Roemenië - 2023

... kyk hoe lekker eet so 'n Suid-Afrikaanse klong nou aan (wat ek dink) 'n tipiese Suid-Afrikaanse lekkerny  is- vetkoek met kerrie-maalvleis. My braaitande is nou wel getrek, maar lekker-eet hier in die vreemde het nie agterweë gebly nie. Afgesluk met 'n Roemeense Sauvignon Blanc - eerste klas.

Dit is waar Hennie - die ou lyf verlang na 'n stukkie braaivleis. In die verlede het ek op die woonstelbalkon gebraai, maar nie meer nie. Sedertdien is daar nuwe intrekkers in die woonstel bo hulle (hulle woon op die derde vloer van 'n vierverdieping gebou). Die destydse boonste bure was tegemoetkomend wat die rook aanbetref, maar die huidiges het dit laat verstaan hulle hou nie van die rook nie - verstaanbaar.

'n Suid-Afrikaanse vriend van my kinders wat eens in Bucharest gewoon het (nou in Zagreb - Kroasië) het vertel van toe hy die eerste keer op sy woonstelbalkon gebraai het, het die sekuriteitswagte van die kompleks waar hy gewoon het, hom onder van die grond af "gevloek" toe hulle die rook sien (hy het op die boonste vloer gewoon). Hy't gesien die ouens wys na hom en skree iets in Roemeens, maar o.a. het hulle baie duidelik "fok" geskree. Hy't eers later uitgevind dit is die Roemeense woord vir vuur.

My dogter is erg vol strooi as dit kom by vleis. Die algemene vleis is vark en hoender - indien laasgenoemde kwalifiseer as vleis. Hier in Calarasi is darem 'n netjiese slaghuis wat net beesvleis hanteer. Sy soek haar snitte van absolute "skoon" vleis uit - menende dat daar nie 'n teken van vet aan die vleis moet wees nie - en laat dit daar maal.

Ons het nie hierdie keer Mrs Balls blatjang saamgebring nie, want haar voorraad is nog goed. Ons het wel appelkooskonfyt gebring, maar sy kook ook haar eie. Sy't genoem dat sy o a. bobotie op die spyskaart het as twee van hulle Amerikaanse medewerkers volgende week hier is. Ek moet sê, my dogter is nogal 'n knap kok. Sy't o.a. voedseldiensbestuur aan die destydse Kaapse Technikon Hotelskool studeer, waar hulle uiteraard baie praktiese tyd in die kombuis deurgebring het.

En ja - hulle praat Roemeens. Hulle het dadelik 'n privaat "tutor" gekry toe hulle meer as 20 jaar gelede hier kom woon het. My dogter het die taal vinnig geleer, my skoonseun het aanvanklik bietjie gesukkel maar praat nou goed. My kleindogter is hier gebore (sy word eerskomende Dinsdag 17) en het amper in Roemeens grootgeword. Alhoewel hulle huistaal Afrikaans is, is Roemeens eintlik maar haar eerste taal.

Beesvleis word by genoemde slaghuis in "hompe" (vakuumverpak) verkoop. Jy soek jou spesifieke pak vleis (jy moet die hele een koop) en die slaghuis sny dit of maal dit vir jou. Net beesskenkel (shin) is reeds in skywe gesaag en individueel vakuumverpak.

Die gemiddelde prys is sowat R140/ kg, maar dit is puik gehalte vleis. My dogter koop ook haar beesvleis daar as sy biltong maak. Sy gebruik Suid-Afrikaanse Freddy Hirsch biltongspeserye en hang dit in 'n klein biltong "box" wat my skoonseun prakseer het met waaiers wat lug insuig en uitsuig. My kleindogter is gek oor biltong. Wanneer hulle in SA kom kuier moet oupa sorg dat daar ten alle tye biltong en droëwors in die huis is. En nie wildsbiltong nie - dit moet beesbiltong sonder vet wees.

dalk n paar van hulle stoepsit jare daar gaan bly, op die 4de vloer bokant hulle. 

