Die Smalle se Krugerwildtuin toer Junie 2024

Gisteroggend wou ons Red Rocks toe gaan. Toe ons by die afdraai van die teerpad af kom sê Kara sy moet poef (haar woorde). Toe moes ons omdraai en het daarna die onderste twee dele van die Mphongolo S56 gery. Ons het mooi wild gesien maar in terme van roofdiere net ‘n jong hiëna met ‘n af linker agterpoot naby die kamp in die rivier. 
 

Vanoggend is ons toe Red Rocks toe, maar net buite die kamp begin die Ranger ‘n fluitgeluid maak. Ek stop toe op die brug, en dit klink of dit die waaierband is. My ou Everest het een keer so geluid gemaak, en dit was toe stof op die waaierband. Ek het bietjie water op die waaierband gegooi toe raak dit beter maar kom na ‘n ruk weer terug.
 

Voor ons draai van die teerpad af lê ‘n wyfie luiperd in die oopte langs die pad. Ons was alleen met haar tot sy tussen die mopanies ingeloop het. Daar kon ons haar nog sien deur ‘n gat tussen die bome, en het gewag tot die volgende kar kom om haar vir hulle te wys voor ons ry. Die geluid wat die Ranger gemaak het verdwyn mettertyd, en ek neem aan dit was stof.
 

Ons het ‘n lekker rit gehad verder. Die deel tussen die laagwater brug en Red Rocks ommetjie se afdraai was sinkplaat, en ook die deel anderkant toe (Bateleur se kant toe). Die anderkant van die rivier oppad terug laagwater brug toe (S52) was beter en dis saam met die S56 een van my gunsteling roetes. Dit het vandag weer nie teleurgestel nie.
 

Die omgewing om Shingwedzi is vervuil van kameelperde en dit is telkens lekker om die unieke diere te sien en dop te hou. Ons sien ook baie sebras, waterbokke, olifante en koedoes. Bobbejane en apies is ook nie skaars nie en rooibokke is ook in goeie getalle teenwoordig. ‘n Mooi trop buffels is vanoggend voor ons oor die pad nadat ons sover net ou bulle gesien het elke dag. Ons sien die jaar gereeld vlakvarke, nadat ons verlede jaar nie een gesien het nie. 
 

Ongelukkig is alles nie maanskyn en rose nie. Ek moes maar met die Prado gekom het. Oppad terug kamp toe met die H1, hoor ons ‘n vreemde geluid uit die Ranger se voorkant en toe trek die rook. Ek skakel af en stop. Toe ek die enjinkap oopmaak is die waaierband weg. Gelukkig is ons net 6km van die kamp af, en ek ry stadig terug en hou die temperatuur dop. Natuurlik werk die kragstuur nie meer nie, en in die kamp stuur ek swaar. 
 

Nadat ek ‘n paar velle verloor het op my hande en vingers kry ek die stukke waaierband wat om die waaier en crank pulley gedraai het los en soek die oorsaak. Al die pulleys draai vry, en dit lyk nie of een geseize het nie. Die waaier se mounting het egter baie speling, en na ‘n paar heen- en weer boodskappe met Pierre Nolte bevestig hy dis die oorsaak. Die laer het gegaan en die breek van die band veroorsaak. 
 

Vandag is Sondag, so niks gaan verder gebeur nie. Ek sal môre die onderdele moet probeer opspoor en hierheen gekoerier kry sodat ek die vervanging kan doen. Ek hoop net ek kan seerower onderdele kry, anders gaan ek deur my nek betaal by Ford in Phalaborwa (die naaste agent). Hou duim vas asb. Hier is ‘n swak selfoon foto van ons luiperd. 
 

Die fluit geluid vanoggend was anders as die ou een. Vanoggend was dit die viscous fan mounting se laer wat gegroet het. Die waaierband loop om dit ook, en toe dit vasslaan het die waaierband afgeskuur daarop. 
 

Dit kon baie erger gewees het. Die band loop oor die waterpomp, kragstuurpomp, lugeversorgingpomp en alternator ook. As een van die gegaan het sou dit insleep beteken het Phalaborwa toe, en my versekering dek net die eerste 40km. Die onderdele sou ook baie duurder gewees het. 
 

Ek gaan môre maar die naaste Autozone, Goldwagen of Midas bel en as hulle die onderdele het vra dat hulle dit vir my koerier hierheen. Ek het nie die regte gereedskap hier nie, en hulle het nie ‘n werkswinkel of werktuigkundige nie maar wel blykbaar iemand wat kan help met basiese onderhoud. So ek hoop om oor 24 uur weer mobiel te wees. 
 

Dankie vir die aanbod van hulp Geert. As ek nie teen 10:00 môre reggekom het nie gaan ek plaaslik ‘n ander plan probeer beraam om die onderdele te kry. As ek nie kan nie sal ek maar die Ranger laat sleep om reg te maak. Ons hoef darem eers Woensdag te skuif Tsendze toe. Dis net jammer ons kan geen wildritte doen tot die bakkie reg is nie. Maar ek sit eerder hier as enige ander plek buite die Krugerwildtuin. 

Dit is nie moeilik nie, net bitter beknop daar waar die spanners en vingers moet inkom.

Net om die stukke waaierband wat om die crank pulley  en waaier skag gedraai was los te kry het ‘n klomp velle op my vingers en arm gekos. Ek hoop die laerhuls kom af met die vier boutjies daarop, en dat die waaier se moer dan losgedraai kan word buite die enjinruim. Ek het die waaier se koppelaar al vervang, en moes ‘n tool maak om die huls vas te hou sodat ek die waaier se moer kon losmaak. Stuur asb die Google skakel na my per WhatsApp. 

Ek is mos hardkoppig arm, en glo nie daaraan om onnodig meer te betaal vir iets wat ek self kan doen nie. Ek het oornag gelê en dink en vanoggend my vermoede bevestig dat die waaier se mounting maklik vervang kan word deur vier boute waarvan net een bietjie moeilik is om by te kom. Om die waaierband terug te sit benodig ek net ‘n ‘n power bar. Hopelik het hulle een (ek gaan nou-nou uitvind). Ek moet nou net bel en die onderdele hier kry. 

Sover kon ek selfs by Ford Phalaborwa nie die viscous fan mounting opspoor nie. Ek gaan nou maar skrootwerwe begin bel, want sonder die onderdeel gaan ons nêrens heen nie. Daar is ‘n plek in die Kaap wat dalk kan help, maar hulle moet wees uitvind of hulle oornag kan koerier.