Kgalagadi Oktober 2026

... die nuwe outjie het maar nog net effentjies gery - Vrydag van Hermanus-af tot by die huis en gister slegs na die plaaslike SupaQuick toe om die banddruk-sensors te laat installeer. Ek hou nie daarvan om met die tydelike registrasie te ry nie. Dit lyk so asof jy met 'n nuwe voertuig wil "brag". En ek is bang dat ek dalk deur die "speedcops" gestop mag word, want jy kan nie die tydelike registrasie deur die verdonkerte agterruit van die Rhinocab sien nie. Dus - grootliks tuisbly totdat dit amptelik geregistreer word.

Maar ek is beïndruk met die rygemak. Seker maar verbeelding, maar dit voel kompleet of die nuwe een 'n bietjie 'sagter' ry. Gemeet aan die spasie tussen die Rhinocab en die garagedeur, lyk dit of die nuwe een 'n bietjie hoër is. Dit voel ook só as ek agter die stuur sit.

"Early days", maar my eerste indrukke is goed.

Dit is darem maar 'n klomp bakgat, behulpsame persone wat die besprekings by EZI Bookings hanteer. Die vier nagte wat ek in Nossob bekom het is te danke aan Anny (Engelse uitspraak) wat dit aan my genoem het toe ek 'n ander kamp wou bespreek.

My besprekings in Mata Mata en KTC is almal op "online bookings" gedoen. Die Mata Mata akkommodasie was twee afsonderlike besprekings vir 1 nag elk. Na 'n  oproep vanoggend het Anny al die onderskeie besprekings vir my gekonsolideer. Sy het ook 'n aantekening gemaak vir die nag wat ek nog benodig in Mata Mata of KTC. Puik diens!!!

Ek het gewonder of die twee dames met wie ek al jare werk (Joween en Melischia) intussen hulle diens verlaat het. Ek was verlig om te verneem dat beide op kraamverlof was, maar dat Melischia intussen teruggekeer het werk toe. Ek kom net deesdae bykans nooit meer in Stellenbosch nie, maar as ek weer gaan wil ek vir hulle persoonlik gaan dankie sê.

Na vele kere se inloer op Sanparke se webblad kon ek regkom met my bespreking soos ek dit graag wil hê. My "vermiste" nag wat ek graag in Mata Mata wou hê het vanoggend beskikbaar gekom - saam met 'n bonus. Ek sou aanvanklik moes terugkeer vir 'n enkele nag in Twee Rivieren alvorens ek Mata Mata toe verskuif. Maar nou kon ek ook daardie nag verruil vir dieselfde tipe akkommodasie in Mata Mata.

My bespreking sien nou as volg daarna uit: 6 & 7 Oktober: Twee Rivieren 8, 9, 10 & 11 Oktober: Nossob (nogal in 'n 6-bed chalet) 12, 13, 14 & 15 Oktober: Mata Mata (in 'n rivierfront chalet) 16, 17 & 18 Oktober: Kalahari Tented Camp Ek sal maar bly uitkyk of ek nie 'n nag of twee in hetsy Urikaruus of Kieliekrankie kan kry (in ruil vir die laaste nag of twee in Kalahari Tented Camp).

Ek het nie rekening gehou met die feit dat die skole op 6 Oktober begin nie. Toe ek dus 'n reisplan vir die heenreis wou beplan, kom ek agter dat akkommodasie vir 5 Oktober nogal moeilik bekombaar is. Ek het uiteindelik geholpe geraak by Elim Gastehuis op Melkboomeiland naby Keimoes.

My reisplan na Kgalagadi sien dus as volg daarna uit: 4 Oktober: Mountain View Gastehuis in Vanrhynsdorp 5 Oktober: Elim Gastehuis naby Keimoes Met die terugkeer het ek as volg plek bespreek: 19 Oktober: Kalahari Lifestyle Lodge (net buite die park) 20 & 21 Oktober: Augrabies Nas Park 22 Oktober: Kroon Lodge, Kamieskroon

Ek het boontoe genoem dat ek hoop om by hetsy Bitterpan of Gharagab plek te kry. Ek kon gister vir 2 aande plek kry in Bitterpan. Ek sou my laaste 2 aande (van 4) in Nossob moes opgee om eerder Bitterpan toe te gaan. Maar na bespreking met die ghawwermint is daar besluit om eerder die volle 4 aande in Nossob te bly. Sy is bang vir oupa se 4x4 vermoëns in die duine. Moet ek haar verkwalik?

