Kgalagadi Oktober 2026

Len het ons verskeie kere op hierdie forum herinner hoeveel slapies daar oor is voordat hulle wildtuin toe vertrek. Nou ja, nou is dit my beurt om te sê: Nog net 22 slapies oor voor ons op 4 Okt die pad vat tot Vanrhynsdorp vir ons eerste oorslaap (van twee) voordat ons Kgalagadi aandurf.

Ek beplan om met die heenreis via Stellenbosch en Malmesbury te ry. Die blote feit dat ek op 'n Sondag vertrek maak dit 'n aanneemlike opsie, want Stellenbosch se verkeer kan 'n mens die mure uitdryf op weeksdae. En met die terugkom reken ek om aan die voet van die Piekenierskloofpas af te draai na Porterville en via Worcester terug te keer ten einde die Stellenbosch malhuis op 'n Vrydag te vermy.

My beplanning (en besprekings) is ook twee verskillende roetes tussen Vanrhynsdorp en Upington. Die heenreis sal via Calvinia, Brandvlei en Kenhardt wees. Die terugreis vanaf Augrabies sal via Springbok en die N7 wees. Die pad tussen Augrabies en Springbok het ek baie jare gelede laas gery.

Ek het ook intussen my oorslaapplek in Kamieskroon gewysig. Ons sou by Kroon Lodge oorbly, maar gaan nou by 'n meer gerieflike Lekkeslaap selfsorgplek oorbly (Lucas Family Cottage).

... tussen die voet van Piekenierskloofpas (Piketberg-kant) is daar 'n teerpad wat wegdraai  na Porterville. As jy van Porterville se kant kom, reg jy reguit deur die dorp (sonder om weg te draai Piketberg toe) en sluit by die N7 aan enkele kilometers vanaf die voet van Piekenierskloofpas.

... ja, 4 Okt lê om die draai. Môre oor twee weke moet ons die park betree by Twee Rivieren. Die bymekaarpak vir die groot inpak moet eersdaags begin. Vir daardie doel moet ek nog o.a. by Joey's se deli in die Strand uitkom om my boerewors-voorraad aan te vul. Gelukkig vat ek minder items saam, want dit is mos 'n witlaken-trip. Kaapse voggies is vanaf Van Loveren en Badsberg Kelder af bestel en behoort hierdie week afgelewer te word.

Die Kalahari het blykbaar goeie reën gehad. Die veld sal waarskynlik groen wees - iets wat ek nog nie daar beleef het nie.

Wat Leeudril 4x4 aanbetref moet ek nog besluite neem. Mammie klink geensins opgewonde oor dié idee nie. Ek is net bang dat daar soortgelyke uitdagings op dié roete is soos wat Neef beskryf t.o.v. die pad Gharagab toe. Dan is ek waaragtig in die spreekwoordelike dog box. 

Terloops - gepraat van witlakens. Ek voorsien dat die Ou Lady se wiele eers weer April 2027 gaan rol. Ons weer het nog nooit saamgespeel om die grondnette en stoeptent skoon te maak sedert ons op 31 Julie teruggekeer het nie. Vandag word egter 'n mooi dag voorspel en die tuiningenieur is hier. Die hoëdrukspuit sal dus vandag sy deel moet doen.

... ja, ek is bewus van daardie reëling wat hulle in Kgalagadi het dat jy moet aandui watter roete jy gaan ry en dat jy weer moet aanmeld as jy terugkeer.

Ek het al baie keer gedink dat so-iets in die wildtuin ook gedoen kan word. Dit het menigmaal deur my kop gegaan wat sal gebeur as jy gestrand is op 'n roete wat min gery word - veral laat in die dag. In Shingwedzi is ek baie lief om met my namiddagrit die S101 te gaan ry. Dit is uiters selde dat jy ander voertuie op daardie kry - veral laatmiddag. Sou jy een of ander teenspoed daar ervaar, is jy nie op 'n hoofroete met meer verkeer nie. Dan is jy waarskynlik gestrand vir die nag.

Of moet ek maar eerder die stiller roetes gedurende die laat-namiddae vermy?

As daar selfoonsein is waar jy jou begeef.