En dan ongehinderd braai sonder om mense bo jou met rook te pla. Nee - die 4de vloer sal nie werk nie. Hier's nie 'n "lift" nie - jy klim dus trappe. As ek voel hoe voel drie stelle trappe soms, dan weet ek nie of ek kans sien vir nog 'n stel nie - die ou rugbyknieë wil nie meer lekker saamspeel nie.

En buitendien - hulle somers is te warm en hulle winters te koud.

Nee Neef - hulle het nog nie burgerskap nie, net permanente verblyfreg. As sendelinge het hulle nie 'n vaste inkomste nie en dit is 'n vereiste. My kleindogter kan egter as Roemeens-geborene op 18 wel aanspraak maak op burgerskap. Die "association" waarby my kinders betrokke is, het my dogter nou as sekretaresse aangestel. Sy sal dan 'n salaris verdien wat haar kanse op burgerskap mag bevoordeel. Hulle het nietemin besluit dat dit hulle land van die toekoms is en alhoewel hulle terugverlang na baie aspekte van Suid-Afrika (o.a. die wildtuin), het hulle geen begeerte om terug te keer SA toe nie.

Die kleindogter begin nou met haar Graad 12 jaar en beoog om daarna in Frankryk by 'n "Culinary School" te gaan studeer. Haar kop staan ook, soos haar ma s'n, in 'n voedselrigting.

As ek sien hoe veilig dit hier is, kan ek verstaan hoekom hulle hier wil bly. Hier loop ons saans tot wie weet watter tyd ongehinderd in die strate rond - sonder enige vrees. Ek wil nie eens saans in Kleinmond in my eie straat gaan loop nie.

Ek sien vanoggend tydens my en Ralie se oggendstappie die volgende stukkie graffiti op 'n muur: "I asked God for a bicycle, but I know that is not how God works. So I stole a bicycle and asked God for forgiveness."

Dit laat my toe sommer dink aan 'n ander stukkie graffiti wat ek jare gelede op 'n winkelmuur in Grabouw gesien het: "Ek is 'n kind van Gam. Daarom is steel oraait."

... my dogter het gou op Google geloer. Dit was 'n ontploffing, inderwaarheid 2 ontploffings, by 'n gas-vulstasie in 'n dorp naby aan die hoofstad Bucharest. Twee persone is dood en 58 ernstig beseer, waaronder 35 brandweermanne wat opgedaag het vir die eerste ontploffing en toe verras is deur die tweede ontploffing. Hier in hulle dorp is ook verskeie gas-vulstasies. Hier is 'n klein persentasie voertuie wat op LPG loop wat blykbaar aansienlik goedkoper is as petrol of diesel.

Daar is nie vanaand plaaslike nuus gekyk nie, want hier het 2 Amerikaners kom eet wat van môre af kom teëls lê in die gebou wat hulle inrig vir hulle "ministry" werk.

... dat ons ook 'n bietjie koeler weer hierdie kant het - die voorspelling is slegs vir 30 grade vandag. Hier was gisteraand 'n taamlike donderstorm met lekker reën wat die omgewing afgekoel het. Ek en Ralie gaan stap soggens, maar vroegoggend is dit gewoonklik sommer al warm sodat jy weet jy gooi sweet af. Vanoggend se stap was egter verfrissend.

Vanaand is dit hierdie ou se beurt om vir die twee Amerikaners wat hier kom teëls lê het kos te maak. Bobotie en geelrys met pampoenkoekies is op die spyskaart vanaand.

Ek vind nie Calarasi se humiditeit-voorspelling nie, maar Bucharest word aangedui vir 70% vandag en Constanta (teen die Swartsee) se voorspelling is vir 71% vandag. Calarasi  is naastenby presies halfpad tussen genoemde twee.

Hier trek tans so 'n welkome ligte briesie, die deur na die balkon staan oop en dit voel nog nie nodig om die lugreëling aan te skakel nie.

As ek kyk na die langtermyn-voorspelling blyk dit dat die temperature darem nou gaan begin afneem. Vanaf Maandag (4 Sep) tot en met Donderdag (14 Sep) wissel die temperature tussen 21 en 30 grade. My kinders is nie baie "happy" dat die einde van die somer begin aanbreek nie, want hulle winter is die teenoorgestelde met uiters straf koue en sneeu. Minus-temperature is dan aan die orde van die dag.