So paar diertjies by Mabalingwe

Dalk is dit maar die Warmbad Kameelperde wat so bietjie "anders" is, dalk iets in die water hier?

Ek kom agter die gebore Warmbadders is ook maar so bietjie anders as ons ander, vra maar vir Lolla?

Gisteraand so om en by tienuur hoor ons 'n Olifant bul trompetter, loop die troppie so reg langs die kamp verby. Daar was net 14 gewees, kon hulle nou mooi tel van dit is redelik oop en hulle het reg langs die draad gestap. Cliff bevestig toe vanoggend dat hulle op die oomblik net 14 hier het, maar daar sal binnekort 'n paar kleintjies bykom.

Vroeer toe so ent gaan ry om hulle te soek, maar al wat ons kry is hul spore.

Besluit toe om te gaan kyk hoe lyk die damme na die groot reens, Huilboom loop oor, Gorken is so 90% vol, klipspringer loop oor en WP le Roux is so 80% vol.

By Gorken [ek noem hom sommer Seekoei dam] kry ons toe twee volwasse seekoeie en ses kalfies.

Ons het seker 'n uur daar sit en kyk hoe speel daai kalfies in die water, hou sulke skyngevegte, bekke wawyd oop en dan druk hul daai bekke teen mekaar om te probeer byt. Die een ma moet kort, kort hulle so stamp gee as hulle te uitbundig raak.

Die kleiner paaidjies om naby die water te kom raak nou nogals regte 4x4 roetes, sleg verspoel met al die reen, maar ja ek geniet myself gate uit om deur en oor die slote en dongas te ry, om nie te praat van deur die stroompies [party nogal so 500mm diep] en die groot moddergate. 

Voel sommer weer so 'n jong seun as ek so kan speel!