Die onverwagte (onbeplande) Boucher-reis

Ons vertrek eerskomende Sondag tot by Karoo Nasionale Park vir een aand se oorstaan. Synde ons die Wes-Kaapse se stormweer vroeg in Mei gemis het, is ek nie heeltemal op hoogte van al die stormskade nie. Ek weet dat die Breederivier sy walle oorstroom en baie skade aangerig het. Maar ek vind toe eers vandag uit dat die pad tussen Villiersdorp en Worcester steeds gesluit is. Dit beteken dat 'n redelike lang ompad ons voorland vir Sondag se reis Beaufort-Wes toe is.

Ons sal dus met die N2 tot Stormsvlei moet ry. Daarvandaan sal ek Wessel se grootword-dorp (Bonnievale) moet deurry na Ashton en vandaar na Montagu. Maar my goeie ou vriend kan maar gaan doppies blaas as hy dink dat ek met die karavaan tweekeer om die kerk gaan ry.

Vanaf Montagu sal ons deur die Keisievallei, die steil Burgerspas op en deur die Koo ry voordat ons uiteindelik voor Touwsrivier by die N1 aansluit. 

Dag 2 neem ons tot Forever Gariep waar ons by een van hulle sogenaamde luukse staanplekke gaan oorstaan. Dit is een van ons tradisionele oorstaanplekke tussen die suide en die noorde. Ons het nog altyd die privaat ablusie reg voor die karavaan geniet. En die badkamergeriewe is onlangs pragtig opgradeer.

Dag 3 neem ons tot by Aldam waar ons in een van hulle rondawels gaan oorbly. Ons kom al vir baie jare met Aldam aan en het al terdeë geleer dat dit 'n bitter koue plek in die winter is. Daar was my vrou al onder trane a.g.v. 'n ysige stort. My seun en skoondogter het verlede jaar besluit dat hulle is keelvol van Aldam se koue onpersoonlike kampeerterrein in die winter. Gevolglik bly hulle deesdae oor in vaste akkommodasie met die karavaan langsaan geparkeer. Ons gaan nou dieselfde doen.

Vanaf Aldam ry ons Woensdag tot Klein-Kariba vir een aand se oorstaan. En Donderdag (25 Junie) arriveer ons by Eiland Spa waar ons vir die volgende 24 aande op B160 en B161 bespreek is. Ek vertrou maar dit is lekker staanplekke, want ek onthou dat sommige van die staanplekke in daardie deel van die B-blok nogals skuins is.

Twee van die 24 aande word onderbreek met 'n kort Shingwedzi-besoek in vaste akkommodasie (10 & 11 Julie). Die tyd by Eiland sal vanjaar sommer net bestaan uit lui-lekker dae. Omdat ons saam met die kinders en kleinkinders is, sal ons maar die rolbal en jukskei laat oorstaan vir volgende jaar wanneer ek 'n 3 maande lankstaan-kuier beplan. My voorafgaande wildtuinbesoek is reeds bespreek.

19 Julie vertrek ons vanaf Eiland. Die kinders ry terug huistoe (Grabouw) en ons gaan weereend vir 5 nagte Shingwedzi toe met die "Ou Lady". 24 Julie slaap ons een aand oor by Forever Phalaborwa Safari Park en dan volg 3 aande by Klein-Kariba voordat ons die langpad terug huistoe begin aandurf.

Weer 'n enkele nag by Aldam (weer in 'n rondawel), een aand by Forever Gariep en die laaste aand by Travalia (3 Susters) omdat ons nie kan plek kry in Karoo Nas Park nie. Vir een of ander rede is die park volbespreek (kampering en vaste akkommodasie). 31 Julie is ons mikpunt om weer by die huis te arriveer.

... die Joey's boerewors en patties is sommer Woensdag, op pad van die lughawe af, aangeskaf.

