is 'n kort video wat ek 5 jaar gelede by N'wamanzi geneem het. Ons het oor die jare 'n groot verskeidenheid van wild daar gesien - selfs leeus.

Op hierdie dag en datum het ons 'n pragtige leeu "sighting" op die S41, net noord van die Gudzanidam, gehad toe ons 'n trop van 18 leeus gesien het.

Ek dink 18 leeus bymekaar is seker die rekord vir leeu besigtiging. Die beste wat ons kon doen was 11 wat in enkelgelid voor ons oor die pad paradeer het. 

Die meeste leeus wat ons ooit bymekaar gesien het (welpies ingesluit) was 23 - by (die gewese) Duke-suiping, suid van Onder-Sabie. Dit was op 11 Junie 2016. 

Onder-Sabie bly maar een van my gunsteling kampe in die Krugerwildtuin. Naas Mopani (vir vaste akkommodasie) en Tsendze (vir kampering) is dit ongetwyfeld 'n top kamp wat ligging (op die oewer van die Sabierivier) en voorkoms van wild aanbetref. Die kampeerplekke in Onder-Sabie is dalk ietswat beknop, maar dit is eintlik netjies uitgelê.

Op 6 Junie 2021 het ek die volgende foto's geneem:

'n Gestreepte sandslang, afgeneem regoor Onder-Sabie se ontvangskantoor.

Die volgende outjie en sy familie is by meeste restaurante 'n bietjie van 'n "nuisance", maar by Onder-Sabie se Mugg & Bean is hulle nogal erg lastig - maar tog mooi.

Maar die restaurant (Mugg & Bean) by Onder-Sabie is ongetwyfeld die beste wat diens, kos en ligging aanbetref:

..., ek neem ook graag daar af, maar dit hou ek maar vir myself.