Profiel van kampeerders

Ja Wessel, kamp raak duur, nie net karavaan pryse nie, maar oord tariewe ook. Ek sien daar is oorde in Natal waar tariewe by die R2000 per nag draai vir Desember....wat kry jy? 10x10 stuk grond (nie eers gras of paving nie) 1x kragpunt en n kraan wat jy met 4x staanplekke moet deel. Rakende karavaan pryse in SA donk ek ons eie vervaardigers is buitesporig. Vergelyk maar die luukse Swift karavane wat vanaf Engeland ingevoer word...hulle word met Britse pond aangekoop, wat is ons ZAR werd teen hul eenheid. Dan pas daar net 1x karavaan in n groot container wat hiernatoe verskeep moet word, van hawe moet container na Gauteng verskeep word, dan nog nie eers gepraat van alle belastings betrokke by aankoop en invoer nie. Dan word hulle hier bemark teen n kompeterende prys vergelyke met ons karavane met baie keer die cheapste yskas en toerusting in. Ek was eergister by Pretoria Karavane...sien die hele reeks nuwe Jurgens/Leefek reeks is op groot afslag en boonop dit gratis movers en aircon. Dit vertel my dat publiek dit nie koop nie vandaar die groot afslag wat aangebied word met daai freebies wat seker ook al oor die R30k werd is. 

Ek is dit eens met Geert dat karavane (en ander kamptoerusting) heeltemal overpriced is. Ja, daar is ekonomie van skaal en baie dinge wat met die hand gedoen word en nie op grootmaat nie. Maar volgens ‘n artikel op MM gister is 44% van ‘n nuwe voertuig se prys belasting. Of dit net op gemotoriseerde voertuie van toepassing is weet ek nie, maar veral as dit nie op sleepgoed van toepassing is nie is die goed buitensporig duur. 

So kamp ek :- 

• Ons kamp al 53 jaar sedert ons getroud is, maar nog altyd met 'n teerpad-karavaan
• Ons huidige karavaan is 17 jaar oud en het gelukkig in 2006 R150 000, 2de hands gekos
• Ons het oor die jare talle verbeterings aangebring en hy pas tans ons behoeftes soos 'n handskoen
• Ons is albei 70-plus en het dus nie meer talle kamp-jare oor nie  -  hierdie is dus ons laaste karavaan
• Ons sleepvoertuig is 10 jaar gelede nuut gekoop en het tans 114 000km afgelê  -  dit het ons nog nooit in die steek gelaat nie en ons het al die hele Suid-Afrika probleemvry daarmee gesleep.
• Ons hou van see-vakansies, maar geniet ons nasionale wildtuine baie.  In die Wildtuine slaan ons net die stoeptent met sykante op en by die see waar ons langer op een plek staan slaan ons die voltent op.  Met die voltent sorg ek dat ons hulp het met die opslaan
• Brandstof- en kampeerkoste het aansienlik gestyg en gevolglik kamp ons minder en nader aan die huis.  Ons kamp deurgaans in nie-piek tye om die nodige afslag te benut.

Ons het begin kamp in 1970 toe ek vir die Spoorweë gewerk het en het deur die Kruger getrek en al die ou spoorweg stasies se elektrisiteit ontkoppel. Vir die wat nog kan onthou die spoorlyn het van Komatipoort deur die Kruger geloop na Phalaborwa. Dit is verwyder en loop nou van Kaapmuiden al langs die Kruger. 

Ons het in 'n ou blink aluminium Gypsey met die spits dakkie gekamp en het die karavaan vir R400.00 gekoop. Die wa met 'n Fiat 1500 gesleep. Later toe ons Nelspruit toe trek die wa vir R400.00 verkoop. In 1975 'n Tour-a- Way  opvou wa gekoop vir R1500.00 en die gesleep met Hillman Vogue. 

In 1979 koop ek 'n wit Jurgens met die twee deure vir R5000.00 en sleep dit met 'n Kombi met 'n Ford V6 enjin. Die verkoop in 1990. 

My vrou is oorlede en het toe vir jare net in tente gekamp. Weet alles van goedkoop tente en afblaas matrasse. 

In 2010 ontmoet ek vir Elmarie en koop ons eers 'n Sprite Scout vir R55000.00 en in later die Swing vir R100,000.00. Sleep altwee eers met Landrover Freelander en van 1918 af met ons huidige Ranger. Swing verkoop in 2022 aan Webuycars vir R90,000.00. 

Huidige wa is die 2009 Classique wat ons gekoop het vir R160,000.00 en is baie gelukkig met hom. Met my ouderdom in die sewentigs en Elmarie wat in Mei aftree is dit ons laaste karavaan en beplan ons om van Julie af vir 'n jaar lank te toer. Heelwat aan die wa spandeer om dit vir ons gerieflik te maak. 

Ons kinders kamp almal met ou karavane en tente en met al my goed wat ek oor die jare onnodig gekoop en aan hulle gegee het. Al my waens was gebruikte woonwaens en was tevrede met almal. Behoeftes her net oor die jare verander.

