Wildehont se nuwe ou Ranger

Ek het die plek waar dit gesny is juis voor op die foto geplaas 

Dit was omtrent ‘n gestoei. As ek dit nie gesny het nie sou ek dit vir seker nie ingekry het nie. 

Pierre Nolte het die foto nou-nou vir my gestuur. Regs is voor en links na die remapping.

Die Ranger was omtrent op spesifikasie gewees. Dit het 1kW en 5 Nm minder gelewer as wat dit veronderstel is. Dit kan dalk net die effense hoogte bo seespieel wees. Worcester is so 220m.
 

Ek het intussen die Ranger gaan haal, en ‘n vinnige draai gery. Nou ry dit darem vrek lekker hoor! Gelukkig het ek nie ‘n swaar voet nie, want ek glo dit sou my brandstofverbruik lelik beïnvloed het.
 

Ek wou nie ‘n resies kar gehad het nie, dit is ‘n bakkie. Dis net lekker om makliker weg te kom. Die throttle response op die Ranger was maar traag met die wegtrek slag. 

Ja-nee, dit gaan selfbeheersing verg. Gelukkig sleep ek nie vinniger as 100 werklike spoed nie, so met die wa behoort dit OK te wees. Maar sonder die wa sal ek my moet inhou. 
 

Die effense fluitgeluid het natuurlik opgehou toe ek stilhou by Pierre vanoggend. Hy het inspeksie gedoen en met ‘n stethoskoop geluister maar kon niks hoor wat nie reg klink nie.
 

Hy het my wel aangeraai om ‘n spaar boost pyp (twee eintlik - bottom en top) by Goldwagen te koop en in die Ranger te hou. Hy sê hulle raak maar hard met tyd en kraak, en as jy met vakansie is vervang die agent dit ten duurste. Dit kos minder as ‘n derde van wat hulle vra by Goldwagen. 

Met die Ranger se nuwe tuning (wat is die Afrikaans daarvoor?) skakel dit vinniger oor na ‘n hoër rat. En dis nie omdat ek harder trap nie. Dis wat my gehinder het voorheen. As ek wegtrek het dit gewoonlik lank in eerste gebly, en dis waarskynlik hoekom dit gevoel het of dit nie wil wegkom nie.
 

Ek is nie een wat onnodig vet gee nie. Selfs met die Prado (wat baie bevredigend laat wiel as jy die lepel so bietjie laat sak) sal ek net nou en dan as ek op die afrit draai N1 Kaap se kant toe lekker versnel tot by 100 van wegtrek af. My bestuurstyl is baie besadig. Maar ek wil darem nie voel my voertuig is gevrek nie. Veral nie met 3.2 liter, vyf silinders en ‘n turbo aanjaer nie. 
 

Na my draai met die Ranger toe ek dit by Pierre gaan optel het (wat ‘n ent op die N1 tussen twee ente in die dorp ingesluit het), het ek vir Pierre laat weet dat die Ranger nou ry soos ek graag wou gehad het dit moet. Ek is baie tevrede. 

Ek hoop nie dis ek wat dit so lui gemaak het voorheen nie. Dit was seker so omdat ek dit by ‘n grootmens gekoop het. 

Wat is die voordeel van die leerproses? As mens bv 90% van die tyd in die dorp in stadige verkeer ry (in Worcester se geval kort afstande) wat het die ratkas dan in sy kop wanneer jy die lang pad vat? Wat gaan amper twee weke in die Krugerwildtuin doen aan die aangeleerde “intelligensie”? Ek aanvaar die ander bakkie handelsmerke werk ook so? Maar hulle kan ander algoritmes gebruik. 

Ek verstaan ook nie die besigheid nie. Die Ranger het krag en wringkrag gehad voorheen (soos die dynamometer bevestig het was dit op spesifikasie). Maar dit ry definitief soos ‘n ander voertuig sedert die sagteware verander is. Dalk skakel dit net vroeër oor omdat meer wringkrag by lae revolusies beskikbaar is.