Konka Private Family Adventure Resort

Was maar stil die afgelope ruk want werk het in die pad van kamp gekom. 

Het die laaste langnaweek by Konka Private Family Adventure Resort (in kort Konka) gekamp.  Was gelukkig om staanplek te kry want ek het eers die Dinsdag voor die langnaweek besluit om te gaan kamp en navraag gedoen. 

Hulle het die Woensdag laat weet dat hulle 'n kansellasie in hulle boskamp gehad het - ek het onmiddellik bespreek nadat hulle my verseker het dat die staanplek groot genoeg is vir die Exclusive.  

Daar gekom, ingeteken by sekuriteit wat onmiddellik vir Alex opdrag gegee het om ons te help opslaan nadat ek gese het dat ek daar is om te rus.  Vandaar direk na die staanplek gery wat plaveisel wat groot genoeg is vir die Exclusive plus 2 tentdakke en dan gedeelte met gras en dan privaat badkamers met opwasgeriewe by al 84 staanplekke.  

Nadat ons opgeslaan het het ons na die ontvangs gery waar ons die sleutel vir die badkamer gekry het en bederf was met 'n nie-alkoholiese cocktail.  Vir die wat hulle drankies met skop soek was daar 'n alkoholiese weergawe en ook OBS.

Geriewe sluit in slides, warm en koue swembaddens asook groot grasperk reg voor van die staanplekke met tafels en stoele op die grasperk. Daar is ook 'n klein winkel en restaurant op die perseel en 'n paar leeus in kampe naby die ingang van die kamp.

Wat vir my uitstaan is die feit dat die Sondag oggend toe die munisipale/Eskom kragtoevoer uitgaan, dit nie lank geneem het voordat die kragopwekker ingeskop het en die hele kamp, insluitend al die staanplekke van elektrisiteit voorsien het.  Dit was vir n eerste en daarom het ek onmiddellik my aansoek om lidmaatskap ingedien.  O ja, dit is 'n "Lede Alleenlik" kampeerplek, maar hulle laat toe dat jy die eerste keer kan gaan kamp voordat jy besluit om aan te sluit.  

Hulle reële is streng - stilte tyd tussen 22h00 en 07h00; geen maar geen musiek by staanplekke, en hulle is bereid om mense wat nie die reels nakom nie te help op pak maak nie saak watter tyd van die dag of nag dit is nie. 

Die jaarlikse lidmaatskap geld is R500 per familie vir 2 volwassenes en kinders onder 16. Die staanplek koste oor lang naweek was R700 vir 6 persone - hou in gedagte dat die gebruik van die warmwater swembad en slides ingesluit is by die prys.