Karavane nuut is baie duur dis hoekom die jong gesin deesdae meer na die 2 handse mark kyk en koop bygese die 2 handse mark raak ook nou duur en alles gepaart met kamp raak ook duur maar kamp sal die mollers van secunda kamp

Vind die gesprekslyn nogal amusant! Klomp ou omies wat (1) kla oor die pryse van nuwe karavane en (2) wonder waarom die jongklomp nie veel ooghare vir kamp het nie. Die realiteit is, dink ek, dat hulle meestal te besig met hulle loopbane en geld maak, en gesien die klomp R1m plus voertuie wat hier in my omgewing rond ry nie juis gepla sal wees deur nuwe karavane se pryse nie, sou hulle die wou koop. Dit is bloot dat hulle belangstellings elders is. Die wat (af en toe) kamp is heel gelukkig met 'n tent opset (niks met prys te make nie) maar verkies om eerder in chalets (die luukser weergawes) vakansie te hou of eerder oorsee te gaan vir vakansies. In alle geval ek dink nie die jonger garde lees juis hier nie? Soos die Ingelse dit het, "preaching for the converted" In tussentyd is die ou omie steeds heel gelukkig met sy '95 Fleetline L, in '99 vir R37k aangeskaf....

Ek onthou iets van ek het dit al geplaas en ja hier is dit, skakel.

En hier is my eerste kamp skakel.

Dis nou wel lank terug geplaas. 🤔🤫😉

Wessel, antwoord op jou laaste vraag rondom ouderdoms verspreiding op die forum is seker "oud", of "baie oud"

Ek is al 'n paar jaar lank nie meer deel van die CP forum nie, lang storie. Ek loer af en toe in maar het geen behoefte om weer daar deel te vorm nie. Noudat ons so besorg is oor onse profiel  is dit interessant dat een van die lede daar reken dat die mense op hulle "opponerende" forum  maar vlakkerig is, ek haal aan: "Ek vind hulle geselsies (en ja, ek neem wel soms mee) uiters vervelig, en geensins in dieselfde trant en diepte as hierdie webwerf nie."  Wonder mos nou na watter "opponerende" forum verwys word? 

Sal ook graag wil weet.

Ek is al baie jare op CP se forum (toe was dit die enigste een) maar volgens hulle het en 20 Jan. 2003 eer aangesluit (dit kom na ek verban was en verwyder was).  Toe Willie nog geleef het en die baas daar was was dit 'n aangename forum maar van sy seun oorgevat het was dit anders.  Jy mag geensins Kampforum se naam daar noem nie dan word die gesprek verwyder en/of jy word geblok.

Van hulle my gevra het om terug te kom is ek ook bitter min op daai forum.  Daar is nou 'n klomp rugstekers en draad sitters.

Ek kan nie onthou wanneer laas ek op cp forum was nie, absoluut geen belangstelling van my kant in daai forum waar twee boere engels met mekaar sit en praat nie.

Laaste wat ek onthou, was juis 'n engels sprekende persoon wat 'n hoe ha gemaak het omdat hy in engels 'n vraag gevra het, en iemand dit gewaag het om hom in Afrikaans te antwoord.

 Daar is nou 'n klomp rugstekers en draad sitters.

Ek glo darem nie almal nie. 

Terug na die naam van die gesprekslyn, ek glo almal ken my profiel, ek is oor 70 en geniet steeds my kampering. Dit herlaai my baterye!!

My inkomste is nie om van huis toe te skryf nie, maar ons oorleef en kan steeds gereeld gaan kamp, met die diesel pryse, nou wel nie meer ver nie.

Ons kamp met 'n uiters luukse pad wa, okay, in my oë uiters luuks want dit is wat ek kon bekostig toe ek my laaste wa gekoop het.

My dogter het sopas hul eerste karavaan gekoop, 'n ou 1993 Penta. Daar is baie werk om te doen aan die wa, maar skoonseun se hande is fluks en hy gaan die wa heeltemal oor doen, daar is dus nog jong mense wat bereid is om onder ( amper 20 x goedkoper as nuut) te begin en op te werk.

Goeie dag mede kampeerders. Ek sit nou en lees hierdie draad en kom tot die gevolgtrekking dat hier  n klomp armgat ou ooms is wat kamp (tong in die kies ). Dit sluit my natuurlik in. Ek raak so aan die 70 se stert hare. Even Anton is al 10 jaar ouer as toe ons ontmoet het.  Kamp al baie jare, het ook maar eers so van die grond af gekamp met n tent. Ons het eers in 2011 n woonwa gekoop , n 2001 Gypsey Regal en met n Isuzu 3,0 KB gesleep.  Sleep van 2013 af met n Audi Q7 3,0 diesel.  Kan ook glad nie die woonwa vervang met n nuwe of n ander een nie. Die Q7 het al 276 000km op en sal ook maar moet hou tot die einde. Die Regal is in elk geval al so verander en ingerig vir ons behoeftes dat ons regtig nie nou belangstel in n ander wa nie, miskien n nuwe Q7 , maar die kool is nie die sous werd nie. Ons sal maar so aanhou kamp tot ons nie meer kan nie. Groete en lekker kamp

Middag Wessel, ja ek is maar 68. Ek moet sê , die Audi trek nog daai Regal dat hy rek merke kry. 

Chris, jy vergeet dat ons nie net armgat ou ooms is nie, volgens die ander kant is ons boonop nog vervelig en definitief nie diep genoeg nie (vlak?). Klink mos nou vir my dat dit as voorvereiste moet geld vir enige nuwe lede om te kan aansluit! Kom nou Anton, vernader daai reels!