Wildehont se nuwe ou Ranger

Wessel, ek het self in die kappie geklim en Salomien laat water spuit met die spuit gestel op sproei. Die water het by die voorste hoeke ingeloop. Dis toe ek buite kyk en sien die sykante van die bak is ‘n mm of twee hoër as die voorkant. Ek het die boute op die hegstukke in die hoeke verstel om die rubber onderaan die kappie se raam te probeer kry om beter te seël maar dit het nie gewerk nie. 
 

Soos ek genoem het, moes ek wag vir hulle om klaar te maak met ‘n kappie wat hulle op ‘n Navara gesit het toe ek daar was, en ek het gesien hoe toets hulle dit vir water lek op dieselfde manier as wat ek en Salomien getoets het. Ek verwag dieselfde diens. Ek het aangedring op die standaard 3 jaar waarborg al was die kappie tweedehands en het dit gekry. Ek gaan dus terug. 

Hierdie week is heel party besighede nog gesluit hier. Die skole begin eers 17 Januarie, so baie mense is nog met vakansie. Dis die laaste keer wat die kus provinsies se skole later begin as die binnelandse provinsies. Van die Maart skoolvakansie af sluit en begin die hele land se skole op dieselfde datums. Ek dink dis ‘n fout. Dit plaas meer druk op die verkeer en paaie en ook op die vakansiedorpe en fasiliteite. 

…vertel ek maar die brokkie nuttelose inligting. Ek was by Jaffe’s Ford om uit te vind oor die trailer patch control wat die flikker van die Kavango se LED ligte moet voorkom. Die verkoopsman het dadelik geweet waarvan ek praat, en een gaan haal om dit vir my te wys. 
 

Dis ‘n vroulike sleepwa sok soos die een wat agter langs ‘n voertuig se haak gemonteer word, met manlike prop soos die van ‘n sleepwa/karavaan wat by die voertuig se sok inprop aan die ander kant van ‘n kabel van omtrent 40cm. Dit moet by die Ranger se vroulike sok ingeprop word, en die Kavango se manlike prop by die sok aan die ander punt van die kabel.
 

Dis baie onprakties en kos R572. Die vroulike sok aan die een punt is boonop plastiek. Die manlike prop aan die ander punt is darem metaal. En dan sit mens met die ekstra lengte draad en ‘n sok wat in die lug hang tussen Ranger en Kavango. Anders moet jy die gedoente aan die Ranger se trekstang vasmaak, maar dan sit jy met ‘n plastiek sok waarby jou wa moet inprop. 
 

Ek gaan by Hein die auto-elektrisiën uitvind of hy nie die nodige resistors op die bestaande sok kan inbou om die weerstand reg te kry sodat die LED ligte van die Kavango nie flikker as ek die Ranger se hoofligte aansit nie. Die verkoopsman het gesê die regte auto-elektrisiën sal weet hoe om dit te doen. Ek is net bang dit beduiwel dalk die BCU se brein. Ek sal graag wil hoor wat Grootwind sê. 

Wessel, ek dink dis dalk net ‘n Ranger probleem. Soos Grootwind verduidelik het, het die Ranger twee breine. Die ECU wat die enjin beheer en die BMU wat ligte en ander goed beheer. Kyk maar en laat weet. 

Ek het nie die probleem gehad met die Everest of Prado nie. 

dis darem onverstaanbaar dat nuwerwetse voertuie se hoë tegnologie mens so kan pootjie.  

Hier by ons is ligte nie 'n prioriteit nie, ons ry nie meer in die skemer en donker nie.

Na my mening is dit ‘n ontwerpfout. Ford moes dit getoets het, en reeds die resistors ingebou het in die sok om te voorkom dat LED ligte flikker of nie reg werk nie. Die bakkie het met ‘n haak en sok vir sleepwa ligte uitgekom, dis nie na die tyd opgesit nie. Dit is dus Ford se fout, niemand anders s’n nie. 
 

Dit Ranger het soos meeste voertuie Deesdae running ligte voor wat nie afgeskakel kan word nie. Van voor af is dit dus sigbaar. Ek skakel egter my hoofligte aan op gedompte verstelling wanneer ek langpad ry. Dit doen ek in die dag ook, en ry ook sover moontlik net in die dag.
 

As die bakkie se hoofligte aan is, is die wa se parkeerligte ook aan en is dit meer sigbaar in toestande soos reën wat sproei veroorsaak wat deur die wiele en turbulensie opgegooi word ook nog. Die Kavango het wel weerkaatsers soos deur die wet vereis, maar as die persoon agter jou se ligte af is help dit niks. 

Hulle sal my laat weet wanneer ek dit kan bring. 

Ek gaan dalk pakslae kry hieroor, maar gegewe die Ranger se ouderdom het ek na aanleiding van Pierre Nolte se raad (wat bevestig is deur verskeie forums hier en in Australië en ander eienaars) besluit om die EGR en DPF te laat uithaal/omseil. Daar was al ‘n hele paar gevalle waar die verkoeler van die EGR op die voertuie opgepak het, en in sy ergste vorm lei dit daartoe dat jy water verloor wat die enjin (en in die outo se geval die ratkas) verkoel. Uiteraard kan dit tot groot en duur skade lei. Die uitlaatgas wat deur die enjin gaan kan ook lei tot die opbou van ‘n koolstof neerslag. 
 

Dis ‘n duur besigheid om dit te laat omseil, want op die 3.2 outo sit die EGR op ‘n baie moeilike plek en dit vat heel dag. Dan moet ‘n program gekoop en gelaai word om die ECU nie die voertuig in limp mode te laat plaas as dit agterkom die EGR werk nie meer nie. Dit kos altesaam R5000 waavoor ek glad nie begroot het nie.
 

Dan kom daar nog ‘n diens by met moontlik ‘n paar ander onderdele wat vervang moet word. Dis maar die ding van ouer voertuie. Gelukkig weet ek dan die voertuig behoort my so lank te hou as wat ek dit benodig. 

EGR staan vir exhaust gas recirculation. Dit het uit en uit te doen om ń hoeveelheid uitlaatgas te hersirkuleer. Morsige besigheid om vir ń enjin vuil uitlaatgas te laat inasem.

Dis die ander rede om dit uit te skakel.