Namibië toe

Dit is vanoggend 'n ware droomoggend wat die weer aanbetref in Lüderitz. Hier trek nie 'n luggie nie en daar's geen teken van 'n wolkie in die lug nie. Ons mik vir die 11;00 toer by Kolmanskop, afgesluit met ete in hul restaurant. Daarna Diazpunt toe.

Lüderitz se Kreeffees het gister afgeskop. Dit is 'n groot bedrywigheid in die dorp. So lief soos wat ek vir kreef is, sal ek dit maar 'n 'mis' gee. Ek's nie iemand vir sulke bedrywigheid nie. 

Ons bly nie in die mooiste deel van Lüderitz nie, maar dit is ten minste baie netjies.

Namibië is darem maar 'n top toerisme-bestemming. Daarmee sê ek nie dat SA nie is nie, maar hier voel ek net baie veiliger.

Dit was vanoggend my tweede besoek aan Kolmanskop. Hierdie keer was dit net om hierdie besonderse besienswaardigheid aan my ver kinders te gaan wys.

Soos boontoe genoem, is dit 'n pragtige dag in Lüderitz - 26°C met geen wind (amper té warm). Maar ek is dankbaar want hier kan die wind jou van jou voete af waai. Ek dink die drie kampeerders wat ons gister op Shark Island (kampeerterrein) gesien het is ook baie dankbaar. Daar voel dit blykbaar of die wind jou die see in kan waai.

Ek plaas sommer enkele foto's van Kolmanskop. Ek sal die video clips eers by die huis op You Tube laai voordat ek dit hier oorplaas.

Dit is eers as jy die interessante geskiedenis van hierdie sandverwaaide plek hoor (soos oorgedra deur 'n uitstekende gids) dat jy waardering kry vir dit wat hier plaasgevind het. Diamante is letterlik van die grond af opgetel om uiteindelik meer as 5 miljoen karaat diamante op te lewer. Maar die ongenaakbare woestyn is stelselmatig besig om die omgewing (danksy sandstorms) terug te eis.

Maar in hierdie barre woestyn is daar nog plantjies wat ten spyte van swaarkry en 'n sukkelbestaan steeds blommetjies uitstoot. Dit is eintlik 'n waardevolle les vir my. Blom terwyl jy nog lewe - ten spyte van moeilike omstandighede. Hier op ons forum is sulke voorbeelde. Ek dink aan Len en Neef wat steeds 'n positiewe uitkyk het ten spyte van gesondheids terugslae.

... Wessel. Ek sal in elk geval nie weet wat om daarmee te doen.

Ons beplan om binne die volgende paar minute te gaan kyk waar Bartlomias Dias sy kruis geplant het. Die windjie begin nou liggies trek en koel darem die warm omgewing 'n bietjie af.

Daarna gou na die plaaslike Spar gaan om te sien wat hulle beskikbaar het vir vanaand se braai asook môre-aand s'n in Grünau. Ons het geen plekke tussen-in om vleis te koop nie.

Ons was toe laatmiddag by Diazpunt. As mens in hierdie omgewing kom is dit die moeite werd om die 19 km tot daar te ry. Ek plaas 'n paar foto's van die omgewing.

Absoluut. Ek dink dit is 'n groot "money spinner" met toegangsgeld van R150 per persoon - en baie mense, veral buitelandse toeriste (Duitsers by die hope), besoek Kolmanskop.

Nadat ons vanoggend uit Lüderitz weg is, het ons sowat 150 km later ontbyt geëet by Biltongplaas se padstal. Wanneer laas het ek 'n maalvleis-knypbroodjie ("jaffel") geëet.

En toe vat ons die pad na die Visrivier Canyon se uitkyk. Kort duskant Hobas, die ingang na die uitkyk, sit Canyon Roadhouse sommer knap teen die pad. Watter fantastiese plek!!

Soos voorheen genoem, plaas ek videos wanneer ek eers by die huis is.

Die canyon is maar asemrowend. Geen foto kan daaraan reg laat geskied nie.

Intussen het ons by Grünau Chalets arriveer vir ons laaste aand in Namibië. En môre steek ons die grens oor vir ons laaste aand van hierdie kort vakansie op Maskam Gasteplaas by Vanrhynsdorp.

... Geert. Dit is 'n replika van die oorspronklike kruis. Dit is van graniet of een of ander soort klip. Ons het juis gister gewonder waarvan die oorspronklike kruis gemaak was.

Dit was mooi om by die kruis te luister na die geblêr van klein robbe op die rotsagtige eiland 'n entjie van die kruis af.

Hieronder het die oukêrel (lelike ou donner) 'n selfie van homself geneem voor die kruis wat omtrent 1.8 meter hoog staan. 

... ja, ons het gisteroggend die grens oorgesteek en het laasnag by Maskam Gasteplaas buite Vanrhynsdorp oornag.

'n Lekker gerieflike selfsorgplek met die pragtigste uitsig oor die Maskam- en Gifberge.

Vandag is weliswaar die laaste skof van ons afgelope warrelwind (maar baie lekker) toertjie.

Nee Wessel, net verskeie huisies lekker ver uitmekaar sodat jy nie weet van ander besoekers nie - alhoewel ons gisteraand die enigste gaste was.

Ek sal weer 'n terugskouings-verslag doen met video clips.

Tans in Piketberg vir 'n Spur-brekfis. Ons hoop om vroegmiddag by die huis te wees. O wee - dan wag 'n grootskaalse bakkie-was. Praat van vuil en vol stof!! Amper grillerig na 100de kilometers se gruispad. Eintlik skaam om daarmee te ry.