Die onverwagte (onbeplande) Boucher-reis

Mense - nou kos dit baie om te ry (veral as jy 'n karavaan sleep). Ek het my kostes en brandstof-gebruik uitgewerk tot by Zebediela Sasol naby die Nyl Tolplaza (die laaste plek waar ek opgevul het met diesel). 

Diesel, tot daar, het my R7 469 gekos. Maar ek dink die 2.4 Hilux het hom baie goed gedra met 'n gemiddelde brandstofverbruik van 8.51 km/liter. 

In die 32 jaar (sedert 1994) wat ek Eiland aan en af besoek, het die weer al by geleentheid sy spreekwoordelike agterkant vir ons gewys. Maar oor die algemeen beskou ons dit as ons somertuiste in die hartjie van die winter - waar ons elke tweede jaar die Bolandse winter probeer ontsnap.

Verlede jaar was ons lankstaan-jaar en as ons met gesondheid en die nodige middele geseën word, mik ons om volgende jaar weer vir ongeveer 3 maande te kom oorwinter. Hierdie keer is dit 'n kort 24 aande besoek. Nee, 2 van die 24 wat ons karavane hier staan gaan ons wildtuin toe - dus eintlik slegs 22 aande. Hopeloos te kort vir hierdie lieflike oord.

Sedert ons Donderdag hier aangekom het, is die dagtemperature in die lae tot mid 20's. En YR wys dat dit die temperature vir die volgende week ook gaan wees. Daar is min plekke waar jy in Junie en Julie langs die swembad kan lê. Hier trek nie eens die geringste windjie nie. Ons soek skaduwee.

In meeste kampterreine word jy gewoonlik wakker met die geluid van jou buurman se tent-ritsluiter wat ooptrek of klein kinders wat vroeg wakker word en buite speel. Hier word jy wakker met die voëls se geluide in die oorheersende mopaniebome. Die kôôk-kôôk-kôôk van hetsy geelbek- of rooibek neushoringvoëls, die pragtige sang van die swartkop wielewaal, die gekwetter van glansspreeus of die tipiese Afrika-roep van 'n visarend - en vele ander voëlsoorte.

Die mopanievuur is pas aangesteek en die brikette (Gravelotte - nie Etosha nie) is ook aan die gang vir 'n skaapskenkelpotjie vanaand.

... as YR nie wind wys gedurende die opvolgende nag nie (wat die algemeen by Eiland is), is ons nie gepla om die vuur dood te maak nie. Ons gaan nie inkruip alvorens die hout nie uitgebrand het nie. M.a.w. dit is as, maar met nog baie lewendige kole.

Toe die "asman" vanoggend die vuurput kom leegmaak het, was die as nog vuurwarm.

Sou die voorspelling wind wys, sal ons beslis die vuur doodmaak. Gelukkig waai hier by Eiland omtrent nooit nie.

Vroegoggend met 'n lekker beker moerkoffie hier langs gisteraand se kole wat nog vuurwarm is. Die skaapskenkelpotjie  van gisteraand was knap - en gelukkig nie opgeëet nie. Die pot is gou op die warm kole/as geplaas vir 'n vroegoggend aptytwekkertjie vir later se brunch.

... bak vanaand lekker Henties-kabeljou hier in die Laeveld. Die anti-vismense sal seker reken ons besoedel die bosveldlug met 'n visreuk. Maar daar wag nog 2 aande se visreuk vir die omliggende kampeerders, want daar gaan nog galjoen en kolstert gebraai word.

By gebrek aan korrelkonfyt, waaroor ek in elk geval nie veel van 'n affiniteit het nie, sal daar vanaand heel, ryp vyekonfyt saam met die roosterkoek geëet word. O ja, en dan natuurlik soetpatats. En die wyn sal maar vino-cartonne wees - darem Badsberg se sauvignon blanc.

Ons het intussen 'n vuurtjie aangesteek vir 'n paar stukkies Joey's boerewors. Ons het 2 tienerseuns saam met ons. Hulle is mos pal honger - hol tot onder in hul groottone. Ons gaan dus gou 'n paar boerewors rolls maak met Miami se Boerie Relish.

Watter wonderlike voorreg om op só 'n pragtige windstil sonskyn-oggend, met kortbroek, plakkies en T-hemp aan, jou oggendkoffie te kan sit en drink hier in Eiland se mopanie woud.

Met ons aankoms hier, is ons verseker dat die oord tjok-&-blok vol is. Maar hier is nog heelwat kampeerplekke oop. Dit is 'n heerlik-rustige atmosfeer in die kamp. Jy kry nooit die gevoel dat die ablusies oorbeset is nie. En boonop is dit relatief modern en word uiters netjies onderhou. Daar is bedags, tot saans om en by 21:00, pal skoonmakers aan diens. Elke oggend word die as (en kole) verwyder en Martin (ons as-verwyderaar) skrop en skuur selfs ons braairooster.

Gisteraand se Henties-kabeljou het knap afgegaan. En skoondogter het haarself oortref met die roosterkoek. Vanaand is daar blykbaar varknektjops en Joey's op die spyskaart. Ek eet net saam - boeta het die hele vakansie-spyskaart saamgestel en sy kampvrieskaste dienooreenkomstig gepak. Oupa het nie tyd gehad om sulke dinge te doen in die kort tydjie wat tot beskikking was tussen die terugkeer vanaf Roemenië en die vertrek hiernatoe nie. 

Andersins lê daar 'n dag van niksdoen voor. Ek is mos darem 'n ekspert daarin.

Hier by Eiland is enkele geplaveide staanplekke - komende uit die Klub Privé-dae tydens die Aventura-era.

Maar ons is al gekonfyt daarin om kaal grond-staanplekke te tem. Net soos wat ons in die wildtuin doen, gooi ons eers plastiek ground sheets voordat ons die grondnet bo-oor span.

Hier het vanoggend weer 'n hele paar kampeerders vertrek. Die mense wat op die 2 staanplekke langs ons gekamp het, was net vir 3 aande hier en is op pad wildtuin toe. Tussen die 2 egpare was 'n hele paar kinders. As 'n mens jonger is sien jy seker vir meer kans. Beide egpare het met Bush Lapas gekamp. Maar die klomp opslaan- en afslaanwerk wat daarmee gepaard gaan om die kinders ook te akkommodeer en jou kamp gerieflik in te rig is nie vir my bedoel nie. Maar nou ja - elkeen soen sy vrou op sy manier.

My seun lees gister op die internet dat die hoofrede vir die toename in boswaentjie-verkope is dat baie vervaardigers die gewig van die waens onder 750 kg hou. Dit beteken dat jy nie 'n spesiale lisensie benodig om te sleep nie. Of dit waar is of nie, dit klink nogal logies.

Dit is seker die kouefront wat die naweek oor die Wes-Kaap beweeg het, wat vanoggend lus het om van sy kloue hier in die noorde in te slaan. Na gister se warm, sonskyn, windstil dag, het ons 'n bewolkte oggend met 'n ligte windjie. Maar steeds is dit kortbroek-weer en lekker in die bos.

Ons "start" net-nou die skottelbraai op vir 'n spek-&-roereier "brunch". Vanaand is daar lamstjops en Joey's boerewors, saam met 'n braaibroodjie op die spyskaart.