Namibië toe

Ons is na ons Windpomp-brekkie vort tot Kenhardt. En daar het ons vir Oma Miemie gaan kuier. Ook nie 'n plek om te mis nie. 'n Fantastiese  (reuse) skyf wortelkoek en 'n lekker koppie Americano het ons krag gegee vir die 36° C wat ons vandag moes trotseer.

Daarvandaan was dit tot by ons aandbestemming vanaand - Kalahari Guest House & Farm Stall - netjies!! En 'n uitstekende gasvrou - Riana Loots. En hierdie kalahari-plaas beskik ook oor kampeerplekke. Lieflike plek!!

... is ons baie rustig. Ons het slegs sowat 150 km voor tot by Askham waar ons beplan om te gaan "brunch" by Diamond T - 'n lieflike ou restaurantjie waar ons 'n paar jaar gelede hulle tuisgebakte melktert geniet het. Daar sal ook diesel by die Agrimark vulstasie ingegooi word. Ek vermoed dit sal goedkoper wees as in Twee Rivieren. Van Askham af is dit 'n skrale 75 km tot Twee Rivieren waar ons buitendien eers 14:00 kan inboek - dus geen rede vir haas nie. Ons beplan om sommer ook ons paspoorte klaar te laat stempel aan die SA-kant vir Woensdag se ingang na Namibië by Mata Mata.

Ons staal onsself vir 'n paar dae van warm kry. Die voorspelling vir vandag en môre in Twee Rivieren is beide 34°C en Woensdag by Gochas 35°C. Donderdag voorspel YR darem ' 'n meer genadige 31°C vir Windhoek.

Na 'n lekker ontbyt by Diamond T Coffee Shop in Askham het ons in 'n byna onsmaaklik warm Twee Rivieren aangekom. Ek kom tot die slotsom dat April nog nie die aangewese tyd vir hitte-gevoelige sissies soos ek is nie. Gelukkig is die chalet heerlik koel, maar o donkie ek is bly dat ek nie tans hier kamp nie. Hier is nogal heelwat kampeerders in die skadu-arm kampeerarea.

Ai - hier sukkel dit weer om foto's gelaai te kry. Verskoon dus hierdie fotolose plasing. 

Ons beplan om teen ongeveer 16:00 'n "game drive" te vat.

Ons het 'n draai gaan ry - tot Rooiputs en terug (gistermiddag dieselfde). Nog niks opwindends gesien nie, maar uitstekende voël "sightings" gehad. Beide gompoue en Ludwig se poue reeds gesien asook roofarende, bleeksingvalke en edelvalke. Die volstruise beleef 'n uitstekende broeijaar - ons het al vele broeipare met hul kuikens gekry. Rooihartbeeste is meer algemeen as wat ek met die suide van die park assosieer en gemsbokke en blouwildebeeste is ook redelik algemeen. Springbokke was nog maar skaars. Ook al 'n hele klompie rooijakkalse gesien - selfs een se vars spore vanoggend langs my bakkie voor die chalet gesien.

'n Entjie noord van Twee Rivieren is die veld plek-plek sommer wollerig groen. Die gras lyk amper soos 'n geilgroen koringland. Duwweltjies is goudgeel in die blom.

... vanuit 'n mooi grasgroen Kgalagadi. Vanoggend verlaat ons Twee Rivieren om later vandag by Mata Mata Namibië in te gaan. Ons het gister reeds die oorgrensformaliteite aan die SA-kant hier in Twee Rivieren afgehandel voordat ons op ons langer "game drive" (na 'n aanvanklike vroegoggend-rit) vertrek het.

Die katte ontwyk ons nog, maar wie weet - ons het nog meer as 100 km wat voorlê tot Mata Mata. Die mooi van die veld en die wonderlike voëllewe maak deur en deur op vir die gebrek aan daardie "dinge" wat ons graag wil sien. Ten minste het ons darem gister 'n groterige trop springbokke naby Melkvlei gekry. En die eerste keer wat ek 'n kleinswart ooievaar (by Kij  Kij) in dié park gesien het. Nog ' n eerste vir my was om 5 sekretarisvoëls bymekaar te sien.

Die Nossobrivierpad tot by Melkvlei is in 'n goeie toestand. Die kort duinepad is plek-plek maar sleg en die gedeelte van die Auobpad wat ons gery het ook heeltemal aanvaarbaar. Dus hoef ek nog nie die Hilux werklik jammer te gekry het nie. Dit mag dalk vandag 'n bietjie meer stamperig wees met die banddrukke wat noodwendig hoër moet wees as die 1.6 Bar waarop dit tot dusver was (ter wille van die vrag).

Ons is hier -in Windhoek.

Ons het gister maar 'n flouerige dag in die Auobrivier beleef. Algemene wild was maar skaars. Ons het darem 3 kameelperde en een mooi troppie springbokke gesien. Maar dit was nie die Bouchers beskore om katte in Kgalagadi te sien nie.

Ek was verstom oor Kamqua piekniekplek. Ons was in 2007 laas daar. Daar was destyds 4 groot kameeldoringbome wat lekker skadu verskaf het - en al vier bome is nou morsdood. Die atmosfeer van hierdie eens lieflike piekniekplek is beslis nie meer dieselfde nie.

By Mata Mata is die oorgrens-formaliteite gou-gou afgehandel. Die gruispad van daar af was so goed soos 'n teerpad - fantastiese oppervlak tot by ons bestemming - Kowes gasteplaas. Ek was verkeerdelik onder die indruk dat Kowes selfsorg was - wat nie die geval was nie. Maar ons gasheer en gasvrou (Piet en Christel Boltman) het vir ons eetgerei beskikbaar gestel sodat ons kon braai. Op die ou end het ons lekker by Kowes gebly.

Vanaf Gochas tot Stampriet was die pad 'n bietjie meer "uitgery" (ons gasheer, Piet Boltman se term), maar steeds lekker rybaar.

Na 'n vinnige Wimpy koffiestop en diesel-hervul in Mariental, het ons die pad gevat tot Windhoek, waar ons net na 15:00 by ons oornagplek (Casa Amico Mio) arriveer het.

Na 5 agtereenvolgende aande van braai, is daar besluit (op ouma en kleindogter se aanbeveling) dat ons vanaand gaan pizza eet.

Môre vat ons die pad Swakopmund toe vir die volgende 2 aande.

... ek het hoeka só gedoen ('n Hansa Draught gedrink) toe ons gisteraand gaan uiteet het. En ek stem saam - dit ís lekker. As ons in Hentiesbaai gaan hengel, stop ons gewoonlik by Windpomp 14 vir ons eerste Hansa Draught. En elke aand wanneer ons terugkom van ons dag se hengel af word die bakkie skoongespuit en die vis skoongemaak by die Skubbe Bar waar die droë kele verlig word met 'n Hansa Draught - of twee of drie. Ek wil juis môre gaan "brunch" by Windpomp 14. Net jammer ek het nie 'n visstok by my nie.