Eerste Desember kamp

Ons het gister, 27 Desember, by Bass Lake Lodge Caravan Park aangekom.  Eerstens, ons het glad nie nodig gehad om uit ons voertuig te klim nie, want Ella het ons in die pad voor die Ontvangskantoor ontvang en verwelkom, asook aanwysings na ons staanplek (no 34) gegee.

By die staanplek aangekom, onmiddellik opgemerk dat die gras mooi groen is en die staanplek besonders ruim is.  Was bietjie bekommerd oor die afwesigheid van bome aan die suidwestekant (die rigting wat ons tent so wees) en ook die feit dat ek die tent extension by die huis gelos het, maar sover is dit nie ‘n probleem nie.

Het bietjie pyn gehad met die movers en die nuwe LifePo4 wat nie met mekaar wou gesels nie - ek vermoed die Apollo 10 charge nie die battery vol nie - maar net toe hulp (een van Bass Lake se werkers) opdaag, besluit die movers en die battery dat hulle mekaar nou redelik ken en kon ek die wa op sy plek kry.

Terwyl ons besig was het nog ‘n werker opgedaag met 2 glass lekker koue vrugtesap wat op daardie stadium in die hitte baie welkom was.  

Ella het ook later ‘n draai by ons gemaak om ons verder te verwelkom en meer van die aktiwiteite by Bass Lake te verwelkom.

Die res van die dag was dit kamp opslaan en uitpak, met ‘n vinnige stap verkenning van die kampplek na aandete.

Word vanoggend wakker en dit klink of dit reen - maar was net genoeg om my te kry om die vents toe te maak - want net nadat ek dit toegemaak het - hou dit met op met reen.

Daarna, dan is dit bewolk, dan kokend warm, dan stoffies dit, dan waai die wind so bietjie.   Toe dit nou lyk of die weer besluit het wat dit wil doen, het ons so rukkie lank in die swembad gaan le en daarna by die wa gaan sit. Eintlik het ek in die wa gaan le met die air con aan - want toe is dit verskriklik warm.

Het later so vleisie op die kole gegooi - heerlike lamstjops van Mondanette in Irene (Grootwind se wereld), en Woolies hoenderkebabs en Wagyu wors.  Was dit tesame met knoffelbrood en ‘n nie-alkoholiese rooiwyn (druiwesap wat op dieselfde manier as rooiwyn gemaak word in eikehout vate maar tot voor die fermenteer) - die naam is Inah Superior Products, nou ‘n lekkerlip maal 

@Rhona, 11 uit 10 vir jou - jy is reg wat SWAMBO voor staan. Alhoewel ons mans ons vrouens so laat glo😂

Hier is n paar fotos van Bass Lake - hou in gedagte dat fotos neem inmeng met die doelwit van “niksdoen” 😄

Die aktiwiteite by Bass Lake sluit in koue water swembad (2 x kiddies en 1 groot swembad), 2 damme vir visvang, swaaie, springmat, stap, voëls kyk, en dan natuurlik net stil sit en die natuur waardeer.  Hier is ook ‘n lodge met restaurant (ons het gister koek en koffie daar geniet) en ‘n spa as mens SWAMBO (of is dit beterhelfte of wederhelfte) en jouself wil bederf.  

Bass Lake op sig self is nie ‘n wildsplaas nie, maar daar is ‘n paar bokke, zebras - en dan vanoggend het ons ‘n leeu of 2 gehoor - daar is ‘n wildsplaas net agter die koppie.  Het ook gisteraand ‘n paar jakkalse gehoor.

Die plek is so 40 kilometer buite Pretoria op die Moloto pad (teerpad) en dan so +- 2km grondpad, wat mens maar stadig moet ry as jy ‘n padkaravaan het soos ons.

Baie dankie almal vir die verwelkoming - ek lees nou al vir ‘n paar jaar - maar soos reeds genoem - het ons maar min gekamp - alhoewel ons die Exclusive al vir ‘n paar jaar het.

So ons is maar leke wanneer dit by kampering kom

Dag 3, maar eers moet ek vertel van nag van dag 2.  Dag 2 (of is dit nou aand 2) het begin met so ‘n lekker sagte reenbui, maar later deur die nag toe storm dit vir so ‘n uur of 2 en het vir van die kampeerders skade veroorsaak - soveel so dat van die kampeerders so teen 1vm se kant opgepak en huis toe gery het.  

Een van die tent dakpale het gebuig as gevolg van water wat opgedam het op die tentdak - gelukkig het ek ekstra pale ingesit en kon dit dus vervang.

Dan dag 3 - dag van soveel as niksdoen wat mens moontlik kan doen.  Dis nou nadat ons die tentpaal vervang het. Gelees, nuwe kampvriende ontmoet, en net die bosveld vanuit ons gemakstoele besigtig. O, amper vergeet ek dat ek die wit troon vir ‘n uitstappie moes neem om dit te wys hoe lyk Bass Lake se “porta potti” kamer.

Later die middag toe laat ons maanhaar vriend van hom hoor en hy doen dit toe weer later die aand - meer amper so ‘n gebrom as ‘n volwaardige gebrul.  Ons gevolgtrekking, nadat ons die probleemstelling bepaal het en “desktop research” gedoen het oor hoekom die gebrom en nie gebrul, was dat die leeu super trevrede was met sy vangste vir die dag.

Daarna was dit ‘n potjie op die kole vir aandete.  Nag 3 was ‘n baie rustig nag met ‘n paar druppels reen wat geval het, maar nie so erg soos nag 2 nie.

Kry vroegoggend ‘n oproep van takealot drywer dat hy by ons huis se hek is met die lithium battery laaier wat ek bestel het.  Ons seuns het dit toe later na ons toe gebring - die laaier wys toe dat die battery maar op ongeveer 30% - die laaier werk op ‘n app wat jy op jou selfoon kan monitor. 

Dit het so ongeveer 2 ure gevat vir die battery om vol te laai.

Die seuns het toe vir die dag by ons gekuier en saam met ons die niksdoen geniet - hulle is toe later huis toe want die hondekinders moes kos kry.

Sover geniet ons nog Bass Lake - die rustigheid, die vriendelike diens, en die skoon en netjiese badkamers maak die kampeerdery baie aangenaam. 

Wessel, Die battery is ‘n LifePO4.  

Die battery was oorspronklik gekoppel aan die wa se normale stelsel, dus was dit verbasend dat die battery so laag was, veral met die feit dat die batter slegs vir die movers gebruik word.