En Hennie Botha het my gou per WhatsApp laat weet ek óf in die verlede óf in die toekoms leef met die aanvanklike aankomsdatum by Eiland Spa aangedui het. Dit is nou reggestel. Ons arriveer daar 25 Junie en nié 25 Maart nie. Dankie Hennie.

Verder is ek ernstig besig met die inpakproses. Ek het vanoggend by myself gedink ek is lekker simpel om my te laat ompraat het om saam noorde toe te reis. Ek sal nou maar by Eiland gaan rus i.p.v. hier by die huis.

... die ou, Christo Prins, doen uitstekende werk. Hy was o.a. vir 9 jaar verbonde aan Cara-Camp. Hy het laasgenoemde se brouwerk t.o.v. die remme, uitgevoer deur Cara-Camp, op my seun se Penta kom regmaak. My seun het hom nou vir die derde keer gebruik. Hy neem foto's van die wa se wiellaers nadat dit skoongemaak is en weer nadat dit oorgepak is met ghries. Omdat hy bý jou huis werk, druk hy gedurig op jou nommer om dinge uit te wys wat hy gesien het - hetsy dit aandag of nie benodig. O.a. wys hy hoe hy die remme stel.

Hy't gister my remskokbreker op die sleephaak vervang. Hy't 'n nuwe mikrogolf ingebou (netjies). Hy het onder die karavaan ingekruip om vas te stel wat die oorsaak is van die kraak in die vloer het voor die yskas. Hy't dadelik gesien dat die staalbalk wat die vloer verstewig (niks te doen met die stewigheid van die onderstel nie) 'n krakie het en die rede is vir die kraak/klapgeluid as jy op die vloer voor die yskas trap. Die staalbalk sal uitgehaal moet word om te sweis en versterkings in te sit. Ongelukkig het tyd dit nie toegelaat nie en sal ek dit laat doen sodra ek teruggekeer het. 

Hy't ook vir my uitgewys watter fout gemaak is met die installering van die 'movers'. Sekere staaldele is afgesny sonder om die nodige versterkings aan te bring.

Hy't ook uitgewys die nate op die wa moet oorgeseël word. Fyn krakies is duidelik sigbaar. Dit sal ook gedoen word sodra ek terugkeer.

Ek het nogal volle vertroue in die ou.

Die pad tussen Villiersdorp en Worcester (R43) is oopgestel. Dus hoef ek nie die ompad via Bonnievale en Montagu te ry nie. Die ompad sou sowat 80 km langer wees.

... Christo Prins (Caravans & Cabinets) se nommer is 082 3477 799.

Jy's 100% reg met jou aanname dat dit dalk omgekeerd is vir ons. Ek het eintlik nog 'n paar dae nodig om net weer tot verhaal te kom. Maar ek vermoed as ons eers môre-oggend in die pad val, sal die opgewondenheid waarskynlik inskop.

Ek was gatlam gereis tussen hier en Roemenië - veral met die terugreis. Ook met beide (heen en terug) reise tussen Roemenië en Noorweë waar ons elke keer na 03:00 in die oggend by ons bestemming arriveer het, was ek blikners gereis.

Maar ek sê dit nie ligtelik nie - soos ek nou hier sit en ontspan met 'n dubbele polisiekoffie langs my, is ek behoorlik pê. Na 'n vrotterige nagrus (wat ek grootliks toeskryf aan die Bulle se lamlendige spel van gisteraand - absoluut "upsetting"), en 'n dag van harde arbeid vir 'n 72-jarige, voel ek gedaan.

Ek beplan om môre-oggend sommer vroeg-vroeg my boeretroos te geniet ten einde te poog om min of meer 08:00 hier weg te kom. En as ek eers my brekfis by Veldskoen Padstal in Hexvallei geniet het, glo ek dat ek gevul sal wees met opwinding vir die res van die reis. Hoe jammer dat dit slegs een aand in die Karoo Nas Park sal wees.