'n Stukkie hemel op aarde

Vandag het ons vanaf Hartenbos na Plettenbergbaai gery.   Vanaf George tot Plettenbergbaai is seker die mooiste deel van die tuinroete.   Toe ons Liewe Vader die stukkie aarde gemaak het, was hy seker in 'n baie goeie bui.   Ons het dit al soveel keer gery, maar elke keer is dit van nuuts af weer mooi.  Berge, die see, mere, plantegroei, alles werk saam om dit regtig een groot pragtige tuin te maak.   Die wonder van die skepping laat mens klein voel.

Ons is veilig by Forever Plett.  Ons het bietjie lank gesoek vir 'n staanplek en uiteindelik een gekies wat naby die ablusie is, son sal kry en darem 'n uitsig van die rivier het.   Hier is heelwat bome met bessies en die voëls wat dit eet, mis op jou tent en karavaan.  So ons wou ook nie direk onder bome staan nie.   Ons staanplek lyk toe mooi gelyk maar op die ou end staan die karavaan baie lekker maar die tent is nie regtig op gelykgrond nie.  Colin is vol fiemies en nie baie gelukkig daaroor nie maar ons sal dit gewoond raak.  Ons het ongelukkig ook 'n sandkol onder die een deel van ons grondseil.

As jy by die hekke van Forever Plett inry, besef jy opnuut hoe pragtig dit hier is.  Die rivier en die berge en die pragtig versorgde oord is iets om oor huis toe te skryf.  Die ablusies is puik gehalte, eie aan die Forever Resorts.   Ons ontvangs by die kantoor was uiters vriendelik.   Ek weet ons gaan ons maand hier en in die mooi area baie geniet.