Tuine

Dankie vir die mooi foto's, Len en Johann.  Dit is wonderlik hoe 'n paar blommetjies alles kan opvrolik. 

Len, ek hou van die samestelling van potte en klippe in daai bedding, lyk of dit voor julle huis is.  Lyk baie mooi.   In die foto van ons eie tuin, in die hoek, het ons net so dammetjie soos joune met die eend.  Die seuntjie wat daar staan is veronderstel om daarin te piepie.   

Johann, jou items lyk net so mooi.   Pragtig, daai geel lelie met die geel gesiggie daarby.   Julle het darem kleur, ons het geen blommetjies op die oomblik nie.  Eintlik moet ek erken, ons is te lui om te sukkel met die natmaak, dus los ons maar.

Herman, dit moet soos hemel op aarde voel om so tussen die berge te bly.   Kom, wys vir ons nog.  Jy het mos self baie oulike goed daar om julle huis gedoen.

Wow, Johann, kyk net daai pragtige roos.    Rose is by verre my gunsteling blom!    Addo is mos groot rooswêreld en het een keer 'n jaar 'n roosskou.   Ek het jare gelede soontoe gegaan en 'n hele klomp roosbome gekoop.   Die vrou daar het my presies verduidelik hoe ek hulle moet plant en versorg.   Ek was vol hoop, maar dit het nie gewerk nie.   Dit het 'n rukkie goed gegaan maar hulle het later een vir een agteruit gegaan.   Die Baai is nou net eenvoudig nie die plek vir rose nie.   Dan het ons al deur dorpe gery, dan groei die rose sommer langs die pad of rye daarvan op middelmannetjies in die pad.   

Terwyl ons nou van blomme praat wat aard of nie aard nie.  Ek het ook altyd in my tuin baie Impatience gehad, die een met die klein blommetjie, meestal wit en skakerings van pienk.   Hulle het sommer maklik vanself opgekom en vermeerder.   En toe vrek hulle eenvoudig, nie net by my nie, oral hier by ons.   Toe hoor ons daar was 'n siekte wat hulle vernietig het.  Sedertdien kry jy hulle glad nie meer nie, net die groter een wat nie dieselfde is nie.   Ek wonder of dit nog in ander dele van die land groei?

Sarel, kan jy glo, dis 'n klein wêreld.  Ons eenheid is in dieselfde pad as waar jy gebly het, net soos jy by Dijon se hek inry, draai jy regs, dan is ons 3 huise van die hek af.    Ons eenheid is heel laaste gebou en nie deur die oorspronklike bouer nie.  Die fondamente het 8 jaar lank gelê, toe koop 'n man en sy seun dit en bou die huis self klaar.      Dit is 'n gewilde kompleks, word baie goed bestuur en onderhou en is finansieel gesond.  Ja, Lorraine was mos eers 'n plaas en dit het jare lank 'n plaasgevoel gehad, selfs nadat huise begin opgaan het.   Dit het lank gevat voor al die paaie geteer was.

Spek, ons Staffie het ook 'n paadjie reg rondom die huis gehardloop.  (Dis nou 'n vorige, regte huis wat ek van praat).    Hy het  van die een hek na die ander hek gehardloop om beter te kan sien as hy iets of iemand voor in die straat sien of hoor.  Dit het party dae geklink soos 'n perd wat om die huis hardloop, so haastig was hy.   Hy het ook baie goed plat getrap, was lief vir jag in die beddings.

Dankie Hennie.  Dit lyk mooi en baie netjies.  Ek hou van sulke groot beddings, veral as jy genoeg plek het daarvoor.   Ja, as jy gewoond is jou gras is mooi groen is dit nie lekker om te sien as die droogte hom knou nie.   Ons het altyd baie molle gekry, ten minste stoot hulle nie nou onder ons gras nie.

Lolla, tog te oulik.   Mens kan sien daar word genoeg geswing, die kabouters het al 'n sloot getrap.  Ek het ook 'n lavender in 'n pot.   Hy soek mos baie water, so mens moet daai pot nat hou anders raak hy stokkerig en hou op met blom.   Ek het op 'n stadium kruie geplant maar net die ment het bly groei.   Ek het seker maar nie groen vingers nie.