Maart 2025 saamgesels

Sommige forumvriende het waarskynlik kontak met Len, en vir die ander: dit gaan nie goed met Annatjie nie. Siende dat ons deel in mekaar se lief en leed, dink asb aan haar, asook Len en hulle kinders wat tans so baie het om te verwerk.

Ek hoop dit gaan gou beter met die tannie. Ek is dankbaar dat julle kinders naby woon sodat julle mekaar kan ondersteun.

Na aanleiding van die Galjoene wat skaars en gewild is, wil ek noem dat ń maat van Gansbaai wat  oor ń week  kom kuier,  so paar Galjoene kom braai. Von sal ń broodjie bak, ek sal paar aartappel wedges bysit.

Ons is nie groot viseters nie, maar kry gereeld van ons Knysna maters af diepsee visse en my gunsteling... Oesters!! Saam ń glasie yskoue droë wit...daar kom bitter min anders naby vir bietjie bederf.

Ek is self  ook 'n sucker vir 'n lekker vars oester. My ervaring is dat Johannesburg en omgewing oor van die beste seekos-restaurante in ons land beskik. Die vars seekos-produkte word op 'n daaglikse basis van die kus af ingevlieg. Sodoende het ek oor die jare verskillende oesterplase se produkte geëet - Knysna, Algoabaai, Saldanha en Port Nolloth. Algoabaai s'n was vir my die lekkerste.

Die een restaurant, net buite Kempton Park, waar ons soms geëet het (naam vergeet), het my bekendgestel aan 'n paar druppels Tequila op elke oester. Hulle bedien dit saam met 'n klein drupperbotteltjie Tequila. Net 'n bietjie varsgemaalde swartpeper en 'n paar druppels Tequila op elke oester - koningskos sê ek jou!!

Nee dankie, ek like niks van oesters nie en nog minder van tequila en nou dit nog saam gooi.  Stoot my oggend koffie nou op...

Gooi ek maar Haberno of Jalepeno sous oor, as daar nie is nie, dan volstaan ek maar met Tabasco​​​​​​​

Die dat Chris B Oesters en Tequila in die plek van Tobasco geniet.  dink neef nou die "stywe pinkie" weergawe vir jou volgende loslyfkuier uit. 

Ons ken almal die tradisionele Tequila shooter. Sout op die bokant van die linkerhand. Skyfie suurlemoen tussen die duim en wysvinger vasgevat. Shooterglasie vol Tequila in die regterhand. Nou lek jy die sout op, gooi die Tequila agter in jou kop, en byt die suurlemoen. Als in een poging. Heerlik.

Nou vir die grênd weergawe. Hou by die sout, maar maak dit pienk Himalaja sout. Ipv suurlemoen, ń Oster met Trev se Habanero sous. Hemel Trev, die goed is seker van die meter af sterk! En jou glasie Goue Tequila. Geniet soos op die tradisionele manier, maar talm net so effens tussen die verskillende stappe, om rond te loer en nie common te lyk nie. 

Pienk sout.... Goue Tequila... Oester met Habanero sous....Wenner.

Waar loop die Maandagoggend gedagtes heen? Wat begin het as oesters en oesters met tequila het nou al skoon shooters geraak.

 Hier is dan ook my bydrae: Ek het eenmaal, toe ek 'n vriendin by haar lodge gaan uithelp het in die kroeg tydens 'n groot funksie geleer wat om te bedien wanneer iemand vra vir 'n oyster shooter. Ek is nie suinig met die resep nie....

Van alle seekos is oesters vir my seker die smaaklikste - nader aan die see te "proe" kan mens seker nie kom nie. Ek bederf dit net nie met enige souse nie - 'n paar druppels suurlemoensap is genoeg. Heerlik!!

Ek het nog ń lekker Tequila resep. Die was nogals gewild by die jong tawwe manne op bv ń ramparty.

Die arme drommel lek die sout, snort die Tequila, en druk die suurlemoensap in sy oog uit. Die gaste lê agteroor soos hulle lag vir die arme siel. 