Buitendien is Nossob op só baie mense se wenslys - dat 4 aande daar nie te versmaai is nie. Dalk kom ons weer 'n keer by Unie-end uit - was 19 jaar gelede laas daar.

... nee, daar is darem 'n pad deur die duine na Bitterpan. Ek is onder die indruk dit is 'n eenrigting-pad wat net suid van Nossob (waar jy moet inboek) begin. Die terugkeerpad sluit aan by die lang duine-pad wat die Nossob- en Auobrivierbeddings met mekaar verbind.

Die ander aspek wat die ghawwermint eerder na die volle 4 aande by Nossob swaai, is die netjiese en goed ingerigte akkommodasie-eenheid wat ons by Nossob het - dit is 'n 6 slaapplek chalet (net vir die 2 oumense). Kyk na die foto's op die Sanparks-web. Dit lyk nogals na 'n oulike plek.

... ek hoor wat jy sê t.o.v. Bitterpan. Ons het ook Grootkolk, Urikaruus en Kieliekrankie destyds (2007) baie geniet - veral Grootkolk. En ek reken dat Bitterpan net so lekker is. Maar met my vrou wat amper anti-4x4 is (nog te meer na my bollie by Atlantis Duine) sal die pad Bitterpan toe en terug (soos jy hierbo beskryf) baie ongelukkigheid veroorsaak. Daardie ou geykte sêding, Happy wife, happy life, bly maar in my kop opkom. Sy sien al klaar op daarteen dat ons die gewone Kgalagadi-paaie in baie swak sinkplaat-toestande kan kry (soos meermale vantevore).

Sy't in elk geval nog nie 100% vrede gemaak met my gatjeuk-besluit om van die (so te sê nuwe) 2.8 "af te skaal" na die 2.4 4x4 nie. Ek word daaraan herinner dat ek met die koop van die 2.8 (net om die vorige een met 'n gatjeuk-besluit, na 3 jaar te vervang) gesê het dat dit my laaste nuwe voertuig is. En inderwaarheid is die 4x4 primêr vir Henties hengel-ekskursies gekoop.

Toe ek 2 weke gelede geluide gemaak het van 'n nuwe 2.8 4x4 was ek byna die slaapkamer belet.

Nadat ons vanaf die noorde teruggekeer het, het twee maande vorentoe nogal lank gevoel. En eensklaps is meer as 'n maand verby en minder as 'n maand oor voordat die langpad Kgalagadi toe aangepak word. Vandag oor 'n maand verskuif ons reeds vanaf Twee Rivieren Nossob toe vir die volgende 4 aande, waar ons 19 jaar gelede laas was. En sien ek nou uit daarna - veral om dalk weer 'n slag tot by Unie-end te kom (waar ons ook 19 jaar gelede was toe ons by Grootkolk - die kamp van alle kampe - gebly het).

Die inpaklys is so te sê gefinaliseer. Vir die eerste keer in jare gaan my potbroodpot en broodmeel weer saam. Ek is maar 'n luigat en koop eerder 'n vars brood. Maar in Kgalagadi is jy maar aangewese om vir jou eie vars brood te sorg. Ons het al in Mata Mata en Nossob vars tuisgebakte brood, wat deur die personeel op bestelling gebak was, gekoop. Maar hulle bak net witbrood - en ons hou van growwe brood. Dus sal ek maar weer my broodbak "skills" moet uithaal (as ek dit nog het).

En die driebeen-swartpot gaan ook saam. Daar sal moet 'n paar potjies gemaak word, want ek kan darem wraggies nie aand na aand braai nie.

Daar is niks beter vir enige Weber nie - ook vir die Smokey Joe wat beslis sal saamgaan Kgalagadi toe nie. Ook vir potjie is Etosha Triquettes onverbeterlik. Juis vandag vir my 'n nuwe potjie gekoop - een van dié wat met enamel bedek is. My seun gebruik al jare só 'n pot - en dit werk soos 'n bom. Só 'n rooi No 2 gekoop.