Kruger Wildtuin in 2020 sneuwel

Plek is reeds bespreek  -  hier is een van die mooiste dokumente denkbaar :-

Altyd heerlik om oppad 'n ontbyt iewers weg te slaan.  Hier is so 'n ontbytjie geniet by Touwsrivier:

Dis 'n heerlike, opgewonde gevoel om by 'n Wildtuin-hek te arriveer  -  selfs al het jy reeds die afgelope 65 jaar dit ervaar !  Hier is Krokodilbrug se paar jaar gelede se opgeknapte, meer moderne ingangshek :-

Die sonsondergange of-opkomste in die Wildtuin is atyd prentjiemooi.  Hierdie prentjie is by die Nsemani-dam geneem :-

..en hierdie een naby Balule  (lyk of die veld aan die brand is) :-

...en hierdie een naby Skukuza met 'n swerm voëls wat verby vlieg :

Dan die pragtige bome :-

Krematartboom wat loodregop groei ten spyte van die skuins helling.  Tussen Punda en Pafuri.

By Punda se Mahonie-omloop :

Ons gaan op 5 Mei in by Phalaborwa-hek teen hek-oopmaaktyd en hoop om soos in die verlede weer hierdie twee mooi gesigte  te sien :-

...en ons was skaars binne die Wildtuin, toe ons op ons eerste diere afkom, 'n hele spelende trop wildehonde ! :-

Vanaf Phalaborwa mik ons noord na die gesogde Tsendze-boskampie sonderl elektriese krag waar jy die ingangshek self moet oopmaak en weer toemaak as jy deur is :-

So lyk die staanplekke  -  lekkerrrr!

..en die ablusies :-

..en die opelug storte....

en die opwasplek..:

Een middag laat 'n paar benoude oomblikke gehad toe ons terugry Tsendze toe en 'n padblokkade van twee olifante op 'n laagwaterbruggie ons in ons spore stop met geen plan om te gee pad nie.  Kon ook nie omdraai nie want dan sou die donkerte ons vang.  Moes toe noodgedwonge die twee met klippe bestook om reaksie te kry. (Ek is nou nog skaam daaroor, maar het geen ander keuse gehad nie).  Die twee het toe ewe rustig van die bruggie af beweeg en ons kon deurry.

Uile in Tsendze-kamp se bome is lank reeds bekend en die kampopsigter/skoonmaker, Rodger, plaas gereeld fotos op FB.  Hierdie knaap lyk vir my na 'n Skopsuil  -  wat sê die kenners ?  Sy roep klink presies soos 'n kinderswaai wat olie nodig het.

By Tsendze is ons natuurlik sonder elektrisiteit, maar gelukkig is ons 13 jaar oue Exclusive nog gerieflik toegerus met gas.  Ons het 'n gasstofie, terwyl die yskas en vrieskas albei absorpsie verkoeling komponente het wat met gas aangevuur kan word. Die ligte in die karavaan is almal LEDs en kry krag van 'n lekker fris 12V battery wat ook my "movers" van krag voorsien.  Ek top hierdie battery elke aand op vanaf die Pathfinder se battery en sodoende word dit nooit pap nie.  My laptop en selfone laai ons met 'n klein 300W inverter wat die karavaan se 12V krag omskakel na 220V.  Eintlik nogal lekker om met 'n alternatiewe kragbron oor die weg te kom.

Vanaf Tsendze is die plan verder noord tot by Shingwedzi, 'n groot en baie populêre kamp in die noorde van die Wildtuin.  Hierdie kamp moes so drie jaar gelede heeltemal oorgebou word omdat dit totaal verspoel het na groot vloede toe die Shingwedzirivier sy walle oorstroom het.  Oor die jare heen bly dit een van ons gunsteling kampe.  Hier kamp ons in Shingwedzi in die vroeë tagtiger jare met ons Gypsey 2 en Toyota Cressida :-

...en dekades later nog steeds by Shingwedzi met ons Pathfinder en Exclusive :-