Ek het so 25 jaar gelede by ‘n lodge langs die St Lucia meer gewerk. Die eienaar het ‘n konsessie gekry om met roeibote op die estuary toere te doen maar wou mekoro gebruik om dit uniek te maak. Ek is aangestel om die bedryf op te stel en die gids te wees omdat ek in Botswana op die delta geleer het om met mekoro - die platboom langwerpige vaartuie wat met ‘n paal op die bodem gestoot word - te ry.
 

Dit was ‘n ervaring en ‘n half. Die seekoeie was glad nie gewoond aan vaartuie nie en het aanvanklik van ver af nadergekom om ondersoek in te stel. Een naweek kom kuier vriende, en ek vat hulle in ‘n kleiner kanaal in waar ek nog nie voorheen was nie. Toe ons om ‘n draai kom is daar ‘n trop seekoeie in die smal kanaal. Ons het eers teen die kant gaan staan tussen die manglietbome en gewag dat hulle rustiger raak. Toe laat ek twee vriende eerste terugroei na die rigting waaruit ons gekom het, en laat die vriend wat saam met my in die mokoro is agterstevoor sit voor my sodat hy kan kyk wat maak die seekoeie terwyl ek die mekoro wegstoot van die trop af. Een jong bul het ons ‘n ent gejaag en toe gelukkig terug gedraai na die trop toe. 
 

Maar ek dwaal af. Ons het ook gaste na Cape Vidal gevat vir ‘n rit op die strand, en daar ete bedien. Een dag was ek en ‘n ander gids saam daar, en het elk ‘n oester met ‘n mes losgewikkel van die rotse af. Varser as dit kry mens seker nie, maar dis nou regtig nie iets wat my opgewonde maak nie. Daardie slymerige gedoente is alles behalwe aptytwekkend. Mossels eet ek van tyd tot tyd want dit kom in ‘n lekker soos en mens kan dit darem soort van kou. 

Die ander ding wat my kwel van oesters, is dat mens hulle lewendig eet. Dit maak dit nog minder aptytwekkend. Maar smaak verskil…

"wat my kwel van oesters, is dat mens hulle lewendig eet."

Ek kruip soms so effe in my dop, maar dis nie te erg nie, mens kom wel oor daardie gevoel

Die ander laat ek vir julle.....

Ek het die slot se rubberproppie met maskeerband toegedraai/plak, toe ek bakkie gekoop het. Dit het goed gewerk, ek kon sonder enige gesukkel die slot oopgesluit kry.

Wens ek het daaraan gedink ek gaan dit die naweek doen. Dankie vir die wenk 

Deel van my jaarlikse "alles check" roetine is om die slot te behandel met WD40 of soortgelyk, so ook die ekstra motorfiets ketting/slot...werk vir my

... dié oubaas sommer wegloop vir 4 maande. ATKV Eiland Spa het my pas laat weet dat hulle my kan help met 'n staanplek vir 2 maande vanaf 3 Junie tot 4 Augustus (danksy 'n kansellasie). Dit kos my R190.50 per nag en sluit die Jun/Jul skoolvakansie in - m.a.w. piektyd. Dan kuier ek saam met my seun-hulle wat ook tydens die skoolvakansie daar is.

Ons vertrek 2 Junie uit Krokodilbrug en soek dus 'n kampeerplek iewers verder noord in die wildtuin vir daardie aand - verkieslik Satara of Maroela. Maar dit is soos om vir wors in 'n hondehok te soek. Ek het voorlopig 'n 2-bed chalet in Orpen bespreek vir daardie aand, maar sal die web-blad gereeld bekyk vir 'n karavaan staanplek in genoemde twee kampe. Danksy 'n krediet wat ek het hoef ek slegs R769 addisioneel vir die nag te betaal.

Uit die aard van die saak sal my inpakkery 'n bietjie anders lyk. Ons hou daarvan om die gazebo en 'n paar lapa-skadunette by Eiland op te rig en dit neem 'n bietjie ekstra plek op.

Volgende Donderdag het ek 'n afspraak by 4x4 Mega World in Somerset-Wes om die Hilux se bak stofdig te maak. My seun s'n werk 100% terwyl myne (wat ek in Hermanus laat doen het) nie so effektief is nie.