Wildehont se nuwe ou Ranger

Ek gaan die borde met kar silikoon plak. Dis bestand tot 100 grade C en behoort makliker af te haal as gom. Die borde is lig, so ek gaan net om die rante plak en dalk so effens diagonaal om mooi in plek te hou. Die bakkie staan nou in die son met my horlosie in wat ‘n termometer ingebou het. Ek wil die verskil meet voor en na. Sal die kappie afspuit om af te koel voor ek plak. Daar staan twee ander karre onder die afdak en ek is tans alleen hier (dankie tog) so ek gaan nie nou lol met karre rondskuif nie. 

Die bakkie staan in vol son. Dit (die bakkie) meet 31° buite. In die kajuit meet my horlosie 38,3° en in die kappie 33°

As ek aan die binnekant van die dak vat by die rondings net voor dit af buig aan die kante, waar ek nie insulasie kon plak nie, brand my hand omtrent. Die Engel behoort darem die bier koud te hou agter in die kappie by Dwarswegstrand. 

Vasmaak plek vir die tweede battery en Engel (sien onder). Maar ek het eers die ankerblokkies kleiner gesaag sodat dit in die gleuwe van die bak se vloer pas. Gelukkig kyk ek eers wat is onder die bak anders het ek waarskynlik in die tweede dieseltenk in geboor. En voor ek kon klaarmaak moes ons by Leipzig en Merwida gaan wyn proe. Dalk werk ek môre verder. 
 

dit lyk asof borde aan die kante in 'n tipe van 'n gleuf/skouer rus

Die borde sit in ‘n kanaal wat reg rondom die onderkant van die plat deel van die kappie se dak loop. Die borde rus egter nie daarop nie, dis vasgeplak teen die dak se onderkant. Lg het ribbes in, maar tussen die ribbes is daar groot plat oppervlakke waarteen ek die borde kon plak met silikoon. Dit was ‘n vinnige en maklike oefening.  

As jy so voel, dan kry jy by materiaalwinkel vir jou roof lining . Ek het swart hier, en dit het so dun sponslagie op. 

Ek moes voor die tyd daaraan gedink het. Ek het gewonder of ek nie viniel kan kry wat ‘n gomlaag op het wat ek teen die borde kan plak vir bietjie beskerming nie. Ek het die kinders mooi gevra om nie te lol met die borde nie, maar ongelukke gebeur.  

Ek het die hegpunte vir die yskas en tweede battery vandag ingesit. Die silwer gedeelte van elkeen met die ring kan verwyder en dan bly net die voetjies waarin dit vashaak agter. Dit was ‘n senutergende taak, want ek moes gate in die bak se vloer boor. Ek wou dit in die gleuwe plaas sodat dit nie uitsteek en vashaak plek word as die silwer deel verwyder word nie. Ek moes dus baie versigtig wees dat ek nie iets onder die bak raak boor nie. Die een an die linkerkant sit tussen die twee brandstoftenks se vul pype. Ek het darem niks raak geboor nie. Links bo sit ‘n herlaaibare liggie. Dit haak los wanneer dit nie in gebruik is of gelaai moet word. Ek gaan nie nou sukkel met bedrading vir 12V liggies nie, en dis eintlik net nodig wanneer ek saans iets in die yskas wil doen. 
 

Die yskas gaan dwars staan tussen die wit pyle en die battery boks pas dan met sy kort kant tussen die rooies. Die yskas se deur gaan na die linkerkant van die bakkie wys sodat ek dit kan oopmaak van die linkerkantse deur van die kappie af. Dit bly in die bakkie. Dit het in die Prado ook gebly.
 

Dis ons drinkgoed yskas. Die tweede battery laai met ‘n DC-DC laaier van die bakkie se battery af as ons ry of met ‘n sonpaneel as ons staan. Aangesien die bakkie meestal gaan staan by Dwarswegstrand (anders as in die wildtuin) koppel ek die laaier sommer aan die Kavango se batterye wat laai van 220V af. Die kos kom in die kleiner kompartement van die Snomaster in die Kavango en die gevriesde goed in die groot kompartement. 
 

Vanoggend vroeg tref ‘n gedagte my en hou my toe uit die slaap. Die Ranger se vering is gelig, en dis harder geveer as die Prado. Gaan die Kavango dan nie neus in die lig loop nie? En gaan die neuswiel hoog genoeg kan opwen vir die aan- en afhaak?

Toe ek later opstaan gaan meet ek. Die Ranger se haak is 150mm hoër as die Prado s’n. Ek sal dus dalk  ‘n sakplaat in die hande moet kry. En nou het ek te laat wakker geskrik want ons ry oormôre. Die ergste wat seker kan gebeur is dat die winkels môre toe is en ek Woensdagoggend een moet gaan kry en opsit. Dis nie ideaal nie.
 

Ek sal môre die Kavango moet uit trek en toets. Een kar vertrek darem vandag, so met ‘n klomp rondskuiwery kan ek die wa langs die motorhuis parkeer en die Prado in die motorhuis. Ek trek dit gewoonlik uit die motorhuis die dag voor ons ry, want dan is dit makliker om die wa te pak. Die yskaslaai kan bv nie heeltemal oopmaak in die motorhuis nie.  

Chris, gaan sommer Woensdagoggend met wa en al na 'n trekstang plek. Dan kan hulle gougou vir jou 'n sakplaat aansit en alles oplyn omdat gelaaide wa en bakkie saam daar is.

Dis ‘n goeie plan. Ek gaan môre eers kyk hoe/of ek die wa kan haak en hoe dit hang. ‘n Ander probleem kan wees dat die Ranger se agterkant te hoog is om onder die motorhuisdeur in te pas