Die Noorde wink alweer

... die internet-sein in Shingwedzi is maar net eenvoudig te swak vir die laai van foto's. Ek het nou met die laptop probeer - selfde probleem. Ek kry uiteindelik 'n foto gelaai, maar dit neem etlike minute per foto.

Jammer hieroor, maar diegene wat hierdie draad volg sal maar eers moet wag totdat ek weer by 'n area met beter seinsterkte kom.

Tans lê ons hier in ons 'hut' met die lugreëlaar op vol woema. Sedert eergister roer die hitte ons. Die wild (bietjie wat ons sien) soek al van 08:30 af skadu. Ons sal maar weer laatmiddag met die S50 in die rigting van die Kanniedooddam (wat wel doodgegaan het) ry. Ten spyte van die droë rivier bly dit maar 'n mooi roete.

Een ding wat duidelik is - die rooibokke en blouwildebeeste het 'n uitstekende lam- en kalfseisoen gehad.

En ek kan ook rapporteer dat die katte ontwyk die Boucher's met groot sukses. Ons is nou-al 'n week hier en het nog nie eens 'n leeu hoor brul nie. Maar hulle kan maar gaan skyt - ons geniet dit nog steeds (selfs sonder hulle)

Die S56 (langs die Mphongolo) was soos in die verlede 'n aangename rit. Ons het o.a. ons eerste trop buffels (afgesien van die enkele 'dagha boys') gesien. En een van my gunstelingbome, Njalabome, is mos volop langs hierdie roete. Ek kan nie help om te wonder hoe oud sommige van die ou reuse is nie.

... ek gebruik Vodacom.

Luister maat, hierdie hitte wat tans hier in die noorde heers, is nie vir 'n sissie soos ek bedoel nie. Selfs die ou rooibokkies sal my snaaks aankyk vanuit hul skadu-rusplekke as ek nou moet gaan ry.

Ai - darem maar lekker as jy sonder enige skuldgevoel 'n uiltjie kan knip oor die middaguur. Nou-nou vir Ralie gesê ons gaan ry eers @ 16:00.

Môre ons laaste voldag hier. Maar as ek kyk na die voorspelling t.o.v. temperature vir Maandag, is ek inderwaarheid dankbaar dat ek Maandagaand in 'n (hopelik) koeler Dullstroom slaap. Dan gaan ek sommer vir myself kyk of die berugte pad oor Lydenburg via die Abel Erasmuspas wel so sleg is vir karavaansleep.

Ek is ongelukkig (of is dit 'gelukkig') nie op FB nie en kan dus nie lees wat Janey Coetzee oor die betrokke roete geskryf het nie. Maar ek ry daardie roete môre net met die bakkie en sal my dus vergewis van die padoppervlak. My planne vir roete wildtuin toe in April is nog baie buigbaar.

Ek is tans nog fotoloos op hierdie draad tot tyd en wyl ek beter sein het. Maar ek onderneem om nog 'n hele paar foto's te plaas, al is dit mostert na die maal.

Ek wil intussen net 'n mate van 'n regstelling doen. Ons het vandag tot by die Nyawatsi voëlskuiling gery met die S50. Ek was verstom oor die hoeveelheid water in die Shingwedzirivier onderkant die gebreekte damwal. Vir kilometers is daar steeds groot poele. Dinge lyk dus nie só "grim" nie.

Tussen die eertydse Dipene buitepos en die voëlskuiling is die veld egter uiters droog. Plek-plek kan jy sien dat die jong gras wat seker na 'n vorige reënbui uitgeloop het, sommer behoorlik verlep is.

Vandag is meer gangbaar wat die temperatuur aanbetref. Maar steeds lê ek nou op die naat van my rug voor die lugreëlaar - in my 'bungalow'.

Vanaand is ons laaste van 9 salige nagte in hierdie ou plek waarvoor ek só lief is. Maar ons het darem nog môre die hele ent pad tot by Phalaborwahek om die wildtuin te geniet.

Ek hou diegene wat hierdie draad volg, op hoogte en kan hopelik weer gou foto's plaas.

En die katte kan nog maar steeds loop sk..... Wag, laat ek eerder niks sê nie. Dalk sit hul môre hul goeie pote voor.

Ek het gisteraand 'n dagverslaggie begin tik nadat ons na 'n lang dag op die pad hier in Dullstroom aangekom het. Maar toe druk ek weet 'n verkeerde knoppie iewers op die foon - en weg is alles.

Diegene wat hier volg, moet maar nou verlief neem dat ek eers by die huis (waar ons beplan om eerskomende Vrydag te arriveer), meer volledig verslag sal doen met terpaslike foto's. Ek het al my foto's tot en met afgelope Saterdag s'n, oorgeplaas na my rekenaar. Hopelik kan ek makliker van die rekenaar aflaai en ook makliker tik.

