Dwarswegstrandoord resensie en inligting

Ons was van 20 tot 25 November by Dwarswegstrandoord naby Groot Brakrivier. Die oord het net 34 staanplekke, en is deel van ‘n woon- en selfsorg oord by Botha strand. Ons het dit baie geniet, en ek het gister my aansoek vir verblyf in Desember 2021 ingedien. Uiteraard beveel ek die oord aan, en deel hier ‘n paar foto’s en inligting vir belangstellendes. 
 

Toegang van die pad af word by ‘n slagboom beheer. Sekuriteit blyk goed te wees, al is die oord oop na die strand toe. Geen deurgang word toegelaat nie.

Toegang tot die strand is met ‘n netjiese stel trappe. Aan die onderkant los mense sommer hulle sandale en gaan stap dan lang ente.

Daar is ook kameras teen pale waar voetgangers toegang kan kry tot die oord. Ons het met ‘n paartjie gesels wat al ‘n hele paar keer daar was, en hulle het wel ‘n paar jaar gelede ‘n insident gehad. Die oom het die karavaan se deur ongesluit gelos toe hy gaan water afslaan in die nag, en die tannie het dit hoor klap later. Dit was toe ‘n groepie mans wat al met die strand langs geloop het en items wou steel by die oord. Sy het alarm gemaak en die mans is gevang. Ek het ook met ‘n oom gesels wat al 30 jaar lank daarheen gaan, en hy het net lof gehad vir die oord en nooit enige probleme gehad nie.

Die ablusiegeriewe is skoon en netjies. Toegang tot die geriewe is met deurslotte met ‘n kode, en kan dus net deur kampeerders gebruik word. Daar is ook geriewe vir klere was en ‘n lang wasgoedlyn.

Hier is ‘n kaart van die oord vir verwysing.

Staanplekke 1, 2, 11, 12, 13 en 14 het die beste skaduwee, maar is die verste van die see (wat nie vreeslik ver is nie). Hulle sal ook die meeste motor verkeer verby hulle kry, maar met net 34 staanplekke gaan dit nie ondraaglik wees nie.

21, 22 en 30 is na my mening die beste seefront staanplekke.

31, 32 en 33 is redelik beskut van die wind, en veral 32 en 33 meer privaat. 33 is egter ‘n bietjie kleiner as die ander.

23, 24, 25, 26 en 34 betaal jy vir seefront, maar daar is ‘n staanplek tussen jou en die see.

By 34 is daar twee tussen jou en die see, en jy is reg langs die ablusieblok. Ek sou nie daar wou staan nie. 6 en 7 is ook beskut van die wind, maar reg langs die ablusieblok aan die kant waar die deure is.   

Ons het by 27 gestaan. Dis ook ‘n lekker staanplek, maar is by die trappe af strand toe, en redelik naby aan die naaste selfsorg eenheid. As daar rumoerige mense in is kan hulle jou steur. Tydens ons besoek was almal voor 22:00 al stil en meestal aan die slaap sover ek kon sien. 

Elke staanplek het ‘n gedeelde kraan en eie kragpunt en braaiplek. Meeste staanplekke het ligte by die braaiplek ook. 26, 27 en 34 het egter nie ‘n lig nie. Daar is ‘n klimraam, maar dis nie mooi heel nie. Van die bome is lekker vir klim vir die kinders, hulle kan lekker fiets ry in die oord – ook die deel waar die huise en selfsorg eenhede is. Daar is twee lang strate wat nogal lekker is om in te stap ook.

Uiteraard is die strand en die see net ‘n paar trappe ver. As jy op die seefront is sal jy jou kinders van jou staanplek af kan dophou wanneer hulle op die strand is. Die strand was mooi skoon. Dis redelik steil, so ek dink nie dis die veiligste swemstrand nie. Buite seisoen was daar ook nie lewensredders nie. Jy kan tot by Glentana stap aan die Oostekant en tot by Groot Brakrivier aan die Weste. Die sand is egter sag, en selfs die nat sand stap nie so maklik nie.

Daar is ‘n lieflike SPAR by Groot Brakrivier, en George en Mosselbaai is onderskeidelik 25 en 35 km ver.

Ter afsluiting; wat van die wind? Ek was ook maar op my senuwees, so het die uitsig opge-offer en rug na die see opgeslaan. Die wind het een dag nogal sterk gewaai, en ek het die voorspelling dop gehou vooraf. Ek het toe net ‘n stormband opgesit, nie my stormnet nie. Van die lang staners het gesig na die see sonder stormnette gestaan. 

Ons het geen skade van die wind of vreeslike ruk- en pluk ervaar nie en toe ‘n mooi uitsig uit die wa gehad met ons rug na die see.