My kampvrieskas is aangeskakel en meeste van die bevrore items wat saamgaan is reeds in dié kas gepak. Die kas bly die hele tyd agter in die Hilux aangeskakel. Terwyl ons ry, natuurlik op 12V en by ons oorslaapplekke (waar ons net 1 aand oornag) sal 'n elektriese kabel na die Hilux aangelê word vir 220V oornag.  By al die plekke waar ons langer as 1 nag oorbly, sal die kas uit die Hilux gelaai word. Ek wil nie onnodig die kas blootstel aan Kgalagadi se paaie nie.

Ek het beplan om môre Strand/Somerset-Wes toe te gaan om o.a. my Joey's boerewors-voorraad aan te vul - ek het té min vir die saamneem. Ek wil ook by Honda in Somerset-Wes uitkom om te verneem of hulle my kan help met die sleutel vir die ghawwermint se Amaze. Die battery (in die sleutel) het die gees gegee. Ek het die battery vervang, maar nou werk niks. Ek wonder of die ou met die 10 duime nie bollie aangevang het nie.

Maar nou't Christo Prins, wat deesdae die werk aan die Ou Lady doen, laat weet dat hy môre die nuwe tru-kamera kom installeer en ook wil kyk hoe ver hy met ander dinge kan kom wat gedoen moet word. Dus verander die beplanning vir Somerset-Wes toe gaan na Woensdag.

Afgesien van die boerewors wat nog vakuumverpak moet word, moet daar ook nog hoender- en steak-sosaties gekoop en vakuumverpak word.

Baie van die inpak-items is reeds bymekaar gesit. Die groot inpak word vir Saterdag beoog. Ek hoop om nie later as 08:30 Sondagoggend hier weg te kom nie. Ons wil nog eers by 'n ou vriendin op Moorreesburg gaan dagsê voordat ons die laaste deel van die dag se skof Vanrhynsdorp toe neem - waar ons in  Lekkeslaap-akkommodasie (Mountain View Gastehuis) oornag. Ons het die verbysterende afstand van 382 km tot Vanrhynsdorp.

Maandag se skof is bietjie verder (508 km) tot by ons slaapplek (Elim Gastehuis) op 'n eiland in die Oranjerivier buite Keimoes.

Yip - die vleis en vis het almal lêplek in die vrieskaste gekry 

... die ou battery het nog gewerk, maar duidelik aangetoon dat dit nie elke keer lekker sy "job" doen nie. Toe 'n nuwe battery gaan koop en ingesit. Ek is darem oortuig ek het dit reg om ingesit. Daarmee maak die sleutel niks. Sit ek die ou battery terug, gebeur daar ook niks. As jy die toepaslike knoppie op die sleutel druk is daar 'n rooi liggie (ook op die sleutel wat veronderstel is om aan te gaan - maar niks gebeur nie. Daarom gaan ek maar na Honda en hoop dat hulle my probleem kan oplos. Intussen kan die Honda darem nog ry.

... nou kan ek al sê "oormôre vat ons pad" - dit is nie meer iets wat ver in die toekoms lê nie. Die meeste van die saamvat-items is bymekaar gepak en inpakkery in die Hilux sal seker môre gedoen word.

Ons berei ons voor op "warm kry" en vertrou dat die park se paaie nie te rof sal wees nie.

... (en hoop dat ek reg dink) dat alles nou aangeskaf is vir die groot inpak. Die laaste van die paar kruideniersware wat vir die wis en die onwis saamgaan en 'n paar bottels hardehout is gou vanoggend aangekoop. Die ander Kaapse voggies is vooraf bestel by Van Loveren en Badsberg Wynkelder en afgelewer.

Nou jeuk my agterent om die Hilux te begin pak. Dit kan mos maar in die garage bly staan tot Sondagoggend. Die kampvrieskas sal agterin op 220V bly staan totdat ons ry.

Beide Lekkeslaap-plekke waar ons oorslaap (Vanrhynsdorp en Keimoes) het al WhatsApps gestuur om my te herinner dat ek nie moet vergeet om by hulle te kom slaap nie.

As ek kyk na na YR.no se langtermyn-voorspellings kan ons onsself maar regmaak vir warm kry. Eerskomende Donderdag, wanneer ons in Nossob arriveer, word 36° voorspel. Die swembroeke word dus maar ingepak - dit is vir wanneer ek kans sien om my boeppens ten toon te stel.

Pokkit - sien ek nou uit daarna wat oor die volgende 3 weke voorlê.