Nietemin, ons is gister in vroeë-oggend hitte (27° reeds om 07:15) weg by Shingwedzi. Stelselmatig het die temperatuur geklim tot 35° toe ons uiteindelik om 13:00 by Phalaborwahek arriveer. Die H14 hoofpad het met die uitsondering van wildehonde ('n klompie jare gelede) naby Shilawuri, nog nooit juis vir ons iets opgelewer nie. Nou praat ek van gewone alledaagse wild. Maar gister het ons bykans op dieselfde plek as die wildehonde van destyds, ons eerste en enigste leeus van ons 9 nagte besoek in die wildtuin gesien. En dit sommer teen die pad.

Nou die pad na Dullstroom. Om in kort op te som - 'n ou wat oorweeg om die roete oor Abel Erasmuspas via Orighstad en Lydenburg na Dullstroom met 'n karavaan aan te pak, moet sy kop laat lees. Dit is 'n nagmerrie op plekke, selfs met net jou bakkie. Ek sal in my meer volledige verslag hieroor skryf. Maar hier waar ons nou in 'n fantastiese Lekkeslaap selfsorg-plekkie in Dullstroom is, is jy dankbaar dat jy ongeskonde hier aangekom het. Dit is 'n absolute skande om die toestand van hierdie "scenic" roete te sien. Om deur Lydenburg te kom met 'n karavaan moet 'n skrikwekkende ervaring wees.

Vandag is dit hiervandaan tot Bethlehem. 

... die pad aan die noordekant (m.a.w. waar jy afsak na Hoedspruit se rigting) is in 'n swak toestand. Van bo-af, in die rigting van Orighstad, is die padoppervlakte heel goed tot by laasgenoemde - selfs om 'n karavaan te sleep.

Vanaf Orighstad (rigting Lydenburg) is die eerste gedeelte swak. Tot waar jy die grens oorsteek na Mpumalanga. Daarvandaan is dit skrikwekkend tot in Lydenburg. Die strate in die dorp self is haglik. Die pad tussen Lydenburg en Dullstroom grens ook maar aan nagmerrie toestande. Beslis nie geskik vir 'n padkaravaan nie.

Ons is vanoggend uit Dullstroom weg onder uiterste digte mis. Die pad vandaar tot Belfast (en ook die strate in Belfast) is uiters treurig. Ek sal na my ervaring van gister en vanoggend nooit enigsins verder dink om dié roete te sleep nie. Ek sal dit nie eens weer wil ry net met die Hilux nie.

Vanaf Belfast het ons N4/N12 langs gehou tot die R42-afrit na Delmas. Dit is die roete wat Sophie (my GPS) aanbeveel het. Weereens 'n skrikwekkende ervaring totdat waar jy die grens oorsteek na Gauteng tussen Delmas en Nigel. Daarvandaan is dit geredelik gangbaar totdat jy by die N3 aansluit.

Ons het by Villiers afgeklim. Tot Frankfort kan dit nog op 'n manier gaan, alhoewel ek nie daar wil sleep nie. Maar vanaf Frankfort tot Reitz - ag mens, wat kan ek sê. Ek kan nie glo dat dit toegelaat word dat 'n teerpad (en 'n besige een) tot só 'n mate kan agteruit gaan nie. Dit is 'n absolute bleddie skande (amper spel ek 'bleddie' met 'n 'f').

Ek moes maar noodwendig Bethlehem toe kom omdat ek môre-oggend 'n kliënt hier moet sien. Weereens bly ons oor in 'n gerieflike en netjiese Lekkeslaap selfsorgplek. Jissie mense - Lekkeslaap is darem maar 'n puik organisasie!!

Môre ry ons voort in die rigting van die huis met die N5 tot Winburg, en vandaar N1-langs tot Trompsburg waar ons weer gaan Lekkeslaap.

Weereens my belofte - sodra ek terug is by die huis sal ek meer volledig verslag doen, met o.a. foto's.

Ons is gister laterig weg uit Bethlehem nadat ek 'n kliënt moes gaan sien. Maar watter plesier was dit nie om al die pad weer op 'n goeie padoppervlak te ry nie. Die N5 ry lekker en dieselfde geld vir die N1. Maar o wee, laasgenoemde dra darem maar 'n ontsettende verkeer van swaar voertuie.

Ons het weereens oorgebly in 'n Lekkeslaap selfsorgplek, Fox Den in Trompsburg. Dit is 'n netjiese plek met 14 selfsorg-eenhede. As jy ooit in die Suid-Vrystaat moet oorslaap (dis nou as jy nie sleep nie), kan ek hierdie plek met groot vrymoedigheid aanbeveel. Trompsburg is mos maar 'n klein dorpie, en Fox Den is op die kant van die dorp. Dit voel of jy op 'n plaas kuier.

Maar van plaas gepraat - vanaand slaap ons weer by Travalia gasteplaas by Drie Susters. Ons staal ons maar vir behoorlik warm kry. Ek sien Accuweather wys vanoggend die kwik gaan vandag op Drie Susters styg tot 41°C. Eina!! Maar Shingwedzi het ons tot 'n mate daaraan gewoond gemaak.

Môre is dit die laaste skof huistoe. Ek sal poog om meer detail, met foto's van ons kort toertjie, oor die naweek te plaas.