Die Noorde wink alweer

Ons het toe eergistermiddag met die S94 gaan ry en teruggekeer met die H1-5. Maar die mopanieveld is ruig en groen - jy sien maar moeilik wild tensy dit amper in die pad staan. Terloops, ek het gaan uitvind, Letaba het Saterdagnag 44 mm reën gehad. En ons het dwarsdeur dit geslaap sonder om daarvan te weet. 

Met die terugkeer kamp toe het ons eers gou weer by die hiëna-den gaan loer. Die grotes was weg, maar twee opgeskote hiënas het hulle jonger boeties en sussies opgepas - of liewer karnuffel.

Gister het ons verskuif Mopani toe. Dit is toe wat ons gou gaan inloer het by Tsendze om Len en Koos se plotte te gaan afneem waar beide van hulle later dié jaar kom kamp. Tsendze is tans 'n groen lushof. Dankie Len vir die deel van Rodger en Elinah. Laasgenoemde was nie daar nie, want sy is tans af en by haar huis (buite die wildtuin). Terloops - hulle is nie 'n 'couple' nie, maar kom goed oor die weg met mekaar. Rodger is 'n fotograaf van formaat. Hy't al vir my die mooiste foto's gewys van sy 'sightings' wanneer hy met sy aftye huistoe ry of terug.

Soos wat ons noord gevorder het, kon jy agterkom jy betree al hoe meer die wêreld van die grootvoete. Olifante word meer en meer prominent. Ons het gister verskeie teeltroppe gesien.

Hierdie twee ouens het hulle vir bykans 'n kwartier lank snaaks gehou en stadig al in die pad voor ons gestap sonder om links of regs uit te wyk. Hulle wou maar net duidelik hulle stempel afdruk en sê: "Dit is ons plek hierdie".

Ons het 'n pragtige chalet in Mopani. Jy is tussen die bosse en weet beswaarlik van jou bure. Met die huidige hitte kyk 'n mens maar vir ongenooide vriende. Hoeka my as af geskrik toe ek skielik in 'n groooot gepantserde rotsakkedis vasloop op die paadjie na ons chalet. En ek weet nie wie't gisteraand die grootste geskrik toe ek my flits aanskakel om na die vleis op die kole te kyk nie - ek of die ratel?

Vanoggend wil ons die S143 (Tropic of Capricorn Loop) gaan ry en hopelik van die skaarser wildsoorte soos bastergemsbokke, tsessebe's en elande sien. Terwyl ek hier tik, roep die visarend oor die Pionierdam. En die seekoeie honk-honk al sedert gisteraand.

Ons was toe nie heeltemal so gelukkig met die skaarser wildsoorte waarvoor ons op die "Tropic of Capricorn Loop" gehoop het nie, maar het darem tsessebe's gesien. Maar die hordes blouwildebeeste en bontkwaggas het daarvoor opgemaak. Soos wat die naam van die "loop" aandui, strek dit oor die Steenbokskeerkring.

Ons het vanmiddag sommer net 'n kort draaitjie gaan ry - na die Shipandani-skuiling. Oppad daarnatoe het ons darem een van die skaarser spesies gesien, te wete die Tropiese Grysbok - ook bekend as Sharpe's Grysbok. Maar een van die beste "sightings" wat ek nog gehad het van die bedreigde saalbek-ooievaar, was langs die laagwaterbruggie oor die Tsendzerivier by Shipandani-skuiling.

Shipandani-skuiling is een van slegs twee skuilings wat snags uitverhuur word om oor te slaap.

Daar is 'n lekker beskermende braai-area.

Dit het slaapplek vir 6 persone. Dit beskik oor toiletgeriewe, maar nie stort- of kombuusgeriewe nie. Die sleutels vir toegang tot die geriewe kan 'n halfuur voor hek- sluitingstyd by Mopani-ontvangs afgehaal word en die skuiling moet vroegoggend ontruim word. Matrasse vir die beddens (wat opgeslaan staan deur die dag) word in 'n toesluitkas geberg. Jy moet jou eie beddegoed voorsien.

Afgesien van uitstekende voëllewe, is die seekoeie ook baie bedrywig voor die skuiling.

Indien ek nie môre terugvoer gee nie is dit omdat my data-gedeelte van my kontrak "op" is. Maar 1 Feb kry ek weer my volle kwota.

... om foto's gelaai te kry. Ek het al lang stukke getik om net weer al's te verloor. As hierdie insetsel deurgaan, probeer ek weer later.

Ek sit op my stoep in Shingwedzi, waar ons gister op 'n snikhete dag aangekom het. Ek gaan maar sulke kort verslaggies tik, want dit blyk ek het probleme met Shingwedzi se seine. Ek sukkel steeds om foto's te laai.

Ons kaia in Shingwedzi, waar die regeerders blou-ape blyk te wees.

Dit is waar Mopani (ook Tsendze) uitstaan bo ander kampe - daar is geen bobbejane of ape nie.

Ek sal nog verder deel oor die Mopani-gedeelte, en hopelik slaag om nog 'n paar foto's te plaas. Ek wil net op hierdie stadium deel, dat die Shingwedzi-omgewing ooglopend droër is as die ander dele wat ons tot dusver beleef het. Behalwe vir enkele stilstaande poele naby die kamp, is die rivier kurkdroog.

As leek kan ek nie argumenteer met die wetenskaplikes se besluit oor die sluiting van sommige watergate nie. Maar die verlies van die Kanniedooddam in die Shingwedzirivier het 'n dramatiese impak op die wildlewe langs die S50. Daar is nie 'n teken van water tussen die kamp en die eertydse damwal nie. Noodwendig is die wild ook skaars. Ek was laas in Mei 2017 in Shingwedzi, maar (dalk is dit die tyd van die jaar) tans weet jy nie herwaarts of derwaarts om wild te gaan kyk nie, want weiding is ook skaars.

Ek dink ek gaan maar kyk hoe lyk dit langs die Mphongolo in die rigting van Babalala.

Dankie vir almal se terugvoer. Ek probeer weer later vandag met addisionekele foto's.

Ons was net na 11:00 terug by die kamp. Ek wil dadelik meld dat die area noord van Shingwedzi lyk baie beter. By ontvangs is bevestig dat Shingwedzi ook 42 mm reën verlede Saterdag-nag gehad het. Hopelik reageer die veld nog ten suide (jy sien waterpoele in die veld), veral as daar nog goeie opvolgreën kan val. Maar die Shingwedzirivier is grootliks net 'n groot massa droë sand.

Die Mphongolorivier het wel geloop, maar het beslis nie die samevloeiing met die Shingwedzi bereik nie. Daar is heelwat waterpoele in eersgenoemde en die veld langs die rivier vertoon mooi.

Len - hulle praat van 'n 'cottage, bungalow & chalet' op die Sanparks web. Hulle verwysing na 'n 'hut' het slegs betrekking op akkommodasie waar gemeenskaplike badkamers en kombuise gebruik moet word. Hier is nog hutte in Shingwedzi (ook in Letaba, O/Sabie en Pretoriuskop). Maar ons eenheid is 'n 'bungalow'. Dit laat my weer dink aan my 'army' dae.

Ek plaas intussen geen verdere foto's nie. Dit sukkel te veel. Ek kan nou nie eens my foto's sien wat ek reeds op die draad geplaas het nie.

..... vir jou raad. Ek het tot dusver (sedert ons by die huis vertrek het) alles met die foon gedoen. En dit sukkel maar in elk geval - altans vir my. Ek het nou die foto's van my foon af na my laptop oorgedra en gaan kyk of ek nie beter vaar nie.